အမေးများသော မေးခွန်းများနှင့် အဖြေများ
ကောင်းမွန်သည့် အလုပ်ရှင်၊ အလုပ်သမားဆက်ဆံရေး Fair Labour Practice ထူထောင် နိုင်ရန်အတွက်ဌာနမှ အစိုးရ၊ အလုပ်ရှင်၊ အလုပ်သမားသုံးပွင့်ဆိုင်တွေ့ဆုံဆွေးနွေးပွဲများကို ကျင်းပခြင်းအပေါ် ဝန်ကြီးဌာန၏ တည်ဆဲဉပဒေများနှင့်အညီ စက်ရုံ၊ အလုပ်ရုံများမှ အလုပ်ရှင်နှင့် အလုပ်သမားများ၏ အခက်အခဲများကိုတင်ပြစေ၍ လိုအပ်သည်များညှိနှိုင်း ဖြေရှင်းဆောင်ရွက်ပေးလျက်ရှိပါတယ်။ ၂၀၁၃ ခုနှစ်၊ ကျွမ်းကျင်မှုဖွံ့ဖြိုးတိုးတက်ရေးဥပဒေ ပုဒ်မ ၅(က)(၁)အရ ချုပ်ဆိုသည့် EC စာချုပ်တွင် အလုပ်ရှင်အနေဖြင့် အလုပ်ခန့်ထားမှု သဘောတူညီချက်စာချုပ်(EC)အပိုဒ် ၁၇(က)ပါအတိုင်း အလုပ်ရှင်၏တာဝန်ဝတ္တရားများကို ဆောင်ရွက်ပေးရန်လိုအပ်သကဲ့သို့ အလုပ်သမားများဘက်မှလည်း အပိုဒ် ၁၇(ခ)ပါ အလုပ် သမားများ၏ စည်းကမ်းများအတိုင်းလိုက်နာဆောင်ရွက်ရန်လိုအပ်ပါတယ်။ ထို့အပြင် အလုပ်ရှင်၊ အလုပ်သမားဆက်ဆံရေးကောင်းမွန်စေရန် မြို့နယ်အဆင့်၊ တိုင်းဒေသကြီး/ ပြည်နယ်အဆင့် မိတ်ဖက်ဌာနများနှင့်ချိတ်ဆက်၍ အလုပ်သမားရေးရာအသိပညာပေး ဆွေးနွေးပွဲများကို ပူးပေါင်းဆောင်ရွက်ပေးလျက်ရှိပါတယ်။
၂၀၂၀ပြည့်နှစ်၊ လုပ်သားအင်အားစစ်တမ်း(ပထမအကြိမ်) အစီရင်ခံစာအရ လုပ်သားအင်အား ၂၂.၂၂ သန်းရှိပါတယ်။ အလုပ်လက်မဲ့နှုန်းအနေနဲ့ ၁.၆% ရှိပြီး၊ အလုပ်လက်မဲ့နှုန်း နည်းပါးခြင်းဟာ ILO ရဲ့ အဓိပ္ပာယ်သတ်မှတ်ချက်အရ မြန်မာနိုင်ငံ တစ်နိုင်ငံတည်းမဟုတ်ဘဲ ဖွံ့ဖြိုးဆဲနိုင်ငံတွေတိုင်းမှာ တွေ့ရှိရမှာဖြစ်ပါတယ်။ ဒါကြောင့်လဲ ILO အနေနဲ့ ၂၀၁၃ ခုနှစ်မှာ ကျင်းပခဲ့တဲ့ ၁၉ ကြိမ်မြောက် အပြည်ပြည်ဆိုင်ရာ အလုပ်သမားရေးရာ စာရင်းအင်းပညာရှင်များညီလာခံမှာ ဖွံ့ဖြိုးဆဲနိုင်ငံတွေအနေနဲ့ အလုပ်လက်မဲ့နှုန်းအပြင် လုပ်သားအင်အားအပြည့်အဝ အသုံးမချနိုင်မှုနှုန်း (Labour Underutilization Rate) ကိုပါ တစ်ပေါင်းတည်းဖော်ပြဖို့ တိုက်တွန်းထားပြီး၊ မြန်မာနိုင်ငံအနေနဲ့ တွက်ချက်ဖော်ပြလျက်ရှိရာ ၂၀၂၀ ပြည့်နှစ်၊ နှစ်စဉ်လုပ်သားအင်အား စစ်တမ်း (ပထမအကြိမ်) အစီရင်ခံစာအရ လုပ်သားအင်အားအပြည့်အဝ အသုံးမချနိုင်မှု နှုန်း ၅.၂% ဖြစ်ပါတယ်။
၂၀၁၇ ခုနှစ်ကစပြီး နှစ်စဉ်လုပ်သားအင်အားစစ်တမ်းကို နိုင်ငံတော်ဘဏ္ဍာငွေဖြင့် တစ်နှစ်လျှင်နှစ်ကြိမ် ပုံမှန်ကောက်ယူပြုစုလျက်ရှိပြီး၊ ထိုသို့ကောက်ယူပြုစုရာတွင် ပြည်ထောင်စုနယ်မြေ၊ တိုင်းဒေသကြီး၊ ပြည်နယ်များ၌ နမူနာစာရင်းကောက်ကွက်များ အတွင်းရှိ ရပ်ကွက်၊ ကျေးရွာများမှာ အလုပ်သမားညွှန်ကြားရေးဦးစီးဌာနမှ ဝန်ထမ်းများ က ကွင်းဆင်းစာရင်းကောက်ယူခြင်းဖြစ်ပြီး၊ နှစ်စဉ် ဇန်နဝါရီလမှ မတ်လအထိ ပထမအကြိမ်၊ စက်တင်ဘာလမှ နိုဝင်ဘာလအထိဒုတိယအကြိမ် ကွင်းဆင်းစစ်တမ်း ကောက်ယူခဲ့ရာမှာ ၂၀၂၀ ပြည့်နှစ်၊ နှစ်စဉ်လုပ်သားအင်အားစစ်တမ်း (ပထမအကြိမ်)ထိ ကွင်းဆင်းကောက်ယူခဲ့ပြီး၊ အစီရင်ခံစာထုတ်ပြန်ခဲ့ပြီးဖြစ်ပါတယ်။ ကိုဗစ်-၁၉ ကူးစက် ရောဂါကြောင့် ၂၀၂၀ ပြည့်နှစ်၊ နှစ်စဉ်လုပ်သာအင်အားစစ်တမ်း (ဒုတိယအကြိမ်) မှစ၍ ကွင်းဆင်းစာရင်းကောက်ယူခြင်းကို ရပ်နားခဲ့ပါတယ်။
ကောင်းမွန်သည့် အလုပ်ရှင်၊ အလုပ်သမားဆက်ဆံရေးထူထောင်နိုင်ရန်အတွက် ဌာနမှ အစိုးရ၊ အလုပ်ရှင်၊ အလုပ်သမားသုံးပွင့်ဆိုင်တွေ့ဆုံဆွေးနွေးပွဲများကို ကျင်းပ ပြုလုပ်ပြီး စက်ရုံ၊ အလုပ်ရုံများမှ အလုပ်ရှင်နှင့်အလုပ်သမားများ၏ အခက်အခဲများကို တင်ပြစေ၍ လိုအပ်သည်များ ညှိနှိုင်း ဖြေရှင်းဆောင်ရွက် ပေးလျက်ရှိသည့်အပြင် အလုပ်ခန့်ထားမှုဆိုင် ရာသဘောတူညီချက် စာချုပ် (EC) အပိုဒ် ၁၇ (က) ပါအတိုင်း အလုပ်ရှင်၏ တာဝန်ဝတ္တရားများကို ဆောင်ရွက်ပေးရန် လိုအပ်သကဲ့သို့ အလုပ် သမားများဘက်မှ လည်း အပိုဒ် ၁၇(ခ)ပါ အလုပ်သမားများ၏ တာဝန် ဝတ္တရားများနှင့် အပိုဒ် ၁၃ ပါ အလုပ်သမားများ၏ စည်းကမ်းများအတိုင်း လိုက်နာ ဆောင်ရွက်ရန် လိုအပ်ပါသည်။ သို့မှသာ လုပ်ငန်းခွင် အေးချမ်း သာယာရေးနှင့် အလုပ်ရှင်၊ အလုပ်သမားမျှတသော အလုပ်သမားရေးရာ ကျင့်စဉ်များ ရရှိနိုင် မည် ဖြစ်သည့် အတွက် အစိုးရ၊ အလုပ်ရှင်၊ အလုပ်သမား၊ သုံးပွင့်ဆိုင် တွေ့ဆုံ ဆွေးနွေးမှုများ ဆက်လက်ဆောင်ရွက်သွားမည်ဖြစ်ပါကြောင်း၊ အလုပ်ရှင်၊ အလုပ်သမား ဆက်ဆံ ရေး ကောင်းမွန်စေရန် မြို့နယ်အဆင့်၊ တိုင်းဒေသကြီး / ပြည်နယ်အဆင့် မိတ်ဖက် ဌာနများနှင့် ပူးပေါင်း၍ အလုပ်သမားရေးရာ အသိပညာပေး ဆွေးနွေးပွဲများကို ဆောင်ရွက်ပေး လျက်ရှိပါတယ်။
အမိန့်ကြော်ငြာစာအမှတ် ၂၂/၂၀၁၂ ဖြင့် ၂၀၁၂ ခုနှစ်၊ မတ်လ ၉ ရက်နေ့တွင် စတင်အာဏာတည်ပါတယ်။
အဖွဲ့အစည်းများ ဖွဲ့စည်းခြင်းအားဖြင့် အလုပ်သမားများ၏ အကျိုးခံစားခွင့်များ၊ အလုပ်ချိန်၊ လုပ်ငန်းခွင်ဘေးအန္တရာယ်ကင်းရှင်းရေးနှင့် ကျန်းမာရေး၊ လူမှုဖူလုံရေး အပါအဝင် အခြားလုပ်ငန်းခွင်ဆိုင်ရာ အကျိုးခံစားခွင့်များကို အလုပ်သမားများ ကိုယ်တိုင်ရွေးချယ်ထားသော အလုပ်သမားအဖွဲ့အစည်းများ၏ ကိုယ်စားလှယ် များမှ တစ်ဆင့်လုပ်ငန်းခွင်မပျက် အလုပ်ရှင်နှင့်ညှိနှိုင်းဆောင်ရွက်နိုင်ခြင်း၊ အလုပ်ခွင် အတွင်း အခက်အခဲတစ်စုံတစ်ရာပေါ်ပေါက်ပါက အလုပ်ရှင်နှင့် အလုပ်သမားများ ကြားညှိနှိုင်းဆွေးနွေးအဖြေရှာ၍ ပြေလည်အောင်ဆောင်ရွက် နိုင်ခြင်းဖြင့် အလုပ်ရှင် နှင့် အလုပ်သမားအငြင်းပွားမှုများ လျော့နည်းလာမှာ ဖြစ်ပါတယ်။ အကျိုးဆက် အနေနဲ့ လုပ်ငန်းခွင်အေးချမ်းသာယာပြီး ကုန်ထုတ်လုပ် မှုပိုင်းမှာ ပိုမိုတိုးတက်လာမှာ ဖြစ်ပါတယ်။
အလုပ်သမားများ၏ အခွင့်အရေးများကို ဥပဒေနှင့်အညီရရှိစေရန်နှင့် အလုပ်ချိန် နှင့်အခြား အလုပ်ခန့်ထားမှုဆိုင်ရာ စည်းမျဉ်းစည်းကမ်းများကို အလုပ်ရှင်နှင့် ဆွေးနွေးညှိနှိုင်းရာမှာ အလုပ်သမားအဖွဲ့အစည်းများ၏ ကိုယ်စားလှယ်များမှ တစ်ဆင့်ဆောင်ရွက်ခြင်းဖြင့် အလုပ်သမားများအားလုံး အကျိုးခံစားရရုံသာမက အလုပ်ရှင်နှင့် အလုပ်သမား အငြင်းပွားမှုများ လျော့နည်းလာပြီး လုပ်ငန်းခွင်အေး ချမ်းသာယာရေး အတွက် အဓိကကျတဲ့အတွက် စက်ရုံ၊ အလုပ်ရုံ၊ လုပ်ငန်းခွင်များမှာ အလုပ်သမား အဖွဲ့အစည်းများကို ဥပဒေနှင့်အညီဖွဲ့စည်းသင့်ပါတယ်။
အလုပ်သမားများ၏ အခွင့်အရေးများကို ကာကွယ်စောင့်ရှောက်ရန်၊ အလုပ်သမား အချင်းချင်းအကြား၊ အလုပ်ရှင်နှင့် အလုပ်သမားအကြား ဆက်ဆံရေးကောင်းမွန် စေရန်၊ အလုပ်သမားအဖွဲ့အစည်းများကို စနစ်တကျနှင့် လွတ်လပ်စွာ ဖွဲ့စည်း ဆောင်ရွက်နိုင်စေရန်ဖြစ်ပါတယ်။
လုပ်ငန်းအမျိုးအစားအလိုက် အလုပ်သမားအနည်းဆုံးဦးရေ ၃၀ ဖြင့် အခြေခံ အလုပ်သမားအဖွဲ့အစည်းကိုဖွဲ့စည်းနိုင်ပြီး အခြေခံစုစုပေါင်း၏ ၁၀ ရာခိုင်နှုန်း အောက်မနည်းသော အလုပ်သမားအဖွဲ့အစည်းကထောက်ခံလျှင် မြို့နယ်အလုပ် သမားအဖွဲ့အစည်း၊ မြို့နယ်စုစုပေါင်း၏ ၁၀ ရာခိုင်နှုန်းအောက်မနည်းသော အလုပ်သမားအဖွဲ့အစည်းကထောက်ခံလျှင် တိုင်းဒေသကြီး/ပြည်နယ် အလုပ် သမားအဖွဲ့အစည်း၊ တိုင်းဒေသကြီး/ ပြည်နယ်စုစုပေါင်း၏ ၁၀ ရာခိုင်နှုန်းအောက် မနည်း အလုပ်သမားအဖွဲ့အစည်းက ထောက်ခံလျှင် အလုပ်သမားအဖွဲ့ချုပ်၊ ၂၀ ရာခိုင်နှုန်းအောက်မနည်းသော အလုပ်သမားအဖွဲ့ချုပ်က ထောက်ခံလျှင် မြန်မာနိုင်ငံလုံးဆိုင်ရာ အလုပ်သမားရေးရာအဖွဲ့ကို ဖွဲ့စည်းနိုင်ပါတယ်။
လုပ်သမားအဖွဲ့အစည်းလျှောက်ထားရာမှာ အခြေခံ၊ မြို့နယ်၊ တိုင်းဒေသကြီး/ ပြည်နယ်၊ အဖွဲ့ချုပ်နှင့် မြန်မာနိုင်ငံလုံးဆိုင်ရာအလုပ်သမားရေးရာအဖွဲ့ ဆိုပြီး အဆင့်ဆင့် ရှိပါတယ်၊
အခြေခံအလုပ်သမားအဖွဲ့အစည်းကို ၂၀၁၁ ခုနှစ်၊ အလုပ်သမားအဖွဲ့အစည်းဥပဒေ ပုဒ်မ ၄ (က) အရဖွဲ့စည်းနိုင်ပြီး နည်းဥပဒေ ၁၀ အရ အလုပ်သမားအဖွဲ့အစည်း မှတ်ပုံတင်ရန်လျှောက်လွှာ ပုံစံ(၁)၊ အခြေခံအလုပ်သမားအဖွဲ့အစည်း ဖွဲ့စည်းခြင်း ဆိုင်ရာအချက်အလက်များ ပုံစံ(၂)၊ ဖွဲ့စည်းပုံစည်းမျဉ်းကို အလုပ်အမှုဆောင် အဖွဲ့ဝင်များကသဘောတူကြောင်း လက်မှတ်ရေးထိုးချက် ပုံစံ(၄)၊ အဖွဲ့အစည်း၏ ဖွဲ့စည်းပုံစည်းမျဉ်း၊ ဥပဒေ ပုဒ်မ ၄ (က) (၂) အရ သက်ဆိုင်ရာလုပ်ငန်းရှိ စုစုပေါင်း အလုပ်သမားများ၏ ၁၀ ရာခိုင်နှုန်းထောက်ခံချက် ပူးတွဲလျက်လျှောက်ထားနိုင် ပါတယ်၊
မြို့နယ်အဖွဲ့အစည်းကို ၂၀၁၁ ခုနှစ်၊ အလုပ်သမားအဖွဲ့အစည်းဥပဒေ ပုဒ်မ ၄ (ခ) အရဖွဲ့စည်းနိုင်ပြီး နည်းဥပဒေ ၁၀ အရ အလုပ်သမားအဖွဲ့အစည်းမှတ်ပုံတင်ရန် လျှောက်လွှာ ပုံစံ(၁)၊ မြို့နယ်၊ တိုင်းဒေသကြီး/ပြည်နယ်အလုပ်သမားအဖွဲ့အစည်း ဖွဲ့စည်းခြင်းဆိုင်ရာအချက်အလက်များ ပုံစံ(၃)၊ ဖွဲ့စည်းပုံစည်းမျဉ်းကိုအလုပ်အမှု ဆောင်အဖွဲ့ဝင်များကသဘောတူကြောင်းလက်မှတ်ရေးထိုးချက် ပုံစံ(၄)၊ အဖွဲ့ အစည်း၏ဖွဲ့စည်းပုံစည်းမျဉ်းပူးတွဲလျက်လျှောက်ထားနိုင်ပါတယ်၊
တိုင်းဒေသကြီး/ပြည်နယ်အဖွဲ့အစည်းကို ၂၀၁၁ ခုနှစ်၊ အလုပ်သမားအဖွဲ့အစည်း ဥပဒေ ပုဒ်မ ၄ (ဂ) အရဖွဲ့စည်းနိုင်ပြီး နည်းဥပဒေ ၁၀ အရ အလုပ်သမားအဖွဲ့ အစည်းမှတ်ပုံတင်ရန် လျှောက်လွှာပုံစံ(၁)၊ မြို့နယ်၊ တိုင်းဒေသကြီး/ပြည်နယ် အလုပ်သမားအဖွဲ့အစည်း ဖွဲ့စည်းခြင်းဆိုင်ရာ အချက်အလက်များ ပုံစံ(၃)၊ ဖွဲ့စည်း ပုံစည်းမျဉ်းကို အလုပ်အမှုဆောင်အဖွဲ့ဝင်များက သဘောတူကြောင်းလက်မှတ်ရေး ထိုးချက် ပုံစံ(၄)၊ အဖွဲ့အစည်း၏ ဖွဲ့စည်းပုံစည်းမျဉ်းပူးတွဲလျက် လျှောက်ထားနိုင်ပါ တယ်၊
အလုပ်သမားအဖွဲ့ချုပ်ကို ၂၀၁၁ ခုနှစ်၊ အလုပ်သမားအဖွဲ့အစည်း ဥပဒေ ပုဒ်မ ၄ (ဃ) အရဖွဲ့စည်းနိုင်ပြီး နည်းဥပဒေ ၁၁ အရ အလုပ်သမားအဖွဲ့အစည်း မှတ်ပုံတင် ရန်လျှောက်လွှာ ပုံစံ(၁)၊ အလုပ်သမားအဖွဲ့ချုပ်ဖွဲ့စည်းခြင်းဆိုင်ရာ အချက်အလက် များပုံစံ (၅-က)၊ ဖွဲ့စည်းပုံစည်းမျဉ်းကို အလုပ်အမှုဆောင်အဖွဲ့ဝင်များက သဘော တူကြောင်းလက်မှတ်ရေးထိုးချက် ပုံစံ(၄)၊ အဖွဲ့အစည်း၏ဖွဲ့စည်းပုံ စည်းမျဉ်းပူးတွဲ လျက်လျှောက်ထားနိုင်ပါတယ်၊
မြန်မာနိုင်ငံလုံးဆိုင်ရာ အလုပ်သမားရေးရာအဖွဲ့ကို ၂၀၁၁ ခုနှစ်၊ အလုပ်သမား အဖွဲ့အစည်းဥပဒေ ပုဒ်မ ၄ (င) အရဖွဲ့စည်းနိုင်ပြီးနည်း ဥပဒေ ၁၁ အရ အလုပ်သမားအဖွဲ့အစည်း မှတ်ပုံတင်ရန်လျှောက်လွှာ ပုံစံ(၁)၊ မြန်မာနိုင်ငံလုံး ဆိုင်ရာ အလုပ်သမားရေးရာအဖွဲ့ ဖွဲ့စည်းခြင်းဆိုင်ရာအချက်အလက်များ ပုံစံ (၅-ခ)၊ ဖွဲ့စည်းပုံစည်းမျဉ်းကို အလုပ်အမှုဆောင်အဖွဲ့ဝင်များက သဘောတူကြောင်း လက်မှတ်ရေးထိုးချက် ပုံစံ(၄)၊ အဖွဲ့အစည်း၏ ဖွဲ့စည်းပုံစည်းမျဉ်းပူးတွဲလျက် လျှောက်ထားနိုင်ပါတယ်၊
အခြေခံ၊ မြို့နယ်၊ တိုင်းဒေသကြီး/ပြည်နယ် အလုပ်သမားအဖွဲ့အစည်းများကို သက်ဆိုင်ရာမြို့နယ် မှတ်ပုံတင်အရာရှိထံတွင် လျှောက်ထားနိုင်ပြီး လျှောက်လွှာတွင် ဖော်ပြရမည့်အချက်များနှင့် ပူးတွဲပါရှိရမည့်အထောက်အထားများ ပြည့်စုံ မှန်ကန်မှုရှိပါက အလုပ်သမားအဖွဲ့အစည်းအဖြစ် မှတ်ပုံတင်ပေးရန်လျှောက်လွှာ ကိုလက်ခံရရှိကြောင်းပြေစာ ပုံစံ(၆) ထုတ်ပေးပါတယ်၊ လျှောက်လွှာတွင်ဖော်ပြရ မည့်အချက်များနှင့် ပူးတွဲပါရှိရမည့် အထောက်အထားများများ မှန်ကန်ခိုင်လုံခြင်း ရှိ၊မရှိ မှတ်ပုံတင်အရာရှိက မြေပြင်ကွင်းဆင်းစစ်ဆေးပြီး တိုင်းဒေသကြီး/ ပြည်နယ်ဦးစီးမှူး(တာဝန်ခံ)၏ ကြီးကြပ်စိစစ်မှုဖြင့် ရက်ပေါင်း ၃၀ အတွင်း မှတ်ပုံတင်အရာရှိချုပ်ထံ တင်ပြပါတယ်။ မှတ်ပုံတင်အရာရှိချုပ်က စိစစ်ခွင့်ပြုပါက အလုပ်သမားအဖွဲ့အစည်းအဖြစ် အသိအမှတ်ပြုလက်မှတ်ပုံစံ(၇) ထုတ်ပေး ပါတယ်။
အလုပ်သမားအဖွဲ့ချုပ်နှင့် မြန်မာနိုင်ငံလုံးဆိုင်ရာ အလုပ်သမားရေးရာအဖွဲ့တို့ကို မှတ်ပုံတင်အရာရှိချုပ်ထံ တိုက်ရိုက်လျှောက်ထားရမှာ ဖြစ်ပါတယ်။ မှတ်ပုံတင် အရာရှိချုပ်က ပူးတွဲပါအထောက်အထားများ မှန်ကန်ခိုင်လုံမှုရှိပါက ရက်ပေါင်း ၆၀ အတွင်း အလုပ်သမားအဖွဲ့အစည်းအဖြစ် အသိအမှတ်ပြုလက်မှတ်ပုံစံ (၇) ထုတ် ပေးပါတယ်။
လျှောက်လွှာတွင် ဖော်ပြရမည့်အချက်များနှင့် ပူးတွဲပါရှိရမည့် အထောက်အထား များပြည့်စုံမှန်ကန်မှုမရှိပါက လိုအပ်ချက်များကို လုံလောက်သောအချိန်အတွင်း ထပ်မံဖြည့်ဆည်း၍ ပြန်လည်တင်ပြစေပြီး ဥပဒေနှင့်အညီ အသိအမှတ်ပြု လက်မှတ်ထုတ်ပေးနိုင်ရေး ဆက်လက်ဆောင်ရွက်ပေးပါတယ်။
အလုပ်သမားအဖွဲ့အစည်းများ လျှောက်ထားမှုနှင့်ပတ်သက်၍ နှောင့်နှေးကြန့်ကြာ မှုမရှိစေရန် အဖွဲ့အစည်းများလာရောက်လျှောက်ထားချိန်တွင် ဥပဒေအရလိုအပ် သည့်အချက်အလက်များ ပြည့်စုံမှန်ကန်မှုရှိပါက အသိအမှတ်ပြုလက်မှတ်ရရှိစေ ရေး အမြန်ဆုံးဆောင်ရွက်ပေးလျက်ရှိပါတယ်။
အလုပ်အမှုဆောင်သက်တမ်း ကျော်လွန်နေသည့်အဖွဲ့အစည်းများကို ၂၀၁၁ ခုနှစ်၊ အလုပ်သမားအဖွဲ့အစည်းဥပဒေနှင့်အညီ အလုပ်အမှုဆောင် ပြန်လည်ရွေးချယ်စေရေး သက်ဆိုင်ရာအဖွဲ့အစည်းများသို့ ညှိနှိုင်းအကြောင်းကြား ဆောင်ရွက်လျက် ရှိပါတယ်။
အလုပ်သမားအဖွဲ့အစည်း ၃၀၂၄ ဖွဲ့နှင့် အလုပ်ရှင်အဖွဲ့အစည်း ၂၈ ဖွဲ့ စုစုပေါင်း ၃၀၅၂ ဖွဲ့ ဖွဲ့စည်းပေးထားပါတယ်။ ကျယ်ကျယ်ပြန့်ပြန်သိလိုလျှင် အလုပ်သမား အဖွဲ့အစည်းအဖြစ် မှတ်ပုံတင်ရမည့်နည်းလမ်းများနှင့် လျှောက်လွှာပုံစံများကို ၂၀၁၁ ခုနှစ်၊ အလုပ်သမားအဖွဲ့အစည်း ဥပဒေတွင်ပြဋ္ဌာန်းထားသကဲ့သို့ အလုပ် သမားဝန်ကြီးဌာန Website တွင်လည်းဖော်ပြထားပြီး အလုပ်သမားညွှန်ကြားရေး ဦးစီးဌာန၊ တိုင်းဒေသကြီး/ ပြည်နယ်ဦးစီးမှူးရုံးများနှင့် မြို့နယ်ရုံးများတွင်လည်း မေးမြန်းစုံစမ်းနိုင်ပါတယ်။
ဥပဒေပြင်ဆင်ရေးနှင့်ပတ်သတ်၍ အလုပ်ရှင်အဖွဲ့အစည်း သို့မဟုတ် အလုပ်သမား အဖွဲ့အစည်းတစ်ခုခုမှ အဆိုပြုလာပါက အစိုးရ၊ အလုပ်ရှင်နှင့် အလုပ်သမား သုံးပွင့်ဆိုင်မိတ်ဖက်များ၏ သဘောထားများရယူ၍ လုပ်ထုံးလုပ်နည်းများနှင့်အညီ ဥပဒေပြင်ဆင်နိုင်ရေး ဆောင်ရွက်သွားမှာဖြစ်ပါတယ်။
ပြည်ပအလုပ်အကိုင်အလုပ်သမားသက်သေခံကတ်(OWIC) လျှောက်ထားရန် လိုအပ်သည့် စာရွက်စာတမ်းများမှာ အောက်ပါအတိုင်း ဖြစ်ပါတယ်-
| စဉ် | အကြောင်းအရာ | မိမိ အစီအစဉ် | မိမိအစီအစဉ် (ဂျပန်ကျွမ်းကျင်) | ခွင့်ပြန် | PR ခွင့်ပြန် | OWIC သက်တမ်းတိုး | OWIC ပျောက်ဆုံး | ||
| ၁။ | ညွှန်ကြားရေးမှူးချုပ် ထံ လိပ်မူသည့် အပေါ်စာ | ||||||||
| ၂။ | နိုင်ငံကူးလက်မှတ် မိတ္တူ (PJ) | ||||||||
| ၃။ | Offer Letter (or) Demand Letter | ||||||||
| ၄။ | အလုပ်ရှင်၊ အလုပ်သမား သဘောတူစာချုပ် | ||||||||
| ၅။ | ပြည်ဝင်ခွင့်ဗီဇာ | ||||||||
| ၆။ | သက်တမ်းရှိ အလုပ် လုပ်ခွင့် ပါမစ်၊ နေထိုင်ခွင့်ပါမစ် | ||||||||
| ၇။ | အလုပ်ရှင်၏ ခွင့်စာ | ||||||||
| ၈။ | ကာလရှည်နေထိုင်ခွင့် (COE) | ||||||||
| ၉။ | ဂျပန်စာ အရည်အချင်း လက်မှတ် | ||||||||
| ၁၀။ | ဘွဲ့လက်မှတ်၊ ကျွမ်းကျင်မှု လက်မှတ် | ||||||||
| ၁၁။ | ပြည်ဝင်/ ပြည်ထွက် လဝက တံဆိပ်တုံး | ||||||||
| ၁၂။ | ပြည်ပအလုပ်အကိုင် လမ်းညွှန် သင်တန်းဆင်းလက်မှတ် | ||||||||
| ၁၃။ | OWIC အဟောင်း ရှေ့ /နောက် မိတ္တူ | ||||||||
| ၁၄။ | ရဲစခန်း ထောက်ခံချက်၊ သတင်းစာ ကြော်ငြာ ဖြတ်ပိုင်း |
NSSA ၏ အလုပ်အကိုင်ဆိုင်ရာ ကျွမ်းကျင်မှု “စံ” များ ရေးဆွဲထားရှိမှုအနေဖြင့် အလုပ်အကိုင် (၆၇) မျိုးအတွက် ကျွမ်းကျင်မှုအဆင့်-၁ (၄၄) မျိုး၊ ကျွမ်းကျင်မှု အဆင့်-၂ (၃၆) မျိုး၊ ကျွမ်းကျင်မှု အဆင့်-၃ (၉) မျိုး၊ စုစုပေါင်း ကျွမ်းကျင်မှု “စံ” အဆင့် အလိုက် (၈၉) မျိုးကို အတည်ပြုပြဋ္ဌာန်းခဲ့ပြီးဖြစ်ပြီး အလုပ်အကိုင် (၁၉) မျိုးအား ကျွမ်းကျင်မှု “စံ”ရေးဆွဲနိုင် ရေးဆက်လက် ဆောင်ရွက်လျက်ရှိပါသည်။
ဘယ်နှစ်ကျောင်းရှိပါသလဲ။
အလုပ်သမားညွှန်ကြားရေးဦးစီးဌာနအောက်တွင် ကျွမ်းကျင်မှုလေ့ကျင့်ရေးသင်တန်းကျောင်း (၇) ကျောင်း ရှိပြီး ရန်ကင်း၊ မြောက်ဒဂုံ၊ မန္တလေး၊ ပုသိမ်၊ စက်စဲ၊ ဘားအံနှင့် ပဲခူးတို့တွင် ဖွင့်လှစ် ထားပါသည်။
အလုပ်သမားညွှန်ကြားရေးဦးစီးဌာန အသိအမှတ်ပြုမှတ်ပုံတင်ပေးထားသော သင်တန်းကျောင်း (၂၄) ကျောင်းနှင့် မြန်မာနိုင်ငံလုပ်သားများ ကျွမ်းကျင်မှု “စံ” သတ်မှတ် ပြဋ္ဌာန်းရေးအဖွဲ့ (NSSA) အသိအမှတ်ပြုမှတ်ပုံတင်ပေးထားသော သင်တန်းကျောင်း (၂၄)ကျောင်းနှင့် မြန်မာနိုင်ငံ လုပ်သားများ ကျွမ်းကျင်မှု “စံ” သတ်မှတ်ပြဌာန်းရေးအဖွဲ့ (NSSA) အသိအမှတ်ပြု မှတ်ပုံတင်ထားသော သင်တန်းကျောင်း (၁၁) ကျောင်းရှိပါသည်။
အလုပ်သမားညွှန်ကြားရေးဦးစီးဌာနအောက်ရှိ ကျွမ်းကျင်မှုလေ့ကျင့်ရေးသင်တန်းကျောင်း (၇) ကျောင်း၊ အလုပ်သမားညွှန်ကြားရေးဦးစီးဌာန အသိအမှတ်ပြု မှတ်ပုံတင် ပေးထားသော သင်တန်းကျောင်းသ သား ကျောင်းနှင့် မြန်မာနိုင်ငံ လုပ်မများ ကျွမ်းကျင်မှု “စံ” သတ်မှတ်ပြဋ္ဌာန်းရေးအဖွဲ့ (NSSA) အသိအမှတ်ပြုမှတ်ပုံတင်ပေးထားသော သင်တန်း ကျောင်း (၁၁) ကျောင်းတို့မှ သင်ကြားပို့ချနေသောသင်တန်းများမှာ အောက်ပါ အတိုင်း ဖြစ်ပါသည်-
(၁)အခြေခံဂဟေဆက်သင်တန်း
(၂)အိမ်တွင်းလျှပ်စစ်သွယ်တန်းတပ်ဆင်ခြင်းသင်တန်း
(၃)လေအေးပေးစက်ပြုပြင်/ တပ်ဆင်ခြင်းသင်တန်း
(၄)Air- Compressor ပြုပြင်ထိန်းသိမ်းနည်းသင်တန်း
(၅)Food and Beverage (အစားအသောက်နှင့် အဖျော်ယမကာဝန်ဆောင်မှု)
(၆)Waiting Staff (ဟိုတယ်စားပွဲထိုးဝန်ထမ်း)
(၇)Restaurant Service (စားသောက်ဆိုင်ဝန်ဆောင်မှု)
(၈)Room Attendant (အိပ်ခန်းဆောင်ထိန်းသိမ်းရေးဝန်ဆောင်မှု)
(၉)Hotel & Gastronomy Assistant (ဟိုတယ်နှင့် အစားအသောက်ဆိုင်ရာလက် ထောက်)
(၁၀)ဝါးလက်မှုအနုပညာသင်တန်း
(၁၁)ဆောက်လုပ်ရေးလက်သမား
(၁၂)လေအေးပေးစက်ကျွမ်းကျင်သင်တန်း
(၁၃)ဂဟေဆက်ကျွမ်းကျင်သင်တန်း(GMAW၊ GTAW၊ SMAW)
(၁၄)လျှပ်စစ်ကျွမ်းကျင်သင်တန်း
(၁၅)အခြေခံမော်တော်ယာဉ်စက်ပြင်သင်တန်း/ အဆင့်မြင့်မော်တော်ယာဉ်စက်ပြင်သင်တန်း
(၁၆)အထည်ချုပ်သင်တန်း
(၁၇)ပိုက်ပြင်ပိုက်ဆက် (Plumbing & Pipe Fitting)
(၁၈)ပရိဘောဂလက်သမား (Cabinet Maker)
(၁၉)IT နည်းပညာသင်တန်းများ
(၂၀)ဂျပန်ဘာသာစကားသင်တန်းများ
(၂၁)မြေတူးစက်မောင်းသင်တန်း
(၂၂)အရောင်းဝန်ထမ်း (Sale Person)
(၂၃)ငွေစာရင်းကိုင်ဝန်ထမ်း(Cashier)
(၂၄)ရိုးရာလက်နှိပ်ပညာ(Traditional Message)
(၂၅)ဆောက်လုပ်ရေး (လက်သမား၊ ပန်းရံ၊ သံချည်သံကွေး)
(၂၆)အဆင့်မြင့် PLC လျှပ်စစ်သင်တန်း/ အဆောက်အဦလျှပ်စစ်ဒီဇိုင်းသင်တန်း
NSSA ၏ အလုပ်အကိုင်ဆိုင်ရာ ကျွမ်းကျင်မှု “စံ” ရေးဆွဲထားရှိပြီးဖြစ်သည့် အလုပ် အကိုင်အမျိုးအစား (၆၂) မျိုးအတွက် NSSA အသိအမှတ်ပြုသင်တန်းကျောင်း လျှောက်ထား၍ NSSA ကျွမ်းကျင်မှု “စံ” အခြေပြုသင်တန်းများ သင်ကြားနေသော NSSA သင်တန်းကျောင်း အဖြစ် လျှောက်ထားနိုင်ပြီး NSSA ၏ အလုပ်အကိုင်ဆိုင်ရာ ကျွမ်းကျင်မှု “စံ” ရေးဆွဲထား ရှိပြီးဖြစ်သည့် အလုပ်အကိုင်အမျိုးအစား (၆၂) မျိုးတွင် မပါဝင်သော အလုပ်အကိုင်၊ ကျွမ်းကျင်မှု “စံ” သင်ရိုးညွှန်းတမ်းနှင့် ကိုက်ညီမှုမရှိသည့် အလုပ် အကိုင်များ၊ သင်တန်းများ သင်ကြားပို့ချနေသော သင်တန်းကျောင်းများသည် ဦးစီးဌာန အသိအမှတ်ပြုသင်တန်းကျောင်း လျှောက်ထားနိုင်ပြီး ဦးစီးဌာနနှင့် NSSA အသိအမှတ်ပြု သင်တန်းကျောင်းလျှောက်ထားရာတွင် သတ်မှတ်ချက်အတိုင်း လျှောက်ထားရမည်ဖြစ်ပြီး NSSA နှင့် ဝန်ကြီးဌာန Websiteများဖြစ်သော www.nssa. gov.mm နှင့် www.mol.gov.mm တို့တွင် လျှောက်ထားရန်လိုအပ်သည့် Application Form နှင့် လျှောက်ထားလျှင် လိုအပ်သည့်အချက်အလက်များ၊ လိုက်နာရမည့်ညွှန်ကြားချက်များကို ရယူ လျှောက်ထားနိုင်ပါသည်။
ဦးစီးဌာနအောက်တွင် ကျွမ်းကျင်မှုလေ့ကျင့်ရေးသင်တန်းကျောင်း (ရန်ကင်း၊ မြောက်ဒဂုံ၊ မန္တလေး၊ ပုသိမ်၊ စက်စဲ၊ ဘားအံ၊ ပဲခူး) တို့ရှိပြီး သင်တန်းကျောင်းများတည်ရှိရာ တိုင်းဒေသကြီး/ ပြည်နယ်များရှိ အလုပ်သမားညွှန်ကြားရေးဦးစီးဌာနရုံးများတွင် လည်းကောင်း၊ သင်တန်းကျောင်း များတွင်လည်းကောင်း လိုင်စင်ဓါတ်ပုံ၊ မှတ်ပုံတင် မိတ္တူတို့နှင့်အတူ သင်တန်းကျောင်းအလိုက် လျှောက်ထားနိုင်သော အခြေခံဂဟေဆက် သင်တန်း၊ အခြေခံလျှပ်စစ်နှင့် အိမ်တွင်းလျှပ်စစ် သင်တန်း၊ လေအေးပေးစက်တပ်ဆင်/ ပြုပြင်သင်တန်းများထဲမှ လျှောက်ထားနိုင်သော သင်တန်းများကို တက်ရောက်ရန် လျှောက်လွှာများရယူလျှောက်ထားနိုင်ပြီး သင်တန်းသားများမှ သင်တန်းကြေးပေးရန် မလိုဘဲ အခမဲ့သင်ကြားပေး၍ သင်တန်းဆိုင်ရာ ကုန်ကျစရိတ်များကို နိုင်ငံတော် ဘဏ္ဍာငွေဖြင့် သင်ကြားပေးလျက်ရှိသော်လည်း သင်တန်းသားများအတွက် သီးခြား အဆောင်စီစဉ်ပေးခြင်း၊ တစ်ဦးစီအတွက် ပညာသင်ထောက်ပံ့ပေးခြင်းနှင့် သင်တန်းပြီးဆုံး ပါက တနိုင်တပိုင် သို့မဟုတ် လုပ်ငန်းခွင်၌ အထောက်အကူပြုနိုင်မည့် စက်ပစ္စည်းများနှင့် လက်သုံးကိရိယာများ ပံ့ပိုးပေးခြင်းတို့ ဆောင်ရွက်ပေးခြင်းမပြုပါ။
ဦးစီးဌာနသင်တန်းကျောင်းများအနေဖြင့် အခြေခံဂဟေဆက်၊ အခြေခံလျှပ်စစ်နှင့် အိမ်တွင်း လျှပ်စစ်သင်တန်းအတွက်သာ Mobile Training သင်ကြားပေးနိုင်ပြီး သင်တန်းပေး စေလိုသောဒေသများရှိ သက်ဆိုင်ရာအဖွဲ့အစည်းများမှ ဦးဆောင်၍ အလုပ်သမား ညွှန်ကြားရေးဦးစီးဌာန ညွှန်ကြားရေးမှူးချုပ်ထံသို့ လိပ်မူ၍ ညှိနှိုင်းလာပါက စီစဉ်ဆောင် ရွက်ပေးပါသည်။
သိရှိလိုပါသည်။ ယနေ့အထိ စစ်ဆေးပြီးဦးရေနှင့် အောင်မြင်သူလုပ်သားဦးရေစာရင်း မည်မျှရှိသည်ကိုလည်း သိရှိလိုပါသည်။
၂၀၂၂-၂၀၂၃ ဘဏ္ဍာရေးနှစ်အတွင်း Certificate ပေးအပ်နိုင်ရေးစစ်ဆေးမည့် လုပ်သားဦးရေ (၅,၀၀၀) ဦး လျာထားသတ်မှတ်ထားပါသည်။ ၂၀၂၂ ခုနှစ်၊ ဧပြီလမှ ယနေ့အထိ ကျွမ်းကျင် လုပ်သား (၄,၆၈၄) ဦး စစ်ဆေးအကဲဖြတ်နိုင်ခဲ့ပြီး (၄,၄၅၂) ဦး အောင်မြင် ခဲ့ပါသည်။ လျာထားချက်အတိုင်း လုပ်သားဦးရေ (၅၀၀၀) ပြည့်အောင် စစ်ဆေး အကဲဖြတ်နိုင်ရေး ဆက်လက်ဆောင် ရွက်သွားမည်ဖြစ်ပါသည်။
မြန်မာနိုင်ငံ လုပ်သားများ ကျွမ်းကျင်မှု “စံ”သတ်မှတ်ပြဋ္ဌာန်းရေးအဖွဲ့ (NSSA)သည် မြန်မာလုပ်သားထု ကျွမ်းကျင်မှုဖွံ့ဖြိုးတိုးတက်ရေးလုပ်ငန်းစဉ်များကို ၂၀၁၄ ခုနှစ်မှ စတင် အကောင်အထည်ဖော်ဆောင်ရွက်လျက်ရှိရာ ယနေ့အထိ အလုပ်အကိုင် (၃၆) မျိုးအတွက် ကျွမ်းကျင်မှုစစ်ဆေးအကဲဖြတ်ရေးဌာန ကျွမ်းကျင်မှုအဆင့် (၁) (၁၈၄) ခု၊ အလုပ်အကိုင် (၁၅) မျိုးအတွက် ကျွမ်းကျင်မှုအဆင့် (၂) (၃၂)ခု၊ အလုပ်အကိုင် (၁) မျိုးအတွက် ကျွမ်းကျင်မှုအဆင့် (၃) (၁)ခု၊ စုစုပေါင်း ကျွမ်းကျင်မှုစစ်ဆေးအကဲဖြတ်ရေးဌာန (၂၁၇)ခုကို တည်ထောင်နိုင်ခဲ့ပြီး အလုပ်အကိုင် (၃၅)မျိုးအတွက် အရည်အသွေးပြည့်မီသူ ကျွမ်းကျင်လုပ်သား (၂၁,၅၅၅) ဦးကို အသိအမှတ်ပြုလက်မှတ်များပေးအပ်နိုင်ခဲ့ပါသည်။ ၂၀၂၂–၂၀၂၃ ဘဏ္ဍာရေးနှစ်အတွင်း ကျွမ်းကျင်လုပ်သားများ ထပ်မံမွေးထုတ်နိုင်ရေး အတွက် ဖြေဆိုသူ ၅၀၀၀ ဦးကို စစ်ဆေးအကဲဖြတ်နိုင်ရေး စီမံချက်ရေးဆွဲ၍ လျာထား ချက်အတိုင်း ပြည့်မီအောင် အကောင် အထည်ဖော် ဆောင်ရွက်လျက်ရှိပါသည်။
(NSSA) သည် ၂၀၁၄ ခုနှစ်မှစတင်၍ အလုပ်အကိုင်အလိုက် ကျွမ်းကျင်မှုစစ်ဆေးအကဲ ဖြတ်ရေးလုပ်ငန်းစဉ်များ ဆောင်ရွက်လျက်ရှိရာ ယနေ့အထိ ဖြေဆိုအောင်မြင်သူလုပ်သား (၂၁,၅၅၅) ဦးရှိသည့်အနက် လုပ်သား (၁၈,၁၇၀)ဦးကို အမျိုးသားအဆင့် အလုပ်အကိုင် ဆိုင်ရာ ကျွမ်းကျင်မှုအသိအမှတ်ပြုလက်မှတ်များကို အခမ်းအနားဖြင့် ကျင်းပ၍ ပေးအပ် နိုင်ခဲ့ပါသည်။ ပေးအပ်ရန်ကျန်ရှိသော အသိအမှတ်ပြုလက်မှတ်များနှင့် ၂၀၂၂-၂၀၂၃ ဘဏ္ဍာရေးနှစ်တွင် ဖြေဆိုအောင်မြင်သူများအတွက် အသိအမှတ်ပြုလက်မှတ်များကို အလုပ်သမားဝန်ကြီးဌာန၊ ပြည်ထောင်စုဝန်ကြီး ဦးဆောင်၍ အခမ်းအနားဖြင့် ဆက်လက် ပေးအပ်နိုင်ရေး စီစဉ်ဆောင်ရွက်လျက်ရှိပါသည်။
အလုပ်ရှာဖွေသူများအနေဖြင့် အလုပ်သမားမှတ်ပုံတင်ကတ်ပြား လာရောက်ပြုလုပ် ရာတွင် အသက်(၁၈)နှစ်ပြည့်ပြီးသူဖြစ်ရမည်ဖြစ်ပြီး အလုပ်အကိုင်ရှာဖွေသူများ အနေဖြင့် အလုပ်လိုအပ်သည့်အခါ အလုပ်အကိုင်နှင့် အလုပ်သမားရှာဖွေရေးရုံးသို့ လူကိုယ်တိုင်လာရောက်၍ အလုပ်သမားမှတ်ပုံတင်ရမည်။ ဤကဲ့သို့ လူကိုယ်တိုင် လာရောက်မှတ်ပုံတင်ခြင်းဖြင့် မှတ်ပုံတင်သူ၏ အရည်အချင်းနှင့် ကျွမ်းကျင်မှုအခြေ အနေကိုပြည့်စုံစွာရရှိနိုင်ပြီး၊ လျှောက်ထားရာရုံးတွင် ၎င်း၏ အရည်အချင်းနှင့် အ လုပ်အကိုင်ပေါ်ပေါက်လျက်ရှိပါက ချက်ချင်းပင်ဆက်သွယ်ပေးနိုင်ရန်ဖြစ်သည်။ အလုပ်အကိုင်နှင့်အလုပ်သမားရှာဖွေရေးရုံးသို့ အလုပ်သမားမှတ်ပုံ တင်ကတ်ပြား လာရောက်လျှောက်ထားပါက ကိုယ်ရေးအချက်အလက်အား စနစ်တကျမှတ်တမ်း တင်နိုင်ရန်အတွက် နိုင်ငံသားမှတ်ပုံတင်ကတ်ပြား(မူရင်း)၊ ပညာအရည်အချင်း အောင်လက်မှတ်(မူရင်း)နှင့် ကျွမ်းကျင်မှုလက်မှတ်(မူရင်း) အထောက်အထားများ ပြည့်စုံစွာတင်ပြပြီး အလုပ်သမားမှတ်ပုံတင်ကတ်ပြား အလလခ(ပုံစံ-၂)ကို ထုတ်ယူရမည်ဖြစ်ပါသည်။
စက်ရုံ၊ အလုပ်ရုံ၊ အလုပ်ဌာနများမှ အလုပ်ရှင်များသည် အလုပ်သမားလိုအပ်သည့် အခါတိုင်း အလုပ်အကိုင်နှင့် အလုပ်သမားရှာဖွေရေးရုံးများသို့ ချိတ်ဆက်၍ လိုအပ် သည့် အလုပ်သမား၏အရည်အချင်း၊ အလုပ်သမားအရေအတွက်ကို အလုပ်သမား လိုကြောင်း အကြောင်းကြားစာ(အလလခပုံစံ-၃) တွင် အချက်အလက်များ ပြည့်စုံစွာ ဖြည့်စွက်ပြီး သက်ဆိုင်ရာ အလုပ်အကိုင်နှင့်အလုပ်သမားရှာဖွေရေးရုံးများသို့ ပေးပို့ ဆောင်ရွက်ရမည်ဖြစ်ပါသည်။
ပေးပို့လာသော အလုပ်သမားလိုကြောင်းအကြောင်းကြားစာအရ အလုပ်အကိုင်နှင့် အလုပ်သမားရှာဖွေရေးရုံးများက ကြော်ငြာသင်ပုန်းတွင် ကြော်ငြာ၍ အလုပ်လျှောက် ထားရန် လာရောက်စာရင်းပေးသူများနှင့် အလုပ်သမား မှတ်ပုံတင်ထားသူများထဲမှ သင့်တော်သောသူများကို အလုပ်သမားပေးပို့သည့်ပုံစံ (အလလခပုံစံ-၆)တွင် ဖြည့်စွက်၍ အလုပ်ရှင်မှရွေးချယ်နိုင်ရန်ပေးပို့ပြီး ပေးပို့ထားသည့် (အလလခ ပုံစံ-၆) တွင် အမည်စာရင်းပါရှိသူများအား အလုပ်ရှင်မှ ရွေးချယ်ကြောင်းနှင့် (အလလခ ပုံစံ-၆)ပါ အလုပ်သမားစာရင်းမှ ရွေးချယ်ပြီးသူများကို အလုပ်ရှင်မှ အလုပ်အကိုင် နှင့်အလုပ်သမားရှာဖွေရေးရုံးသို့ ပြန်လည်ပေးပို့ရမည်ဖြစ်ပါသည်။
ထိုသို့ပေးပို့လာသော အလုပ်ရှင်မှ ရွေးချယ်ထားသူများအား အလုပ်ခန့်ထားနိုင်ရေး အတွက်အလုပ်ခန့်ထားရေးကတ်ပြား (အလလခပုံစံ-၇) ကို အလုပ်အကိုင်နှင့် အလုပ် သမားရှာဖွေရေးရုံးမှ ပြန်လည်ထုတ်ပေးမည်ဖြစ်ပါသည်။
လုပ်သားအင်အားစစ်တမ်းကို ၁၉၄၈ ခုနှစ်၊ အလုပ်အကိုင်ဆိုင်ရာ စာရင်းစစ်တမ်း ယူခြင်းအက်ဥပဒေဖြင့် ကောက်ယူပါသည်။
၂၀၁၅ ခုနှစ်တွင် မြန်မာနိုင်ငံ လုပ်သားအင်အား၊ ကလေးလုပ်သားနှင့် ကျောင်းအပြီး လုပ်ငန်းခွင် ဝင်ရောက်မှု အကူး အပြောင်း ဆန်းစစ်ခြင်း စစ်တမ်းကို ကောက်ယူခဲ့ပြီး ၊ ၂၀၁၇ ခုနှစ်မှ စ၍ နှစ်စဉ် လုပ်သားအင်အား စစ်တမ်းကို တစ်နှစ်လျှင်နှစ်ကြိမ် ကောက်ယူခဲ့ရာ ၂၀၂၀ ပြည့်နှစ်၊ နှစ်စဉ်လုပ်သားအင်အား စစ်တမ်း (ပထမ အကြိမ်)အထိ မြေပြင် ကွင်းဆင်း ကောက်ယူမှု စုစုပေါင်း (၈)ကြိမ် ကောက်ယူခဲ့ကာ ကွင်းဆင်းကောက်ယူခြင်း မပြုမီ သင်တန်းပို့ချခဲ့ပြီး ၊ ၂၀၂၀ ပြည့်နှစ်၊ နှစ်စဉ် လုပ်သားအင်အား စစ်တမ်း (ပထမ အကြိမ်) အစီရင်ခံစာထိ ထုတ်ပြန်ခဲ့ပြီးဖြစ်ပါတယ်။
၂၀၂၂ ခုနှစ်တွင် လုပ်သားအင်အားစစ်တမ်း ကောက်ယူနိုင်ရေး စီမံချက်ရေးဆွဲ ဆောင်ရွက်ခဲ့သော်လည်း ကိုဗစ်-၁၉ ကူးစက်ရောဂါဖြစ်ပွားမှုအခြေအနေများကြောင့် စာရင်းကောက်ယူရန် အခက်အခဲရှိသဖြင့် လုပ်သားဆိုင်ရာ စာရင်းအင်းများ စဉ်ဆက် မပြတ်ရရှိရေးအတွက် ဆောင်ရွက်နိုင်မည့် နည်းလမ်းဖြစ်သော လုပ်သားဆိုင်ရာ စာရင်းအင်းများကို Projection တွက်ချက်ခြင်း နည်းလမ်းဖြင့် လုပ်ငန်းစီမံချက်ရေးဆွဲ၍ မိတ္ထီလာစီးပွားရေးတက္ကသိုလ်နှင့် Naypyidaw State Academy စာရင်းအင်းပညာဌာနမှ ပါမောက္ခ ဆရာ၊ ဆရာမများ အကူအညီဖြင့် ၂၀၂၀-၂၀၂၃ ခုနှစ် လုပ်သားအင်အား ခန့်မှန်းအညွှန်းကိန်းများ အစီရင်ခံစာအား ထုတ်ပြန်နိုင်ရေး ဆောင်ရွက်လျက်ရှိပါတယ်။
၂၀၂၀ပြည့်နှစ်၊ လုပ်သားအင်အားစစ်တမ်း(ပထမအကြိမ်) အစီရင်ခံစာအရ လုပ်သား အင်အား ၂၂.၂၂ သန်းရှိပါတယ်။ အလုပ်လက်မဲ့နှုန်းအနေနဲ့ ၁.၆% ရှိပြီး၊ အလုပ်လက်မဲ့ နှုန်း နည်းပါးခြင်းဟာ ILO ရဲ့ အဓိပ္ပာယ်သတ်မှတ်ချက်အရ မြန်မာနိုင်ငံ တစ်နိုင်ငံတည်း မဟုတ်ဘဲ ဖွံ့ဖြိုးဆဲနိုင်ငံတွေတိုင်းမှာ တွေ့ရှိရမှာဖြစ်ပါတယ်။ ဒါကြောင့်လဲ ILO အနေနဲ့ ၂၀၁၃ ခုနှစ်မှာ ကျင်းပခဲ့တဲ့ ၁၉ ကြိမ်မြောက် အပြည်ပြည်ဆိုင်ရာ အလုပ်သမားရေးရာ စာရင်းအင်းပညာရှင်များညီလာခံမှာ ဖွံ့ဖြိုးဆဲနိုင်ငံတွေအနေနဲ့ အလုပ်လက်မဲ့နှုန်းအပြင် လုပ်သားအင်အားအပြည့်အဝ အသုံးမချနိုင်မှုနှုန်း (Labour Underutilization Rate) ကိုပါ တစ်ပေါင်းတည်းဖော်ပြဖို့ တိုက်တွန်းထားပြီး၊ မြန်မာနိုင်ငံအနေနဲ့ တွက်ချက်ဖော်ပြ လျက်ရှိရာ ၂၀၂၀ ပြည့်နှစ်၊ နှစ်စဉ်လုပ်သားအင်အားစစ်တမ်း (ပထမအကြိမ်) အစီရင် ခံစာအရ လုပ်သားအင်အားအပြည့်အဝ အသုံးမချနိုင်မှုနှုန်း ၅.၂% ဖြစ်ပါတယ်။
၂၀၁၇ ခုနှစ်ကစပြီး နှစ်စဉ်လုပ်သားအင်အားစစ်တမ်းကို နိုင်ငံတော်ဘဏ္ဍာငွေဖြင့် တစ်နှစ်လျှင်နှစ်ကြိမ် ပုံမှန်ကောက်ယူပြုစုလျက်ရှိပြီး၊ ထိုသို့ကောက်ယူပြုစုရာတွင် ပြည်ထောင်စုနယ်မြေ၊ တိုင်းဒေသကြီး၊ ပြည်နယ်များ၌ နမူနာစာရင်းကောက်ကွက်များ အတွင်းရှိ ရပ်ကွက်၊ ကျေးရွာများမှာ အလုပ်သမားညွှန်ကြားရေးဦးစီးဌာနမှ ဝန်ထမ်းများ က ကွင်းဆင်းစာရင်းကောက်ယူခြင်းဖြစ်ပြီး၊ နှစ်စဉ် ဇန်နဝါရီလမှ မတ်လအထိ (ပထမအကြိမ်)နှင့် စက်တင်ဘာလမှ နိုဝင်ဘာလအထိ (ဒုတိယအကြိမ်) ကွင်းဆင်း စစ်တမ်း ကောက်ယူခဲ့ရာမှာ ၂၀၂၀ ပြည့်နှစ်၊ နှစ်စဉ်လုပ်သားအင်အားစစ်တမ်း (ပထမအကြိမ်) ထိ ကွင်းဆင်းကောက်ယူခဲ့ပြီး၊ အစီရင်ခံစာထုတ်ပြန်ခဲ့ပြီး ဖြစ်ပါတယ်။ ကိုဗစ်-၁၉ ကူးစက်ရောဂါကြောင့် ၂၀၂၀ ပြည့်နှစ်၊ နှစ်စဉ်လုပ်သားအင်အားစစ်တမ်း (ဒုတိယအကြိမ်) မှစ၍ ကွင်းဆင်းစာရင်းကောက်ယူခြင်းကို ရပ်နားခဲ့ပါတယ်။
လုပ်သားအင်အားစစ်တမ်းမှ ရရှိလာသော အချက်အလက်များကို မြန်မာနိုင်ငံ၏ ရေရှည် တည်တံ့ခိုင်မြဲပြီး ဟန်ချက်ညီသော ဖွံ့ဖြိုးတိုးတက်မှုစီမံကိန်း (Myanmar Sustainable Development Plan-MSDP)၊ စဉ်ဆက်မပြတ် ဖွံ့ဖြိုးမှုပန်းတိုင်များ (Sustainable Development Goals-SDGs)၊ မြန်မာနိုင်ငံ သင့်လျော်ကောင်းမွန်သော အလုပ်အကိုင် ဌာနေအစီအစဉ် (Decent Work Country Program-DWCP)၊ ပညာရေးဝန်ကြီးဌာနမှ မြန်မာနိုင်ငံရှိ ကျောင်းပြင်ပရောက် ကလေးများအခြေအနေကို လေ့လာစိစစ်အကဲဖြတ် ခြင်း (Out-of-School Children Initiative – OOSCI)၊ ILO Statistics Database အတွက် လိုအပ်သည့်အချက်အလက်များ၊ အာဆီယံနှင့် နိုင်ငံတကာစာရင်းအင်း စာစောင် များ၊ နိုင်ငံတကာငွေကြေး ရန်ပုံငွေအဖွဲ့ (IMF)၊ ကမ္ဘာ့ဘဏ် (World Bank)၊ သုတေသန ပြုသူများနှင့် ပြည်တွင်း/ ပြည်ပမှ စာတမ်းပြုစုမည့် ဘွဲ့ယူကျောင်းသား၊ ကျောင်းသူများမှ တောင်းခံလာမှုအား ပံ့ပိုးပေးလျက်ရှိပါသည်။
အလုပ်သမားညွှန်ကြားရေးဦးစီးဌာနမှ ထုတ်ပြန်လျက်ရှိသည့် အစီရင်ခံစာ Pdf များကို ဝန်ကြီးဌာန၏ တရားဝင် Website ဖြစ်သည့် www.mol.gov.mm တွင် လေ့လာဖတ်ရှုပြီး download ရယူနိုင်ပါသည်။
အလုပ်သမားများ၏ အခွင့်အရေးကို ကာကွယ်စောင့်ရှောက်ရန်၊ အလုပ်ရှင်နှင့်အလုပ်သမားများအကြားဆက်ဆံရေး ကောင်းမွန်ပြီး လုပ်ငန်းခွင် အေးချမ်းသာယာစေရန်၊ အလုပ်ရှင်နှင့် အလုပ်သမားအငြင်းပွားမှုအား တရားမျှတစွာ ဖြေရှင်းဆောင်ရွက်ပေးခြင်းဖြင့် ရပိုင်ခွင့်များကို မျှတမှန်ကန်စွာနှင့် မြန်ဆန်စွာ ရရှိခံစားနိုင်စေရန်အတွက် အလုပ်သမားရေးရာအငြင်းပွားမှုဖြေရှင်းရေးဥပဒေကို ပြဌာန်းထားပါတယ်။ အဆိုပါ ဥပဒေအရ အကျိုးစီးပွားဆိုင်ရာ အငြင်းပွားမှုများကို အငြင်းပွားမှုဖြေရှင်းရေး ယန္တရားဖြင့် ဖြေရှင်းဆောင်ရွက်ပေးလျက်ရှိပါတယ်။
အလုပ်သမားရေးရာအငြင်းပွားမှုဖြေရှင်းရေးဥပဒေအရ အလုပ်ရှင်နှင့် အလုပ်သမားအကြားဖြစ်ပွားသော အငြင်းပွားမှုများကို အခွင့်အရေးဆိုင်ရာ အငြင်းပွားမှုနှင့် အကျိုးစီးပွားဆိုင်ရာအငြင်းပွားမှုများ ဖြစ်ပါတယ်။ စုပေါင်းသဘောတူညီချက်နှင့်စပ်လျဉ်းသော အငြင်းပွားမှု၊ အလုပ်သမားဥပဒေပါရပိုင်ခွင့်များနှင့် အကျုံးဝင်မှု မရှိသော်လည်း အလုပ်သမားအများစု၏ ရသင့်ရထိုက်သော အကျိုးစီးပွားနှင့်သက်ဆိုင်သည့် အငြင်းပွားမှုများနှင့် လုပ်ငန်းခွင်ဆက်ဆံရေးနှင့် စပ်လျဉ်းသော အငြင်းပွားမှုများကိုတော့ အကျိုးစီးပွားဆိုင်ရာ အငြင်းပွားမှုများအဖြစ် သတ်မှတ်ပြဌာန်းထားပါတယ်။
အခွင့်အရေးဆိုင်ရာအငြင်းပွားမှုများကို စည်းကြပ်ဥပဒေအလိုက် သက်ဆိုင်ရာဌာနများ၊ စီရင်ပိုင်ခွင့်ရှိသော တရားရုံးသို့ လျှောက်ထားနိုင်ပြီး အကျိုးစီးပွားဆိုင်ရာ အငြင်းပွားမှုများကို အငြင်းပွားမှုဖြေရှင်းရေးယန္တရား အဆင့်ဆင့်ဖြင့် ဖြေရှင်းပေးလျက်ရှိပါတယ်။
စက်ရုံ အလုပ်ရုံများတွင် အလုပ်ရှင်၊ အလုပ်သမား အငြင်းပွားမှုများ ဖြစ်ပေါ်လာပါက အကျိုးစီးပွားဆိုင်ရာ အငြင်းပွားမှုနှင့် အခွင့်အရေးဆိုင်ရာ အငြင်းပွားမှုများ ကွဲပြားလျက် စက်ရုံအတွင်း ဖွဲ့စည်းထားသော အလုပ်သမားရေးရာ လုပ်ငန်းညှိနှိုင်းရေး ကော်မတီ၊ မြို့နယ် ညှိနှိုင်းဖျန်ဖြေရေး အဖွဲ့၊ ခုံသမာဓိအဖွဲ့နှင့် ခုံသမာဓိကောင်စီ အဆင့်ဆင့်ဖြင့် ဖြေရှင်း ဆောင်ရွက်ပေးလျက်ရှိကြောင်း၊ EC စာချုပ်ပါ အချက်များအပေါ်တွင် အခြေခံပြီး အခွင့်အရေးဆိုင်ရာ အငြင်းပွားမှုများကို သက်ဆိုင်ရာ ဌာနများတွင် စည်းကြပ်လျက်ရှိသော ဥပဒေတွင် ပြဌာန်းပြီး အကျိုးခံစားခွင့်နှင့် အညီ ညှိနှိုင်း ဖြေရှင်းဆောင်ရွက်ပေးလျက်ရှိပါသည်။
သတ်မှတ်လုပ်သားဦးရေပြည့်မီသည့် လုပ်ငန်းများ၊ စက်ရုံများတွင် WCC ဖွဲ့စည်းရမည်ဖြစ်ပြီး အဆိုပါ WCC တွင် လုပ်ငန်းခွင်ဆိုင်ရာ နစ်နာချက်များကို ကနဦးဆွေးနွေးညှိနှိုင်းမှု ပြုလုပ်ခြင်း၊ ပြေငြိမ်းမှုမရရှိသော အကျိုးစီးပွားဆိုင်ရာ အငြင်းပွားမှုနှင့် စပ်လျဉ်း၍ မြိုနယ်အဆင့်ဖြစ်သော ညှိနှိုင်းဖျန်ဖြေမှု ပြုပြီးနောက် ပြေငြိမ်းမှုရရှိပါက နှစ်ဖက်သဘောတူစာချုပ် ချုပ်ဆိုခြင်းဖြင့် ပြေငြိမ်းမှုမရရှိပါက တိုင်းဒေသကြီး/ပြည်နယ်အဆင့်ဖြစ်သော ခုံသမာဓိ အဖွဲ့သို့ အမှုတွဲလွှဲပြောင်း ပေးပို့ခြင်း၊ ခုံသမာဓိအဖွဲ့က စစ်ဆေးဆုံးဖြတ်ခြင်း၊ ခုံသမာဓိအဖွဲ့၏ ဆုံးဖြတ်ချက်ကို ကျေနပ်မှုမရှိသော အငြင်းပွားသူများသည် ခုံသမာဓိကောင်စီသို့ လျှောက်ထားခြင်း၊ ခုံသမာဓိကောင်စီက ခုံသမာဓိ ဖြင့် စစ်ဆေးဆုံးဖြတ်ခြင်းတို့ ဖြစ်ပါတယ်။
အလုပ်သမားရေးရာလုပ်ငန်းညှိနှိုင်းရေးကော်မတီ (WCC) ကို အလုပ်သမား (၃၀)ဦးနှင့်အထက် အလုပ်လုပ်ကိုင်နေသော လုပ်ငန်းတစ်ခုခုတွင် စုပေါင်းသဘောတူညီချက်ကို ဆွေးနွေးရရှိနိုင်ရန် အလုပ်ရှင်သည် အလုပ်သမား အဖွဲ့ အစည်းရှိလျှင် အလုပ်သမားအဖွဲ့အစည်း တစ်ခုချင်းက အဆိုပြုသည့် အလုပ်သမားကိုယ်စားလှယ်သုံးဦးစီနှင့် အလုပ်သမားကိုယ်စားလှယ်ဦးရေနှင့် အရေအတွက်တူညီသည့် အလုပ်ရှင်ကိုယ်စားလှယ်များ၊ အလုပ်သမားအဖွဲ့ အစည်းမရှိလျှင် အလုပ်သမားများက ရွေးချယ်ပေးသော အလုပ်သမားကိုယ်စားလှယ်သုံးဦးနှင့် အလုပ်ရှင်ကိုယ်စားလှယ်သုံးဦးတို့ဖြင့် ဖွဲ့စည်းရမှာဖြစ်ပါတယ်။
WCC ဖွဲ့စည်းရန် ပျက်ကွက်ပါက အရေးယူခံရမည်ဖြစ်၍ သတ်မှတ်လုပ်သားဦးရေ ပြည့်မီသော လုပ်ငန်းများတွင် အလုပ်သမားရေးရာ လုပ်ငန်းညှိနှိုင်းရေးကော်မတီကို မပျက်မကွက်ဖွဲ့စည်းရန် လိုအပ်ပါတယ်။ ဖွဲ့စည်းရန် ပျက်ကွက်ပါက အနည်းဆုံး ကျပ်သုံးသိန်းမှ အများဆုံး ကျပ်တစ်ဆယ်သိန်းအထိ ငွေဒဏ်ချမှတ်ခံရမည်ဖြစ်ပြီး ထပ်မံကျူးလွန်ပါက အနည်းဆုံး ကျပ်တစ်ဆယ်သိန်းမှ အများဆုံး ကျပ်သိန်း ၃၀အထိ ငွေဒဏ်ချမှတ်ခံရမှာ ဖြစ်ပါတယ်။
ညှိနှိုင်းရေးကော်မတီတွင် ဆွေးနွေးညှိနှိုင်းပြီးနောက် ပြေငြိမ်းမှုရရှိပါက အလုပ်ရှင်နှင့် အလုပ်သမားများသည် စုပေါင်း သဘောတူညီချက် ချုပ်ဆိုပြီး သက်ဆိုင်ရာညှိနှိုင်းဖျန်ဖြေရေးအဖွဲ့သို့ မိတ္တူပေးပို့ရမှာ ဖြစ်ပါတယ်။ စုပေါင်း သဘောတူညီချက်၏ သက်တမ်းကာလမှာ တစ်နှစ်ဖြစ်ပြီး အဆိုပါ သက်တမ်းကာလအတွင်း သဘောတူညီထားသည့် အချက်နှင့်စပ်လျဉ်း၍ ထပ်မံတောင်းဆိုခြင်းမပြုရပါ။ ပြေငြိမ်းမှုမရရှိသည့် အငြင်းပွားမှုနှင့်စပ်လျဉ်း၍ ဖျန်ဖြေရေးကို ဆက်လက်ခံယူလိုလျှင်၊ စုပေါင်းသဘောတူညီချက်ကို လိုက်နာမှုမရှိလျှင် သက်ဆိုင်ရာ ညှိနှိုင်းဖျန်ဖြေရေးအဖွဲ့သို့ တိုင်ကြားနိုင်ပါတယ်။
အလုပ်ရှင်၊ အလုပ်သမားအကြား ဖြစ်ပွားသော နစ်နာချက်များ၊ အလုပ်သမားရေးရာပြဿနာများ၊ အငြင်းပွားမှုများ ပေါ်ပေါက်လာပါက နစ်နာသူသည် စက်ရုံ၊ အလုပ်ရုံတည်ရှိရာ မြို့နယ်များရှိ သက်ဆိုင်ရာမြို့နယ် ညှိနှိုင်းဖျန်ဖြေရေးအဖွဲ့သို့ တိုင်ကြားစာ ပေးပို့တိုင်ကြားနိုင်ပါတယ်။
ညှိနှိုင်းဖျန်ဖြေရမည့် ကာလအနေဖြင့် အငြင်းပွားမှုကို သိရှိသည့် သို့မဟုတ် လက်ခံရရှိသည့်နေ့ရက်မှ ခုနှစ်ရက်အတွင်း ပြေငြိမ်းစေရန် ဖျန်ဖြေရေးအဖွဲ့ရှေ့မှောက်တွင် နှစ်ဖက်သဘောတူစာချုပ် ချုပ်ဆိုရမှာ ဖြစ်ပါတယ်။ သတ်မှတ်ရက်အတွင်း ပြေငြိမ်းမှုရရှိအောင် ဖျန်ဖြေခြင်း မပြုနိုင်သည့်အခါ အလုပ်ရှင်၊ အလုပ်သမား နှစ်ဦးနှစ်ဖက်လုံးက ဆက်လက် ဖျန်ဖြေပေးစေလိုကြောင်း တောင်းဆိုလျှင် ပြေငြိမ်းမှုရသည်အထိ ဖျန်ဖြေပေးနိုင်ပါတယ်။
အလုပ်သမားရေးရာ လုပ်ငန်းညှိနှိုင်းရေးကော်မတိ၏ သက်တမ်းမှာ (၂)နှစ် ဖြစ်ပြီး ကျန်ရှိသည့် ညှိနှိုင်းဖျန်ဖြေရေးအဖွဲ့၊ ခုံသမားဓိအဖွဲ့နှင့် ခုံသမာဓိကောင်စီတို့၏ သက်တမ်းမှာ (၃)နှစ် ဖြစ်ပါတယ်။ သက်မှတ်သက်တမ်း ကုန်ဆုံးပါက ဥပဒေနှင့်အညီ အသစ်ပြန်လည်ဖွဲ့စည်း ဆောင်ရွက်ပါတယ်။
ညှိနှိုင်းဖျန်ဖြေရာတွင် ပြေငြိမ်းမှုမရရှိသောကြောင့် ညှိနှိုင်းဖျန်ဖြေရေးအဖွဲ့က လွှဲအပ်သော အကျိုးစီးပွားဆိုင်ရာ အငြင်းပွားမှုအား လက်ခံရရှိသည့်နေ့ရက်မှ ခုနှစ်ရက်အတွင်း ဆုံးဖြတ်ချက်ချမှတ်ရမည်ဖြစ်ပြီး တရားဝင် ရုံးပိတ်ရက်များမပါ နှစ်ရက်အတွင်း သက်ဆိုင်ရာ အငြင်းပွားသူများထံ ဆုံးဖြတ်ချက်ပေးပို့ရမှာ ဖြစ်ပါတယ်။
မရှိမဖြစ်လိုအပ်သည့် ဝန်ဆောင်မှုလုပ်ငန်းနှင့် သက်ဆိုင်သည့်ဆုံးဖြတ်ချက်မှတစ်ပါး ခုံသမာဓိအဖွဲ့၏ဆုံးဖြတ်ချက်ကို မကျေနပ်ပါက အငြင်းပွားသူများသည် ခုံသမာဓိအဖွဲ့၏ ဆုံးဖြတ်ချက်ကို လက်ခံရရှိသည့်နေ့ရက်မှ ခုနှစ်ရက်အတွင်း ခုံသမာဓိကောင်စီ၏ အဆုံးအဖြတ်ခံယူရန် အငြင်းပွားသူ တစ်ဖက်ဖက်မှ လျှောက်ထားနိုင်ပါတယ်။
မရှိမဖြစ်လိုအပ်သည့် ဝန်ဆောင်မှုလုပ်ငန်းနှင့်စပ်လျဉ်း၍ ခုံသမာဓိအဖွဲ့၏ဆုံးဖြတ်ချက်ကို လက်ခံရရှိသည့်နေ့ရက်မှ တရားဝင်ရုံးပိတ်ရက်များမပါ ခုနှစ်ရက်အတွင်း ခုံသမာဓိကောင်စီသို့ လျှောက်ထားရမှာ ဖြစ်ပါတယ်။
အလုပ်သမားရေးရာ အငြင်းပွားမှုဖြေရှင်းရေးဥပဒေအရ ခုံသမာဓိကောင်စီသည် အငြင်းပွားမှုဖြေရှင်းရေးယန္တရားတွင် နောက်ဆုံးအဆင့်ဖြစ်ပြီး ခုံသမာဓိကောင်စီ၏ ဆုံးဖြတ်ချက်သည် ချမှတ်သည့်နေ့ရက်မှစ၍ အတည်ဖြစ်ပါတယ်။
သက်ဆိုင်ရာအငြင်းပွားသူများသည် ခုံသမာဓိအဖွဲ့ သို့မဟုတ် ခုံသမာဓိကောင်စီ၏ ဆုံးဖြတ်ချက်အတည်ဖြစ်သည့် နေ့ရက်မှ ရက်ပေါင်း ၉၀ ကျော်လွန်ပါက ယင်းဆုံးဖြတ်ချက်ကို ပြင်ဆင်ပြောင်းလဲရန် သဘောတူညီနိုင်ပါတယ်။ ယင်းသဘောတူညီမှုအရ ပြင်ဆင်ပြောင်းလဲချက်သည် ခုံသမာဓိဆုံးဖြတ်ချက်၏ သက်ဆိုင်ရာအပိုင်းကို လွှမ်းမိုးပါတယ်။
အတည်ဖြစ်ပြီးသည့် ဆုံးဖြတ်ချက်တစ်ရပ်ကို အငြင်းပွားမှုနှင့် သက်ဆိုင်သူအားလုံး၊ အငြင်းပွားမှုတွင်ပါဝင်သော အလုပ်ရှင်၏ ဥပဒေအရ တရားဝင်ဆက်ခံသူများ၊ အငြင်းပွားမှုဖြစ်ပွားသောအချိန်တွင် သို့မဟုတ် အငြင်းပွားမှုဖြစ်ပွားပြီးနောက် လုပ်ငန်းတွင် အလုပ်လုပ်ကိုင်နေကြသော အလုပ်သမားများအားလုံး လိုက်နာရမှာဖြစ်ပါတယ်။
ခုံသမာဓိအဖွဲ့ သို့မဟုတ် ခုံသမာဓိကောင်စီ၏ အတည်ဖြစ်ပြီးသည့် ဆုံးဖြတ်ချက်ကို လိုက်နာရန်ပျက်ကွက်ပါက အနည်းဆုံး ကျပ်သိန်း ၁၀၀ မှ အများဆုံး ကျပ်သိန်း ၃၀၀ အထိ ငွေဒဏ်ချမှတ်ခြင်းခံရမည့်အပြင် အလုပ်သမားရရန် ရှိသည့် ငွေကြေးအကျိုးခံစားခွင့်ကိုလည်း အလုပ်သမားအား ပေးချေရမှာ ဖြစ်ပါတယ်။
၂၀၁၂ ခုနှစ်၊ လူမှုဖူလုံရေးဥပဒေအရ အလုပ်သမား (၅)ဦးနှင့်အထက် လုပ်ကိုင်သော အောက်ပါအလုပ်ဌာနများ အကျုံးဝင်ပါသည်-
(က) စက်မှုလက်မှု အလုပ်ဌာနများ၊
(ခ ) စီးပွားရေးလုပ်ကိုင်သောအစိုးရဌာန၊ အစိုးရ(အဖွဲ့အစည်းနှင့် ဒေသဆိုင်ရာအုပ်ချုပ်ရေးအဖွဲ့အစည်းများ)
(ဂ ) စည်ပင်သာယာရေးအဖွဲ့အစည်းများ၊
(ဃ) ငွေရေးကြေးရေး အဖွဲ့အစည်းများ၊
(င ) စီးပွားရေးလုပ်ကိုင်သောကုမ္ပဏီ၊ အသင်း၊ အဖွဲ့အစည်းများနှင့် လက်အောက်ခံဌာနများ၊
(စ ) ဆိုင်များ၊ ကုန်သွယ်အလုပ်ဌာများ၊ အများပြည်သူဖျော်ဖြေရေးအလုပ်ဌာနများ၊
(ဆ) သယ်ယူပို့ဆောင်ရေးလုပ်ငန်းများ၊
(ဇ ) တစ်နှစ်နှင့်အထက်လုပ်ကိုင်သော ဆောက်လုပ်ရေးလုပ်ငန်းများ၊
(ဈ ) ဖက်စပ်လုပ်ငန်းများ၊
(ည) သတ္တုတွင်းနှင့် ကျောက်မျက်ရတနာဆိုင်ရာလုပ်ငန်းများ၊
(ဋ ) ရေနံနှင့် သဘာဝဓာတ်ငွေ့လုပ်ငန်းများ၊
(ဌ ) ဆိပ်ကမ်းများနှင် ပြင်ပဆိပ်ကမ်းများ၊
(ဍ ) ကုန်တင်ကုန်ချလုပ်ငန်း အဖွဲ့အစည်းများ၊
(ဎ ) အလုပ်သမားဝန်ကြီးဌာနနှင့် လက်အောက်ခံဌာနအဖွဲ့အစည်းများ၊
(ဏ) အခါအားလျော်စွာသတ်မှတ်သော အခြားလုပ်ငန်းဌာနများ၊
လူမှုဖူလုံရေးအဖွဲ့တွင် အကျုံးဝင်မှတ်ပုံတင်ထားသော အလုပ်များသည် လျော်ကြေးဥပဒေမှ ကင်းလွတ်ခွင့်ရှိပြီး၊ ၎င်းအလုပ်ဌာနများမှ ဝန်ထမ်း/အလုပ်သမားများ အကြောင်းအမျိုးမျိုးကြောင့် မကျန်းမာမှု၊ အလုပ်တွင်ထိခိုက်မှု၊ သေဆုံးမှု၊ ကျန်ရစ်သူ အကျိုးခံစားခွင့်များ၊ အငြိမ်းစားယူပြီးနောက် ကျန်းမာရေးစောင့်ရှောက်မှုများ ဆက်လက်ခံယူခွင့်စသည့် အခွင့်အရေးများရရှိစေရန် အလုပ်ဌာနကိုယ်စား လူမှုဖူလုံရေးအဖွဲ့မှ တာဝန်ယူဆောင်ရွက်ပေးသည်ဖြစ်၍ အလုပ်ရှင်နှင့်အလုပ်သမားများ ငြိမ်းချမ်းစွာအတူလက်တွဲပြီး ကုန်ထုတ်စွမ်းအားတိုးတက်အောင် ဆောင်ရွက်နိုင်ရန်ရည်ရွယ်ပြီး မဝင်မနေရ အကျုံးဝင်ရမည့် အလုပ်ဌာနအဖြစ် သတ်မှတ်ထားခြင်းဖြစ်ပါသည်။
လူမှုဖူလုံရေးစီမံကိန်းသည် နိုင်ငံတော်၏ အဓိကကုန်ထုတ်စွမ်းအားစုဖြစ်သော အလုပ်သမားများ၏ လူမှုဘဝလုံခြုံရေးနှင့် ကျန်းမာရေးစောင့်ရှောက်မှုများကို ခံစားရရှိစေခြင်းဖြင့် ကုန်ထုတ်လုပ်မှု တိုးတက်ပြီး နိုင်ငံတော်၏ စီးပွားရေးဖွံ့ဖြိုးတိုးတက်မှုကို အထောက်အကူဖြစ်စေရန် အဓိကရည်ရွယ်ပါသည်။ ရည်ရွယ်ချက်နဲ့အညီ အကျုံးဝင်မှတ်ပုံတင်ထားသည့် အလုပ်သမားများအား ကျန်းမာရေးစောင့်ရှောက်မှုနှင့် မကျန်းမာမှု၊ မီးဖွားမှု၊ သေဆုံးမှုနှင့် အလုပ်တွင် ထိခိုက်မှုအတွက် ငွေကြေးအကျိုးခံစားခွင့်တို့အပြင် အငြိမ်းစားယူပြီးနောက် ဆေးဝါးကုသမှုဆက်လက်ခံယူခွင့်၊ မိသားစုထောက်ပံ့မှုအကျိုး ခံစားခွင့်၊ အလုပ်လုပ်ကိုင်နိုင်စွမ်းမရှိမှု အကျိုးခံစားခွင့်၊ သက်ပြည့် အငြိမ်းစား အကျိုးခံစားခွင့်၊ ကျန်ရစ်သူအကျိုးခံစားခွင့်၊ အလုပ်လက်မဲ့ အကျိုးခံစားခွင့်၊ အိမ်ရာနေထိုင်ခွင့်နှင့် ပိုင်ဆိုင်ခွင့်များကိုပါ ရရှိစေရန် ရည်ရွယ်ပြီး အကောင်အထည်ဖော် ဆောင်ရွက်လျက်ရှိပါသည်။
အကျုံးဝင်မှတ်ပုံတင်ရမည့် အလုပ်ရှင်တစ်ဦးသည် လုပ်ငန်းစတင်လုပ်ကိုင်ပြီး ရက်ပေါင်း ၃၀ အတွင်း မိမိတို့လုပ်ငန်းများနှင့်အတူ မှတ်ပုံတင်ရန် တာဝန်ရှိပါသည်-
(က) အလုပ်ဌာနမှတ်ပုံတင်ပုံစံ ပုံစံ(၁)နှင့် မိမိအလုပ်ဌာနတွင် လုပ်ကိုင်နေသော အလုပ်သမားစာရင်း ပုံစံ (၁-က) တွဲတင်ရန်၊
(ခ ) လုပ်ငန်းဌာနတည်ထောင်ဖွင့်လှစ်ခြင်းမှတ်တမ်းနှင့် လုပ်ငန်းလိုင်စင်မိတ္တူ၊
လုပ်ငန်းဌာနတစ်ခုခုတွင် အမြဲတမ်းဖြစ်စေ၊ ယာယီဖြစ်စေ ကာယအား သို့မဟုတ် ဉာဏအားကို အသုံးပြုပြီး လုပ်ကိုင်၍ရရှိသောလုပ်ခဖြင့် အသက်မွေးဝမ်းကျောင်းမှုပြုနေသူများ၊ လုပ်ခရသည်ဖြစ်စေ၊ မရသည်ဖြစ်စေ အလုပ်လုပ်ကိုင်လျက်ရှိသော အလုပ်သင်များ၊ ပညာသင်များသည်လည်း လူမှုဖူလုံရေးအဖွဲ့တွင် အကျုံးဝင်မှတ်ပုံတင်ရပါမည်။ (ပုဒ်မ-၂(က))
အလုပ်ရှင်တစ်ဦးသည် အလုပ်သမားသစ်စတင်ခန့်အပ်ပြီး (၁၀)ရက်အတွင်း မိမိလုပ်ငန်းဌာနနှင့် သက်ဆိုင်သည့် နယ်မြေရှိလူမှုဖူလုံရေးရုံးတွင် မှတ်ပုံတင်ရန် တာဝန်ရှိပါသည်။ မှတ်ပုံတင်ရန်လိုအပ်သည့် စာရွက်စာတမ်းများမှာ-
(က) အာမခံအလုပ်သမားမှတ်ပုံတင် ပုံစံ(၂)
(ခ ) ကျန်းမာကြောင်း ထောက်ခံချက် (မိမိဆန္ဒအလျောက် မှတ်ပုံတင်သူများအတွက်သာ)
လူမှုဖူလုံရေးအာမခံစိစစ်ရေးကတ်ရရှိနိုင်ရေးအတွက် အလုပ်သမားတစ်ဦးသည် အာမခံအလုပ်သမားမှတ်ပုံတင် ပုံစံ (၂)ပါ အချက်အလက် (၁၈)ချက်ကို ပြည့်စုံမှန်ကန်စွာ ဖြည့်စွက်ပြီး အချက်အလက်များ မှန်ကန်ကြောင်းကို အလုပ်ရှင်နှင့် အလုပ်သမားတို့မှ လက်မှတ်ရေးထိုး၍ ဓါတ်ပုံ(၁)ပုံနှင့် သက်ဆိုင်ရာ လူမှုဖူလုံရေးရုံးသို့ ပေးအပ်ရပါမည်။ လူမှုဖူလုံရေးရုံးမှ အာမခံအလုပ်သမားမှတ်ပုံတင်ပုံစံပါ အချက်အလက်များအားစိစစ်၍ မှန်ကန်မှု ရှိလျှင် လူမှုဖူလုံရေးအာမခံနံပါတ်ပါဝင်သော လူမှုဖူလုံရေး အာမခံစိစစ်ရေးကတ်ပြားကို ထုတ်ပေးမည်ဖြစ်ပါသည်။
လူမှုဖူလုံရေးအာမခံစိစစ်ရေးကတ်ပြားသည် လူမှုဖူလုံရေးအဖွဲ့တွင် အာမခံထားသူဖြစ်ကြောင်း သက်သေခံဖြစ်သည်။ လူမှုဖူလုံရေးအကျိုးခံစားခွင့်များရရှိရန်နှင့် သတ်မှတ်ထားသော ဆေးခန်းများ၊ ဆေးရုံများတွင် ဆေးကုသမှုခံယူရန်ကတ်ပြားကို တင်ပြရမည်။ အဆိုပါကတ်ပြား ပျောက်ဆုံး/ပျက်စီးလျှင် နီးစပ်ရာ လူမှုဖူလုံရေးရုံးတွင် ပြန်လည်လျှောက်ထားရပါမည်။ ကတ်ပြားကို တစ်ဆင့်လွှဲပြောင်းခြင်း မပြုရ။ အလုပ်ဌာနအသစ်သို့ ပြောင်းရွှေ့လုပ်ကိုင်ပါက ၎င်းကတ်ပြားပါ အာမခံနံပါတ်ကိုသာ ဆက်လက်အသုံးပြု၍ ထည့်ဝင်ကြေး ဆက်လက်ပေးဆောင်ရမည် ဖြစ်ပါသည်။
၂၀၁၂ ခုနှစ် လူမှုဖူလုံရေးဥပဒေတွင် အာမခံစနစ်(၆)မျိုး ပြဌာန်းထားသော်လည်း လက်ရှိအချိန်တွင် (၁) ကျန်းမာရေးနှင့် လူမှုရေးစောင့်ရှောက်မှုအာမခံစနစ်နှင့် (၂) အလုပ်တွင် ထိခိုက်မှုအကျိုးခံစားခွင့် အာမခံစနစ်စသည့် အာမခံစနစ် (၂)မျိုးကိုသာ အကောင်အထည်ဖော် ဆောင်ရွက်လျက်ရှိပါသည်။ ကျန်အာမခံစနစ်များဖြစ်သည့် မိသားစုထောက်ပံ့မှုအာမခံစနစ်အကျိုးခံစားခွင့်နှင့် ကျန်ရစ်သူအကျိုးခံစားခွင့် အာမခံစနစ်၊ အလုပ်လက်မဲ့ ကျိုးခံစားခွင့် အာမခံစနစ်၊ အခြားလူမှုဖူလုံရေးအာမခံစနစ် (အိမ်ရာစီမံကိန်း) များကိုတော့ ဥပဒေပုဒ်မ ၁၀၀ အရ နိုင်ငံတော်၏ စီးပွားရေးဖွံ့ဖြိုးတိုးတက်မှု၊ ဘဏ္ဍာရန်ပုံငွေဖူလုံမှုနှင့် လုပ်ငန်းဌာနများ၏ စီးပွားရေးဖွံ့ဖြိုးတိုးတက်မှု တို့ကိုလည်းကောင်း၊ ပြောင်းလဲလာသည့် လူမှုရေးလိုအပ်ချက်များကိုလည်းကောင်း၊ နယ်မြေဒေသအလိုက်၊ ဇုန်အလိုက်ဖွံ့ဖြိုးတိုးတက်မှု အခြေအနေများကို လည်းကောင်း၊ အခြေပြုပြီး အဆင့်ဆင့်အကောင်အထည်ဖော် ဆောင်ရွက်သွားမည် ဖြစ်ပါသည်။
ထည့်ဝင်ကြေးများအနေနဲ့ အလုပ်သမား၏ တစ်လအတွင်းရရှိသော လုပ်ခဝင်ငွေအပေါ် အခြေပြု၍ ကျန်းမာရေးနှင့် လူမှုရေးစောင့်ရှောက်မှု အာမခံစနစ်အတွက် အလုပ်ရှင် ၂% ၊ အလုပ်သမား ၂% ၊ အလုပ်တွင် ထိခိုက်မှု အကျိုးခံစားခွင့် အာမခံစနစ်အတွက် အလုပ်သမားမှ ထည့်ဝင်ကြေးပေးဆောင်ရန် မလိုဘဲ အလုပ်ရှင်မှ ၁% နှင့် စုစုပေါင်း အလုပ်ရှင်၊ အလုပ်သမားထည့်ဝင်ကြေး၏ ၅% ကို အလုပ်ရှင်မှ တာဝန်ယူ၍ လစဉ်လဆန်း (၁၅) ရက်အတွင်း သက်ဆိုင်ရာ လူမှုဖူလုံရေးရုံးသို့ ပေးသွင်းရမည်ဖြစ်ပါသည်။
မည်သည့်အကြောင်းကြောင့်မဆို နာမကျန်းဖြစ်သည့်အခါ အခမဲ့ဆေးကုသမှုခံစားခွင့်ရှိသည့်အပြင် အောက်ပါ ငွေကြေးခံစားခွင့်များကိုလည်း ခံစားခွင့်ရှိပါသည်-
(က) ကျန်းမာရေးနှင့် လူမှုရေးစောင့်ရှောက်မှု အာမခံစနစ်
(၁) ဆေးကုသမှုခံစားခွင့်၊
(၂) မကျန်းမာမှု အကျိုးခံစားခွင့်၊
(၃) မီးဖွားမှု အကျိုးခံစားခွင့်၊ မီးဖွားစရိတ်၊
(၄) ကိုယ်ဝန်ပျက်မှုအတွက် ငွေကြေးအကျိုးခံစားခွင့်၊
(၅) တစ်နှစ်အောက် ကလေးမွေးစားမှုအတွက် အကျိုးခံစားခွင့်၊
(၆) ဖခင်ဘဝဖြစ်မှုအကျိုးခံစားခွင့်၊ ဖခင်ဘဝဖြစ်မှုအတွက် မီးဖွားစရိတ်၊
(၇) အာမခံအလုပ်သမား၏ မွေးကင်းစကလေးအား တစ်နှစ်အထိ ဆေးကုသမှုခံယူခွင့်၊
(၈) မည်သည့်အကြောင်းကြောင့်မဆို သေဆုံးခြင်းအတါက် နာရေးစရိတ်၊
(၉) ဆေးဖိုးခရီးစရိတ်များ ပြန်လည်ထုတ်ပေးခြင်း၊
(၁၀) ၂၀၁၂ ခုနှစ်၊ လူမှုဖူလုံရေး ဥပဒေအရ လပေါင်း (၁၈၀)နှင့် အထက် ထည့်ဝင်ကြေး ပေးသွင်းထားပြီးသူများ
ပင်စင်ယူသည့်အခါ ဆေးကုသမှုဆက်လက်ခံယူခွင့်၊
(ခ) အလုပ်တွင်ထိခိုက်မှု အကျိုးခံစားခွင့် အာမခံစနစ်
(၁) ဆေးကုသမှုခံစားခွင့်၊
(၂) ယာယီမသန်မစွမ်းဖြစ်မှု၊ အမြဲတမ်းမသန်မစွမ်းဖြစ်မှုတို့အတွက် ငွေကြေးအကျိုးခံစားခွင့်၊
(၃) အလုပ်တွင်ထိခိုက်မှုကြောင့် သေဆုံးမှုအတွက် ကျန်ရစ်သူ ငွေကြေး အကျိုးခံစားခွင့်၊
အလုပ်ရှင်က မိမိလုပ်ငန်းဌာနမှ အလုပ်သမားများအား လူမှုဖူလုံရေးအဖွဲ့တွင် မှတ်ပုံတင်ပြီးသည်နှင့် ထည့်ဝင်ကြေးကာလအပိုင်းအခြား သတ်မှတ်ချက်မရှိသော်လည်း ဆေးကုသမှုခံစားခွင့်၊ ယာယီမသန်စွမ်းမှုအကျိုး ခံစားခွင့်၊ အမြဲတမ်းမသန်းစွမ်းမှုအကျိုးခံစားခွင့်၊ အလုပ်တွင်ထိခိုက်မှုကြောင့် သေဆုံးရခြင်းအတွက် ကျန်ရစ်သူ အကျိုးခံစားခွင့်၊ မည့်သည့် အကြောင်းကြောင့်မဆို သေဆုံးခြင်းအတွက် နာရေးစရိတ်တို့ကို ခံစားခွင့်ရှိမည် ဖြစ်ပါသည်။
မှတ်ပုံတင်ကာလ ၆ လ အတွင်း ထည့်ဝင်ကြေးပေးသွင်းသည့်ကာလ ၄ လ ရှိပါက မကျန်းမာမှု ငွေကြေးအကျိုး ခံစားခွင့်ကို ရရှိမှာ ဖြစ်ပါသည်။
မှတ်ပုံတင်ကာက ၁၂ လအတွင်း ထည့်ဝင်ကြေးပေးသွင်းသည့်ကာလ ၆ လ ရှိပါက မီးဖွားမှု အကျိုးခံစားခွင့်တွေ ဖြစ်တဲ့ မီးဖွားမှုအကျိုးခံစားခွင့်၊ မီးဖွားစရိတ်၊ ဖခင်ဘဝဖြစ်မှု အကျိုးခံစားခွင့်၊ ဖခင်ဘဝဖြစ်မှု အတွက် မီးဖွားစရိတ်၊ အာမခံထားသူအမျိုးသမီး၏ မွေးကင်းစကလေးအား ဆေးကုသမှုခံယူခွင့်နှင့် အာမခံထားသူ အမျိုးသမီးများ၏ တစ်နှေစ်အောက် ကလေးမွေးစားမှုအတွက် အကျိုးခံစားခွင့်တို့ကို ရရှိမှာ ဖြစ်ပါသည်။
၂၀၁၂ ခုနှစ် ဥပဒေအရ ထည့်ဝင်ကြေးပေးသွင်းသည့်ကာလ လပေါင်း (၁၈၀) ကျော်ပါက အငြိမ်းစားယူပြီးနောက် ဆေးကုသမှု ဆက်လက်ခံစားခွင့်ကို အငြိမ်းစားဆေးကုသမှုဆိုင်ရာ ကန့်သတ်ချက်များနှင့်အညီ လူမှုဖူလုံရေးအဖွဲ့မှ ဆေးကုသမှုကုန်ကျစရိတ်၏ ၅၀ ကို ကျခံပေးမှာ ဖြစ်ပါသည်။
အာမခံအလုပ်သမားများ မကျန်းမာမှု၊ ကိုယ်ဝန်ဆောင်မှု၊ မီးဖွားမှုနှင့် အလုပ်တွင် ထိခိုက်မှုတို့ကြောင့် ဆေးကုသမှုခံယူရန် လိုအပ်ချိန်များတွင် လူမှုဖူလုံရေးဆေးခန်းများ၊ ဆေးရုံကြီးများ၍ အခမဲ့ ဆေးကုသမှုခံယူခွင့်ရှိပါ သည်။ ကျန်းမာရေးစောင့်ရှောက်မှုလုပ်ငန်းများကို ပိုမိုထိရောက်စွာ ဆောင်ရွက်နိုင်ရန်အတွက် အောက်ဖော်ပြပါ အစီ အစဉ်များအတိုင်း စီမံဆောင်ရွက်လျက်ရှိပါသည်-
(က) အာမခံအလုပ်သမားများ အလွယ်တကူဆေးကုသမှုခံယူနိုင်ရေးအတွက် ပုဂ္ဂလိကဆေးရုံ၊ ဆေးခန်းများနှင့်
စာချုပ်ချုပ်ဆို၍ ကျန်းမာရေးစောင့်ရှောက်မှုပေးခြင်း၊
(ခ ) ထို့အပြင် အာမခံအလုပ်သမားများ လုပ်ငန်းခွင်မပျက် ဆေးကုသသမှုခံယူနိုင်ရေးအတွက် Mobile Medical
Unit ဖြင့် အလုပ်ဌာနများအရောက် ကွင်းဆင်း ဆေးကုသပေးခြင်း၊
(ဂ ) တိုင်းရင်းဆေးဖြင့် ဆေးကုသမှုခံယူလိုသော အာမခံအလုပ်သမားများအတွက် တိုင်းရင်းဆေးခန်း (၁)ခန်းအား
ဖွင့်လှစ်ပေးထားခြင်း။
အကယ်၍ အရေးပေါ်ကိစ္စများ ပေါ်ပေါက်လာပါက သက်ဆိုင်ရာမြို့နယ် ပြည့်သူ့ဆေးရုံကြီးများတွင် ပြသ၍ ဆေးဝါးကုသမှုခံယူနိုင်ပါသည်။ ပြည်သူ့ဆေးရုံကြီးများသို့ တက်ရောက်ကုသရခြင်းကြောင့် ကုန်ကျခဲ့သည့် ဆေးဘိုး ကုန်ကျငွေများကိုလည်း ပြန်လည်ထုတ်ပေးလျက်ရှိပါသည်။ ထို့အပြင် အာမခံအလုပ်မသားများ ဆေးရုံတက်ကုသ ရသည့် အခါ မိမိနေထိုင်ရာဒေသမှ အလုပ်သမားဆေးရုံကြီးသို့ သွားရောက်ရသည့် ဆေးကုသမှု ခရီးစရိတ်ကို အများ ပြည်သူသုံးယာဉ်စီးခနှုန်းထားများဖြစ့် တွက်ချက်၍ ပြန်လည်ထုတ်ပေးလျက်ရှိပါသည်။
အာမခံအလုပ်သမားတစ်ဦးသည် မကျန်းမာမှုဖြစ်ပေါ်သည့်အခါ ဆေးကုသမှုခံယူရန်အတွက် လူမှုဖူလုံရေးအဖွဲ့တွင် မှတ်ပုံတင်ပြီးသည်နှင့် ဆေးကုသမှုခံယူခွင့်ရှိသည့်အပြင် အကျိုးခံစားခွင့်အဖြစ် ရောဂါတစ်မျိုးအတွက် အများဆုံးရက်သတ္တပတ်( ၂၆)ပတ် အထိ ခံစားခွင့်ရရှိမှာ ဖြစ်ပါသည်။ မှတ်ပုံတင်ကာ (၆)လအတွင်း ထည့်ဝင်ကြေး အနည်းဆုံး (၄)လ ပေးသွင်းထားပါက ဆေးကုသမှုခံစားနေရပြီး အလုပ်မဆင်းနိုင်သည့် ကာလများအတွက် လွန်ခဲ့သော (၄)လအတွင်း ရရှိခဲ့သည့် ပျမ်းမျှလုပ်ခ၏ ၆၀% ကို ငွေကြေးအကျိုးခံစားခွင့်အဖြစ် ခွင့်ပြုထုတ်ပေးလျက်ရှိပါသည်။
(က) မကျန်းမာမှုဖြစ်လျှင် သက်ဆိုင်ရာ လူမှုဖူလုံရေးဆေးပေးခန်းခန်းသို့ သွားရောက် ကုသမျုခံယူနိုင်ပြီး အနားယူရန် လိုအပ်လျှင် ဆရာဝန်က ဆေးလျှင် ဆရာဝန်က ဆေးလက်မှတ်ဖြင့် ဆေးခွင့်ပေးပါမည်။
(ခ) လူမှုဖူလုံရေးဆေးခန်း၏ ဆေကကုသမှုဖြင့် မလုံလေက်သော ဆေးကုသမှုများအတွက် အလုပ်သမားဆေးရုံကြီး (သို့မဟုတ်) နီးစပ်ရာ ပြည်သူ့ဆေးရုံကြီးများး သို့ ဆေးစာနှင့်တကွ လွှဲပြောင်းပေးပို့ပါမည်။
(ဂ) အလုပ်မဆင်းနိုင်သည့်အတွက် ဆေးခွင့်ယူရန် တစ်ပတ်အတွင်း သက်ဆိုင်ရာ လူမှုဖူရေး ဆေးခန်းသို့ အကြောင်းကြားရမည်။
(ဃ) အကျိုးခံစားခွင့်ရရှိနိုင်ရေးအတွက် ပတသ်စဉ်ဖြစ်စေ၊ ဆေးခွင့်ကာလ ကုန်ဆုံးးသည့်အခါတွင် ဖြစ်စေ လျှောက်ထားနိုင်သည်။
(င) အကျိုးခံစားခွင့် ရရှိနိုင်ရေးအတွက် လိုအပ်သည့် အထောက်အထားများမှာ-
(၁) မကျန်းမာမှုဖြစ်ကြောင်း အလုက်ရှင်ထံမှ အကြောင်းကြားစာပုံစံ
(၂) ဆရာဝန်မှ ဆေးခွင့်ပေးသည့် ဆေးလက်မှတ်ပုံစံ
(၃) ဆေးရုံတက်ရပါက ဆေးရုံတက်ဆင်းလက်မှတ်များ
(၄) လူနာ၏ ကိုယ်တိုင်ရေးလျှောက်လွှာ
(၅) လူမှုဖူလုံရေး အာမခံစိစစ်ရေးကတ်ပြား။
လူမှုဖူလုံရေးအဖွဲ့တွင် အာမခံထားသူ အမျိုးသမီးများသည် မီးဖွားမှုအကျိုးခံစားခွင့်များ ရရှိခံစားနိုင်ရန်အတွက် မီးဖွားခွင့်မယူမီ လူမှုဖူလုံရေးအဖွဲ့၌ အကျုံးဝင်ထားသော မှတ်ပုံတင်ကာလ (၁၂)လ အတွင်း ထည့်ဝင်ကြေးကာလ (၆)လရှိရပါမည်။ လူမှုဖူလုံရေးအဖွဲ့ဆေးရုံ၊ ဆေးခန်းများတွင် လည်းကောင်း၊ လူမှုဖူလုံရေးအဖွဲ့နှင့် သဘောတူ စာချုပ်ချုပ်ထားသည့် ဆေးရုံ၊ ဆေးခန်းများတွင် လည်းကောင်း အခမဲ့ဆေးကုသခွင့်ရှိပါသည်။ မီးမဖွားမီ (၆)ပတ်၊ မီးဖွားပြီး (၈) ပတ်၊ စုစု ပေါင်းမီးဖွားခွင့် (၁၄) ပတ်ပေးပါသည်။ အမြွှာကလေး မွေးပါက နောက်ထပ် (၄) ပတ် ငွေကြေး အကျိုးခံစားခွင့် ပေးပါသည်။ မီးမဖွားမီ လွန်ခဲ့သည့် (၁၂) လအတွင်း အမှန်ရရှိသော ပျမ်းမျှလစာ ဝင်ငွေ ၏ ၇၀% ကို မီးဖွားခွင့်ကာလအတွင်း မီးဖွားမှုငွေကြေးအကျိုးခံစားခွင့်အဖြစ်ပေးပါသည်။ မီးဖွားပြီး မွေးကင်းစကလေးကို တစ်နှစ် အထိ ဆေးကုသမှုခံစားခွင့်ရှိပါသည်။ ကိုယ်ဝန်ဆောင်စဉ် ခွင့်ပြုထားသည့်ဆေးရုံ၊ ဆေးခန်း၌ စမ်းသပ်စစ်ဆေးပြသ နိုင်ရန်အတွက် တစ်ကြိမ်လျှင် တစ်ရက်နှုန်းဖြင့် အများဆုံး(၇) ကြိမ် အထိ လုပ်ခအပြည့်ဖြင့် ကိုယ်ဝန်စောင့်ရှောက်မှု ခံယူခွင့်ရှိပါသည်။
ထို့အပြင် မီးဖွားစရိတ်အဖြစ် လွန်ခဲ့သော (၁၂) လ အတွင်း ပေးသွင်းထားသော ထည့်ဝင်ကြေးကာလများ၏ ပျမ်းမျှတစ်လစာ၏ ၅၀% ကို ကလေးတစ်ဦးအတွက် မီးဖွားစရိတ်အဖြစ် ခံစားခွင့်ရှိပြီး အမြွှာကလေးနှစ်ဦးမွေးလျှင် ၇၅%၊ အမြွာကလေး သုံးဦးနှင့် အထက်မွေးလျှင် ၁၀၀% ခံစားခွင့်ရှိပါသည်။ ကိုယ်ဝန်ပျက်မှုဖြစ်ပေါ်ခဲ့ပါက ကိုယ်ဝန်ပျက်သည့်နေ့မှ မီးဖွားခွင့်အဖြစ် (၆) ပတ် ကို ဆေးကုသမှု ခံယူခွင့်နှင့် ငွေကြေးခံစားခွင့်ရှိသည်။ လွန်ခဲ့သည့် (၁၂)လ အတွင်း အမှန်ရရှိသောပျမ်းမျှလစာဝင်ငွေ၏ ၇၀% ကို ခံစားခွင့်ပေးပါသည်။
အာမခံထားသူအမျိုးသမီးသည် တစ်နှစ်အောက် ကလေးမွေးစားပါက လွန်ခဲ့သည့် (၁၂) လအတွင်း အမှန်ရရှိသော ပျှမ်းမျှလစာဝင်ငွေ၏ ၇၀% ဖြင့် စတင်မွေးစားသည့်နေ့မှ ကလေးတစ်နှစ်ပြည့်သည့် နေ့တွင်ဖြစ်စေ၊ ရက်သတ္တ (၈) ပတ် ပြည့်သည့်နေ့တွင်ဖြစ်စေ စောရာနေ့ရက်တွင် ခွင့်ကာလကို ရပ်ဆိုင်းရမည်။ တစ်နှစ်အောက်ကလေးမွေးစားမှုဆိုင် ရာခွင့်ကို တစ်ကြိမ်သာ ခံစားခွင့်ရှိပါသည်။ ကိုယ်ဝန်ဆောင်ခြင်းနှင့် မီးဖွားခြင်းများ ဖြစ်ပေါ်သည့်အခါ လူမှုဖူလုံရေးအဖွဲ့ နှင့် စာချုပ်ချုပ်ဆိုဆောင်ရွက်သော စာချုပ်ဆေးရုံ/ သားဖွားခန်း (၉)ခန်းတွင် မွေးဖွား နိုင်သကဲ့သို့ ပြည်သူ့ဆေးရုံကြီးများ၊ ပုဂ္ဂလိကဆေးရုံ၊ ဆေးခန်းများတွင် မွေးဖွားသည့် အာမခံထားသူ အမျိုးသမီးများ အတွက် လူမှုဖူလုံရေးအဖွဲ့မှ သတ်မှတ် ထားသည့်နှုန်းထားများအတိုင်း ပေးအမ်း ဆောင်ရွက်လျက်ရှိပါသည်။ ရိုးရိုးမီးဖွားခြင်းအတွက် ၃၀၀,၀၀ဝိ/- ကျပ်၊ လေစုပ်၊ ညှပ်ဆွဲမီးဖွားခြင်းအတွက် ၃၂၀,၀၀ဝိ/- ကျပ်၊ ခွဲစိတ်မီးဖွားခြင်း အတွက် ၅၅၀,၀၀ဝိ/- ကျပ်၊ ကိုယ်ဝန်ပျက်ခြင်း အတွက် ၂၈၀,၀၀ဝိ/- ကျပ်၊ နေရာလွဲမှား သန္ဓေတည်ခြင်းအတွက် ၅၀၀,၀၀ဝိ/- ခွင့်ပြုပေးလျက်ရှိပါသည်။
အာမခံထားသူ အမျိုးသမီးမီးဖွားသည့်အခါ မီးဖွားမှုအကျိုးခံစားခွင့်နှင့် မီးဖွားစရိတ် များကို သတ်မှတ်ချက်များနှင့်အညီခံစားခွင့်ရှိပါသည်။ လိုအပ်သည့် အထောက်အထားများမှာ အောက်ပါ အတိုင်းဖြစ်ပါသည်-
(က) အလုပ်ရှင်ထံမှ မီးဖွားကြောင်းထောက်ခံသည့် အကြောင်းကြားစာပုံစံ၊
(ခ) သက်ဆိုင်ရာ လူမှုဖူလုံရေးဆရာဝန်မှထုတ်ပေးသည့် မီးမဖွားမီနှင့် မီးဖွားပြီး ဆေးလက်မှတ်ပုံစံ၊
(ဂ) ဆေးရုံ/ ဆေးခန်းကဖြစ်စေ၊ ကျန်းမာရေးဦးစီးဌာနကဖြစ်စေ၊ ဒေသဆိုင်ရာအုပ်ချုပ်ရေး အဖွဲ့အစည်းကဖြစ်စေ ထုတ်ပေးသည့် မီးဖွားကြောင်းသက်သေ အထောက်အထား၊
(ဃ) လူနာ၏ကိုယ်တိုင်ရေးလျှောက်လွှာ၊
(င) လူမှုဖူလုံရေးအာမခံစိစစ်ရေးကတ်ပြားမူရင်း
(စ) ဆေးရုံတက်ရပါက ဆေးရုံတက်ဆင်းလက်မှတ်များ ပူးတွဲတင်ပြရန်၊
အာမခံထားသူ အလုပ်သမား၏ ဇနီးမီးဖွားသည့်အခါ ဖခင်ဘဝဖြစ်မှုခွင့် (၁၅) ရက် ကို လွန်ခဲ့သော (၁၂) လ အတွင်း ပျမ်းမျှ လုပ်ခ၏ ၇၀% နှင့် မီးဖွားစရိတ် ၂၅% မှ ၅၀% ထိ ခံစားခွင့်ရှိပါသည်။ အကယ်၍ ဇနီးနှင့် ခင်ပွန်း (၂) ဦးလုံး အာမခံအလုပ်သမားများဖြစ်ပါက မီးဖွားစရိတ်ကို အမျိုးသမီးအတွက်သာ ခံစားခွင့်ရှိပါသည်။
အာမခံထားသူအမျိုးသား၏ဇနီး မီးဖွားကြောင်းတင်ပြပါက လူမှုဖူလုံရေးအဖွဲ့က အသိအမှတ်ပြုသည့် ဆရာဝန်မှစိစစ်ပြီး ဖခင်ဘဝအကျိုးခံစားခွင့်ဆိုင်ရာ ဆေးသက်သေခံ လက်မှတ်(ဆ-၂)ကို ထုတ်ပေးပါမည်။ ဥပဒေနှင့်အညီခံစားခွင့်ရရှိရေးအတွက် အောက်ပါ စာရွက်စာတမ်းများကို မြို့နယ်လူမှုဖူလုံရေးရုံးသို့ တင်ပြ ရပါမည်-
(က) ဖခင်ဘဝအကျိုးခံစားခွင့်ဆိုင်ရာ ဆေးသက်သေခံလက်မှတ် (ဆ-၂ခ) ၊
(ခ) အိမ်ထောင်စုစာရင်းမိတ္တူ၊
(ဂ) ဇနီးမီးဖွားခဲ့သော ဆေးရုံ/ဆေးခန်းကဖြစ်စေ၊ ကျန်းမာရေးဦးစီးဌာနကဖြစ်စေ၊ ဒေသဆိုင်ရာ အုပ်ချုပ်ရေးအဖွဲ့အစည်းကဖြစ်စေထုတ်ပေးသည့် မီးဖွား ကြောင်း သက်သေအထောက်အထား၊
(ဃ) အာမခံထားသူ၏ ဇနီးမီးဖွားကြောင်း အလုပ်ရှင်၏ထောက်ခံချက်၊
အာမခံအလုပ်သမားတစ်ဦးသည် မှတ်ပုံတင်ပြီးထည့်ဝင်ကြေး မပေးသွင်းပေးနိုင်မီ သေဆုံးပါက မှတ်ပုံတင်စဉ် တင်ပြထားသည့် လစာ၏ တစ်ဆ၊ ထည့်ဝင်ကြေးပေးသွင်း ပြီးပါက ထည့်ဝင်ကြေးကာလ အပေါ်မူတည်ပြီး တိုးမြှင့်ခံစားခွင့်ရှိသည်။ ထည့်ဝင်ကြေးကို (၆)နှစ် နှင့်အထက် ပေးသွင်းပြီးထားပါက နောက်ဆုံး (၄) လ ပျမ်းမျှ လုပ်ခဝင်ငွေ၏ အများ ဆုံး ၅ ဆ ခံစားခွင့်ရှိသည်။ သို့ရာတွင် နောက်ဆုံး (၄)လ အတွင်း (၃)လသာ ထည့်ဝင်ကြေးရှိပါက အဆိုပါ (၃)လ ၏ ပျမ်းမျှလုပ်ခဝင်ငွေဖြင့်သာ ခံစားခွင့်ရှိသည်။ အကယ်၍ နောက်ဆုံး ၄ လသည် ဆေးခွင့်/ဆေးရုံတက်ကာလဖြစ်ပါက နောက်ဆုံးပေးသွင်းထားသော လစာဖြင့်သာ ခံစားခွင့်ရှိသည်။
အာမခံအလုပ်သမားများ မည်သည့်အကြောင်းကြောင့်မဆို သေဆုံးလျှင် သက်ဆိုင်ရာလူမှုဖူလုံရေးရုံးတွင် အောက်ပါ အထောက်အထားများနှင့်တကွ နာရေးစရိတ် လျှောက်ထား ခွင့်ရှိပါသည်-
(က) မိမိအလုပ်သမားသေဆုံးသည်မှာ မှန်ကန်ကြောင်းအလုပ်ရှင်၏ ထောက်ခံစာ၊
(ခ) ကျန်ရစ်သူမိသားစု၏ နာရေးစရိတ်လျှောက်လွှာ၊
(ဂ) တာဝန်ခံဆရာဝန်မှ ထုတ်ပေးသည့် ဆေးလက်မှတ် သေစာရင်းပုံစံ၊
(ဃ) သေဆုံးမှုလက်မှတ် (သို့) ရပ်ကွက်ထောက်ခံစာ၊
(င) နာရေးစရိတ်ထုတ်ယူသူမှာ မိသားစုဝင်ဖြစ်ကြောင်း(သို့မဟုတ်) နာရေးကိစ္စကို တာဝန်ယူဆောင်ရွက်ခဲ့သူ ဖြစ်ကြောင်း ခိုင်လုံသည့်အထောက်အထား၊
အာမခံထားသူများ အငြိမ်းစားယူပြီးနောက် ဆေးကုသမှုဆက်လက်ခံယူခွင့် ရရှိရန်အတွက် နည်းဥပဒေ ၁၀၂ (ဂ) အရ ထည့်ဝင်ကြေးကာလ လပေါင်း(၁၈၀) နှင့် အထက်ပေးသွင်းထားရပါမည်။ ဆေးကုသမှုဆက်လက် ခံယူနိုင်ရေးအတွက် အငြိမ်းစားစိစစ်ရေး သက်သေခံလက်မှတ်ကို ကိုင်ဆောင်ထားရမည်ဖြစ်ပြီး ထိုလက်မှတ် ရရှိနိုင်ရေးအတွက် မိမိအား အငြိမ်းစားယူခွင့်ပြုသော ဌာနဆိုင်ရာရုံးအမိန့်စာနှင့် ပင်စင်ကတ်တို့ကို တင်ပြလျှက် သက်ဆိုင်ရာလူမှုဖူလုံရေးရုံးတွင် အငြိမ်းစားစိစစ်ရေးသက်သေခံလက်မှတ်ကို အငြိမ်းစားယူသည့်နေ့မှ တစ်နှစ်အတွင်းလျှောက်ထားနိုင်သည်။
ဆေးစတင်ကုသည့်နေ့မှ (၂၆) ပတ်အထိသာ ဆေးကုသမှုခံယူခွင့်ရှိသည်။ အငြိမ်းစားယူပြီးနောက် ဆေးကုသမှု အတွက် နည်းဥပဒေ (၁၀၄) နှင့်အညီ ဆေးကုသမှုကုန်ကျ စရိတ်၏ ၅၀% ကို လူမှုဖူလုံရေးအဖွဲ့မှ ကျခံမည် ဖြစ်ပါသည်။
နည်း-၁၃၂ (က) အရ ကျန်းမာရေးနှင့် လူမှုရေးစောင့်ရှောက်မှု အာမခံစနစ် ရန်ပုံငွေသို့ ပညာသင်နှစ် မစတင်မီ နှင့် သဘာဝဘေးအန္တရာယ်မကြုံတွေ့မီ ထည့်ဝင်ကြေးအနည်းဆုံး (၃၆) လ ပေးသွင်းထားသူမှသာ အောက်ပါ အကျိုးခံစားခွင့်များကို ခံစားခွင့်ရှိပါသည်-
(က) သားသမီး ပညာသင်စရိတ်။ နောက်ဆုံး (၁၂) လ အတွင်း ရရှိခဲ့သော ပျမ်းမျှ လုပ်ခတစ်လစာ၏ ၁၀% ကို ကလေးတစ်ဦးအတွက် တစ်နှစ်စာ ပညာသင် စရိတ်ခံစားခွင့် ရှိပါသည်။
(ခ) သဘာဝဘေးအန္တရာယ်ကြုံတွေ့ရသည့်အခါခံစားခွင့်။ တစ်နှစ်အတွင်းရရှိခဲ့သော ပျမ်းမျှလုပ်ခ တစ်လစာ ၏ ၄၀ % အပြင် အဖွဲ့ကသတ်မှတ်ပေးသော ကယ်ဆယ်ရေးပစ္စည်းများ ခံစားခွင့်ရှိပါသည်။
လူမှုဖူလုံရေးအဖွဲ့တွင် အာမခံထားသူ အလုပ်သမားတစ်ဦးသည် အလုပ်ခွင်အတွင်းနှင့်အလုပ်ခွင်ပြင်ပတွင် အလုပ် ကိုအကြောင်းပြု၍ဖြစ်စေ၊ အလုပ်တာ၀န်နှင့် ဆက်စပ်၍ ဖြစ်စေ၊ အလုပ်ရှင်၏အကျိုးငှာ အခြားလုပ်ငန်း များ ဆောင်ရွက်ရာတွင်ဖြစ်စေ၊ အလုပ်တာ၀န်ထမ်းဆောင်ရန် အလုပ်ခွင်သို့အသွား သို့မဟုတ် အလုပ်ခွင်မှ အပြန် လမ်းခရီးတွင်ဖြစ်စေဖြစ်ပေါ်သော မတော်တဆထိခိုက်ဒဏ်ရာရရှိမှု၊ သေဆုံးမှု သို့မဟုတ် အလုပ်နှင့် ဆိုင်သည့် ရောဂါရရှိမှုကိုဆိုသည်။ (လုပ်ငန်းခွင်ဘေးအန္တရာယ် ကင်းရှင်းရေးနှင့်စပ်လျဉ်းသည့် အမိန့်နှင့် ညွှန်ကြားချက်များ၊ စည်းမျဉ်းစည်းကမ်းများကို လိုက်နာရန်ပျက်ကွက်ခြင်း၊ ဘေးအန္တရာယ်အကာအကွယ်၊ အတားအဆီးပစ္စည်း ကိရိယာများကိုဖယ်ရှားခြင်း (သို့မဟုတ်) အသုံးမပြုခြင်းကြောင့်လည်းကောင်း၊ အရက်သေစာ သောက်စားမှု၊ မူးယစ်ဆေးဝါးသုံးစွဲမှုတို့ကြောင့်သော်လည်းကောင်းရရှိသည့် ထိခိုက်မှုဒဏ်ရာရခြင်း၊ သေဆုံးခြင်း တို့မပါဝင်ပါ။) (ဥပဒေပုဒ်မ ၂ ပုဒ်မခွဲ-စ)
အလုပ်တွင်ထိခိုက်မှုဖြစ်ပွားပါက ဒဏ်ရာပျောက်ကင်းသည်အထိ ဆေးကုသမှုအကျိုးခံစားခွင့်၊ ယာယီမသန်စွမ်း မှုနှင့်ဆိုင်သည့် ငွေကြေးအကျိုးခံစားခွင့်၊ အမြဲတမ်းမသန်စွမ်းမှုနှင့်ဆိုင်သည့် အကျိုးခံစားခွင့်၊ အလုပ်တွင် ထိခိုက်မှုကြောင့် သေဆုံးသွားပါက ကျန်ရစ်သူမိသားစုအတွက် အကျိုးခံစားခွင့်များကို ခံစားခွင့်ရှိမှာဖြစ်ပါသည်။
လူမှုဖူလုံရေးအဖွဲ့တွင် အာမခံထားသူ အလုပ်သမားတစ်ဦး ယာယီမသန်စွမ်းမှု ဖြစ်ပွားပါကဒဏ်ရာ ပျောက်ကင်း သည်အထိ ဆေးကုသမှုအကျိုးခံစားခွင့်ရှိသည့်အပြင် အလုပ်တွင်ထိခိုက်မှုမဖြစ်မီ လေးလအတွင်း ပျမ်းမျှလုပ်ခ၏ ၇၀% ကို အများဆုံး (၁၂) လ အထိ ခံစားခွင့် ရှိသည်။ အလုပ်တွင်ထိခိုက်မှုအကျိုးခံစားခွင့်ကို မှတ်ပုံတင် ပြီးပါက ထည့်ဝင်ကြေးကာလ အပိုင်းအခြားသတ်မှတ်ချက်မရှိဘဲ ခံစားခွင့်ရှိသည်။ ယာယီမသန်စွမ်းမှု အကျိုးခံစားခွင့်ကို ဆေးသက်သေခံလက်မှတ်အရ အလုပ်မလုပ်နိုင်သည့် ကာလကုန်ဆုံးသည့်နေ့မှစ၍ (၃)လအတွင်း တောင်းဆိုရမည်။ အလုပ်တွင်ထိခိုက်မှုဖြစ်ပေါ်သည့်နေ့မှစ၍ အရစ်ကျဖြင့် ရက်သတ္တပတ် ကုန်ဆုံးသည့်အခါဖြစ်စေ၊ ဆေးသက်သေခံလက်မှတ်အရ ယာယီမသန် စွမ်းမှုကာလပြီးဆုံးသည့် အခါဖြစ်စေ အလုပ်မလုပ်နိုင်သည့်နေ့ အသီးသီး အတွက် ရထိုက် ခွင့်ရှိသောငွေကို လူမှုဖူလုံရေးအဖွဲ့မှပေးရမည်။
အလုပ်တွင်ထိခိုက်ပြီး ယာယီမသန်စွမ်းမှုဖြစ်၍ အလုပ်မလုပ်နိုင်လျှင် ယာယီမသန်စွမ်းမှုအကျိုးခံစားခွင့်ကို သတ်မှတ်ချက်နှင့်အညီ ခံစားခွင့်ရရှိရေးအတွက် အောက်ပါအထောက်အထားနှင့်တကွတင်ပြရန် လိုအပ်ပါသည်-
(က) အလုပ်ရှင်၏ အကြောင်းကြားစာ၊
(ခ) ရုံးခွဲတာဝန်ခံ၊ စစ်ဆေးရေးမှူး၊ ဆေးဘက်ဆိုင်ရာတာဝန်ရှိသူနှင့် လိုအပ်လျှင် အလုပ်ရုံနှင့်အလုပ်သမား ဥပဒေစစ်ဆေးရေးဦးစီးဌာနမှ တာဝန်ရှိသူတို့၏ အလုပ်တွင်ထိခိုက်မှုဖြစ်သည်ကို စစ်ဆေးအတည်ပြု ထားသည့် အတည်ပြုချက်၊
(ဂ) ယာယီမသန်စွမ်းမှု အကျိုးခံစားခွင့်တောင်းဆိုလွှာ၊
(ဃ) သက်ဆိုင်ရာဆရာဝန်မှ ဆေးကုသမှုပေးထားသည့် ယာယီမသန်စွမ်းမှု ဆေးလက်မှတ်။
လူမှုဖူလုံရေးအဖွဲ့တွင် အာမခံထားသူ အလုပ်သမားတစ်ဦး အမြဲတမ်းမသန်စွမ်းမှုဖြစ်ပွားပါက ဒဏ်ရာ ပျောက်ကင်း သည်အထိ ဆေးကုသမှုအကျိုးခံစားခွင့်ရှိသည့်အပြင် အလုပ်တွင် ထိခိုက်မှုမဖြစ်မီ လေးလအတွင်း ပျမ်းမျှလုပ်ခ၏ ၇၀% ကို အခြေပြု၍ အမြဲ တမ်း လုပ်အားဆုံးရှုံးမှုရာခိုင်နှုန်း သတ်မှတ်ချက်အရ-
(က) လုပ်အားဆုံးရှုံးမှု ၂၀% နှင့်အောက်ဖြစ်ပါက (၅)နှစ်နှင့် ညီမျှသော ငွေကြေးခံစားခွင့်၊
(ခ) လုပ်အားဆုံးရှုံးမှု ၂၀% အထက်မှ ၇၅% ထိ ဖြစ်ပါက လစဉ်ပင်စင် သို့မဟုတ် (၇)နှစ်နှင့်ညီမျှသော ငွေကြေးခံစားခွင့်၊
(ဂ) လုပ်အားဆုံးရှုံးမှု ၇၅% အထက်ဖြစ်ပါက လစဉ်ပင်စင် သို့မဟုတ် (၉) နှစ်နှင့် ညီမျှသောငွေကြေးခံစားခွင့်၊
(ဃ) အမြဲတမ်းမသန်စွမ်းမှုကြောင့် အခြားသူတစ်ဦးတစ်ယောက် အမြဲမပြတ်ပြုစုရန်လိုအပ်ပါက ၁၀% နှုန်း ထပ်ပေါင်း၍ ခံစားခွင့်ရှိပါသည်။
အလုပ်တွင်ထိခိုက်ပြီး အလုပ်လုပ်နိုင်သည့် အင်အားတစ်စိတ်တစ်ဒေသဖြစ်စေ၊ လုံးဝဖြစ်စေ ဆုံးရှုံးခဲ့လျှင် အမြဲတမ်းမသန်စွမ်းမှု အကျိုးခံစားခွင့်ကို သတ်မှတ်ချက်နှင့်အညီ ခံစားခွင့်ရရှိရေးအတွက် အောက်ပါအထောက် အထားများဖြင့်တင်ပြရပါမည်-
(က) အလုပ်တွင်ထိခိုက်မှုကြောင့်ဖြစ်ပေါ်သည့် အမြဲတမ်းမသန်စွမ်းမှု မှန်ကန်ကြောင်း ရုံးခွဲတာဝန်ခံ၊ စစ်ဆေး ရေးမှူး၊ ဆေးဘက်ဆိုင်ရာတာဝန်ရှိသူတို့က စစ်ဆေးအတည်ပြုထားသည့် အတည်ပြုချက်၊
(ခ) လိုအပ်လျှင် အလုပ်ရုံနှင့်အလုပ်သမားဥပဒေစစ်ဆေးရေးဦးစီးဌာနမှ တာဝန်ရှိသူတို့၏ အလုပ်တွင် ထိခိုက်မှုဖြစ်သည်ကို စစ်ဆေးအတည်ပြုထားသည့် အတည်ပြုချက်၊
(ဂ) အမြဲတမ်းမသန်စွမ်းမှုအကျိုးခံစားခွင့် တောင်းဆိုလွှာ၊
(ဃ) ဆရာဝန်၏ နောက်ဆုံးဆေးခွင့်ပေးထားသည့် ဆေးစာ၊
(င) လူမှုဖူလုံရေးဆေးဘက်ဆိုင်ရာခုံအဖွဲ့၏ လုပ်အားဆုံးရှုံးမှု တန်ဖိုးဖြတ် ရာခိုင်နှုန်းသက်သေခံလက်မှတ်။
အလုပ်တွင်ထိခိုက်မှုကြောင့် သေဆုံးသည့်အခါ အာမခံထားသူ အလုပ်တွင်ထိခိုက်မှုမဖြစ်မီ ပေးသွင်းခဲ့သော (၄) လ အတွင်း ရရှိသည့် ပျှမ်းမျှလုပ်ခအပေါ်မူတည်၍ ဥပဒေပုဒ်မ ၆၂ နှင့်အညီ အောက်ပါအတိုင်း ခံစားခွင့်ရှိပါသည်-
(က) ထည့်ဝင်ကြေးငွေကို (၅) နှစ်နှင့် အောက်ပေးသွင်းထားပါက ပျမ်းမျှလုပ်ခ၏ ၃၀ဆ၊ (ဥပဒေကို အကောင် အထည်ဖော်ပြီး ၅ နှစ် ထိ)၊
(ခ) ထည့်ဝင်ကြေးငွေကို (၅) နှစ်အထက် မှ (၁၀) နှစ်အထိ ပေးသွင်းထားပါက ပျမ်းမျှလုပ်ခ၏ ၅၀ ဆ၊
(ဂ) ထည့်ဝင်ကြေးငွေကို (၁၀) နှစ်အထက်မှ (၂၀) နှစ်အထိ ပေးသွင်းထားပါက ပျမ်းမျှလုပ်ခ၏ ၆၀ဆ၊
(ဃ) ထည့်ဝင်ကြေးငွေကို (၂၀) နှစ်အထက် ပေးသွင်းပြီး ဖြစ်ပါက ပျမ်းမျှလုပ်ခ၏ ၈၀ ဆ။
အာမခံအလုပ်သမားသည် လုပ်ငန်းခွင်ထိခိုက်ဒဏ်ရာရမှုကြောင့် သေဆုံးကြောင်းကို ရုံးခွဲတာဝန်ခံ၊ စစ်ဆေးရေး မှူး၊ ဆေးဘက်ဆိုင်ရာတာဝန်ရှိသူနှင့်လိုအပ်လျှင် အလုပ်ရုံနှင့်အလုပ်သမားဥပဒေစစ်ဆေးရေး ဦးစီးဌာနမှ တာဝန်ရှိသူတို့၏ အတည်ပြုချက်ရရှိပြီးပါက ကျန်ရစ်သူမိသားစုသည် အကျိုးခံစားခွင့်ရရှိနိုင်ရေး အတွက် နည်း ၁၉၈ နှင့်အညီ အောက်ပါအထောက်အထားများနှင့်တကွ တင်ပြရပါမည်-
(က) အလုပ်တွင်ထိခိုက်မှုကြောင့် သေဆုံးခြင်းအတွက် ကျန်ရစ်သူ အကျိုးခံစား ခွင့်တောင်းဆိုလွှာ၊
(ခ) အလုပ်ရှင်၏ ထောက်ခံစာ၊
(ဂ) သေဆုံးသူက မိမိ အား အမည်စာရင်း တင်သွင်းထားကြောင်း ဝန်ခံချက် (သို့မဟုတ်) မိမိသည် အဆိုပါ အကျိုးခံစားခွင့်ကို ရထိုက်သူဖြစ်ကြောင်း အထောက်အထား ၊
(ဃ) သေဆုံးသူ၏ လူမှုဖူလုံရေးအာမခံစိစစ်ရေးကတ်ပြား ၊
(င) လျှောက်ထားသူ၏ နိုင်ငံသားစိစစ်ရေးမိတ္တူ ၊
(စ) လူဝင်မှုကြီးကြပ်ရေးနှင့် အမျိုးသားမှတ်ပုံတင်ရေးဦးစီးဌာနမှ ထုတ်ပေးထားသော အိမ်ထောင်စု စာရင်းမိတ္တူ။
အလုပ်တွင်ထိခိုက်ဒဏ်ရာရမှုကြောင့် အမြဲတမ်းမသန်စွမ်းမှု အကျိုးခံစားခွင့်၊ အလုပ်တွင်ထိခိုက်မှုကြောင့် သေဆုံးခြင်းတို့အတွက် အကျိုးခံစားခွင့်များအားဖြစ်ပွားသည့် နေ့မှတစ်နှစ်အတွင်း တောင်းခံရမည်ဖြစ်ပြီး ကျန်အကျိုးခံစားခွင့်များဖြစ်သည့် မကျန်းမာမှု၊ မီးဖွားမှုနှင့်ဆိုင်သောအကျိုးခံစားခွင့်များ၊ သေဆုံးမှုအကျိုးခံစားခွင့်၊ ယာယီမသန်စွမ်းမှု အကျိုးခံစားခွင့်များအတွက် (၃) လ အတွင်း သက်ဆိုင်ရာ လူမှုဖူလုံရေးအဖွဲ့သို့ အထောက် အထားများ ပူးတွဲလျက် လျှောက်ထားရမည်ဖြစ်ပါသည်။
အလုပ်တွင်ထိခိုက်ဒဏ်ရာရခြင်း၊ သေဆုံးခြင်းဖြစ်ပွားခဲ့လျှင် လူမှုဖူလုံရေးဥပဒေ ပုဒ်မ-၅၄(က)အရ အလုပ်ရှင် သည် မိမိ၏ အာမခံထားသူအလုပ်သမား ပြင်းထန်သည့် မတော်တဆထိခိုက်ဒဏ်ရာရမှုဖြစ်ပွားပါက နည်းဥပဒေ ၁၇၅ (က) အရ အလုပ်တွင်မတော် တဆထိခိုက်ဒဏ်ရာရမှုနှင့်ဆိုင်သည့် အလုပ်ရှင်များ၏ အစီရင်ခံစာ (ပုံစံ-၃၇) (၃) စုံနှင့် အတူ(၂၄)နာရီအတွင်း သက်ဆိုင်ရာ လူမှုဖူလုံရေးရုံးသို့ ချက်ချင်း အကြောင်းကြားရပါမည်။
မိမိကိုယ်မိမိတမင်မမာမကျန်းဖြစ်အောင်ပြုမှုခြင်း၊ ရာဇဝတ်ပြစ်ဒဏ်ထိုက်သည့် မိမိ၏ပြုမူမှုကြောင့် မမာမကျန်း ဖြစ်ခြင်း၊ ဆရာဝန်၏ ညွှန်ကြားချက်များကို လိုက်နာရန် ပျက်ကွက်ခြင်း၊ မကျန်းမာမှု၊ မီးဖွားမှုနှင့် ယာယီ မသန်စွမ်းမှုအကျိုးခံစားခွင့် တစ်ခုခု ခံစားနေသော အာမခံထားသူတစ်ဦးဦးသည် အလုပ်မလုပ်နိုင် ကြောင်း ဆေးသက်သေခံလက်မှတ်ထုတ်ပေးထားသည့် လုပ်ငန်းဌာနတွင်ဖြစ်စေ၊ အခြားလုပ်ငန်းဌာန တစ်ခုခုတွင်ဖြစ်စေ လုပ်ခဖြင့်ဝင်ရောက်လုပ်ကိုင်နေလျှင် ထိုသူအား အဆိုပါအကျိုးခံစားခွင့်များကို ရပ်ဆိုင်းရပါမည်။
ဥပဒေ ပုဒ်မ ၆၉ အရ လူမှုဖူလုံရေးအဖွဲ့တွင် မှတ်ပုံတင်ပြီးသော အလုပ်ရှင်ကသော် လည်းကောင်း၊ မှတ်ပုံတင်ရန် တာ၀န်ရှိသောအလုပ်ရှင်ကသော်လည်းကောင်း မိမိ၏ အလုပ်သမားအတွက် ထည့်ဝင်ကြေးငွေများ ပေးသွင်းခြင်းမပြုစေကာမူ သို့မဟုတ် အလုပ်သမား၏လုပ်ခထဲမှ ထည့်ဝင်ကြေးငွေကို နုတ်ယူပေးသွင်း ခြင်းမပြုစေကာမူ အာမခံထား သူသည်လည်းကောင်း၊ အာမခံထားသူသေဆုံးပြီးနောက် ထိုသူက အမည်စာရင်း ပေးသွင်းခြင်းခံရသူ သို့မဟုတ် ထိုသို့ အမည်စာရင်းပေးသွင်းခြင်းမရှိခဲ့လျှင် ထိုသူအား မှီခိုသူသည် လည်းကောင်း ဤဥပဒေပါ အကျိုး ခံ၁စားခွင့်များကို ရထိုက်ခွင့်ရှိနိုင်ပါသည်။ ထည့်၀င်ကြေး ငွေပေးသွင်းရန် ပျက်ကွက်သည့် အလုပ်ရှင်သည် ပေးသွင်းရမည့် ထည့်၀င်ကြေးငွေများနှင့်ပျက်ကွက်ကြေးကိုပါ ပေးသွင်း ရမည့်အပြင် အာမခံထားသူအား လူမှုဖူလုံရေးအဖွဲ့က ပေးရမည့်အကျိုးခံစားခွင့်များနှင့် ကုန်ကျစရိတ်အားလုံးကိုလည်း ကျခံရမည်။
၂၀၁၂ ခုနှစ်၊ လူမှုဖူလုံရေးဥပဒေတွင် မဝင်မနေရဟု ပြဋ္ဌာန်းချက်နှင့် သက်ဆိုင်သည့် အလုပ်သမားများသည် ဥပဒေပါခံစားခွင့်များကို ခံစားခွင့်ရှိသကဲ့သို့ မဝင်မနေရဟု ပြဋ္ဌာန်းချက်နှင့်သက်ဆိုင်ခြင်းမရှိသည့် အလုပ်ဌာန များရှိ အလုပ်သမားများ၊ အလုပ်ရှင်အတည် တကျမရှိသော အလုပ်သမားများ၊ ပျံကျဈေးသည်များ၊ တောင်သူ လယ်သမား များမှစ၍ ကျောင်းသူ၊ ကျောင်းသားအဆုံး ပြည်သူပြည်သားအားလုံးသည် မိမိတို့ဆန္ဒအလျောက် အလုပ်ရှင်၊ အလုပ်သမားထည့်ဝင်ကြေးများပေးသွင်း၍ အာမခံထားရှိပြီး ဥပဒေပါခံစားခွင့်များကို ခံစားခွင့်ရှိပါသည်။
လူမှုဖူလုံရေး ဥပဒေပုဒ်မ ၄၉ ပုဒ်မခွဲ (က) အရ ဥပဒေနှင့်အညီ မှတ်ပုံတင်ထားသူ အလုပ်ရှင်သည် မိမိတို့အလုပ် သမား အလုပ်တွင်ထိခိုက်မှုဖြစ်သည့်အခါ အလုပ်သမားလျော်ကြေး ဥပဒေပါ ပြဋ္ဌာန်းချက်များနှင့် ကင်းလွတ်ခွင့်ရှိပါသည်။
အကျိုးခံစားခွင့်နှစ်မျိုး တစ်ပြိုင်နက်တည်းပေးရမည့် ကိစ္စဖြစ်ပေါ်လာပါက အကျိုး ခံစားခွင့်များသည့်အကျိုး ခံစားခွင့်ကို ခံစားခွင့်ပေးရပါမည်။ လူမှုဖူလုံရေးဥပဒေ ပုဒ်မ ၆၃ အရ အောက်ပါအကျိုးခံစားခွင့်များအား တစ်ပြိုင်နက်တည်း ခံစားခွင့်မရှိပါ-
(က) မကျန်းမာမှုနှင့်ဆိုင်သည့် အကျိုးခံစားခွင့်နှင့် မီးဖွားမှုနှင့်ဆိုင်သည့် အကျိုး ခံစားခွင့်၊
(ခ) မကျန်းမာမှုနှင့်ဆိုင်သည့်အကျိုးခံစားခွင့်နှင့် ယာယီမသန်စွမ်းမှုနှင့်ဆိုင်သည့် အကျိုးခံစားခွင့်၊
(ဂ) မီးဖွားမှုနှင့်ဆိုင်သည့် အကျိုးခံစားခွင့်နှင့် ယာယီမသန်စွမ်းမှုနှင့်ဆိုင်သည့် အကျိုးခံစားခွင့်၊
(ဃ) မကျန်းမာမှု၊ မီးဖွားမှု၊ ယာယီမသန်စွမ်းမှု အကျိုးခံစားခွင့်များနှင့် အလုပ်လက်မဲ့အကျိုးခံစားခွင့်။
လူမှုဖူလုံရေးစီမံကိန်းသည် အာမခံအလုပ်သမားများ ပုံမှန်ဝင်ငွေရှိသည့်အချိန်တွင် ဥပဒေနှင့်အညီ အလုပ်ရှင်၊ အလုပ်သမား ထည့်ဝင်ကြေးများ ပေးသွင်းထားပြီး ၎င်းအလုပ် သမားများထဲမှ မကျန်းမာမှု၊ မီးဖွားမှု၊ အလုပ်တွင်ထိခိုက်မှု၊ သေဆုံးမှု၊ အသက်အရွယ် ကြီးရင့်မှုတို့ဖြစ်တဲ့အခါ ခံစားခွင့်ပေးတာဖြစ်လို့ ဥပဒေနှင့်အညီ ခံစားခွင့်ရတဲ့အချိန်မှာ ခွင့်ပြုသလို တစ်ချို့ အာမခံအလုပ်သမားတွေအနေနဲ့ ကာလတစ်လျှောက်လုံးမှာ မည်သည့် အကျိုးခံစားခွင့်မျှ ရယူထားခြင်းမရှိသော်လည်း ပင်စင်ယူသည့်အချိန်မှာ ထည့်ဝင်ကြေး လပေါင်း ၁၈၀ လ ပေးသွင်းပြီးပါက ဆေးကုသမှု ဆက်လက်ခံယူခွင့်ကိုရပါတယ်။
တကယ်လို့ အဲဒီအလုပ်သမားက မိမိရဲ့ပင်စင်လစာနဲ့ ဆန္ဒအလျောက် ဆက်လက် အာမခံထားပြီး ထည့်ဝင်ကြေး ပေးသွင်းတယ်ဆိုရင် ကျန်းမာရေးနှင့်လူမှုရေးစနစ်အောက်မှာရှိတဲ့ အကျိုးခံစားခွင့်များ ခံစားခွင့် ရှိမည်ဖြစ်ပြီး သေဆုံးသွားပါကလည်း နာရေးစရိတ် ခံစားခွင့်ရှိပါတယ်။
မိမိဆန္ဒအလျောက် မှတ်ပုံတင်ရမည့် လုပ်ခလစာအနေနဲ့ကတော့ ပင်စင်လစာနဲ့ဖြစ်စေ၊ အနည်းဆုံးလုပ်ခ လစာနဲ့ဖြစ်စေ ဆက်လက်မှတ်ပုံတင်ပြီး ဥပဒေပါခံစားခွင့်တွေကို ခံစားခွင့်ရှိပါတယ်။ ထည့်ဝင်ကြေးအနေနဲ့ ကျန်းမာရေးနှင့် လူမှုရေးစောင့်ရှောက်မှုအာမခံ စနစ်ကို လုပ်ခလစာ ရဲ့ အလုပ်ရှင်၊ အလုပ်သမားထည့်ဝင်ကြေး (၂)ခုလုံးအတွက် ၄ ရာခိုင်နှုန်းကို ပေးသွင်းပြီး ကျန်းမာရေးနှင့်လူမှုရေးစောင့်ရှောက်မှုစနစ်ပါ အကျိုးခံစားခွင့်များ ကိုခံစားခွင့်ရှိပါတယ်။ အာမခံစနစ်ဖြစ်သည့်အတွက် မကျန်းမာမှု၊ မီးဖွားမှုနှင့် အလုပ်တွင် ထိခိုက်မှု ဖြစ်တဲ့အခါ ခံစားခွင့်ရှိပြီး စုပေါင်းအာမခံစနစ်ဖြစ်သည့်အတွက် ထည့်ဝင်ကြေး များကို ပြန်လည်ထုတ်ယူခွင့်မရှိပါ။
၂၀၁၂ ခုနှစ် လူမှုဖူလုံရေးဥပဒေအရ ဆောင်ရွက်ရမည့် အလုပ်ရှင်၏တာဝန်များမှာ-
(က) လူမှုဖူလုံရေးအဖွဲ့နှင့် အကျုံးမဝင်မနေရ ပြဋ္ဌာန်းချက်များနှင့်သက်ဆိုင်သော အလုပ်ရှင်သည် လုပ်ငန်း စတင်လုပ်ကိုင်သည့်နေ့မှ ရက်ပေါင်း (၃၀) အတွင်း သက်ဆိုင်ရာ လူမှုဖူလုံရေးရုံးတွင် မိမိ၏ အလုပ်ဌာနအား မှတ်ပုံတင်ရန် တာဝန်ရှိပါသည်။ (နည်း ၄၀(ခ))
(ခ) အလုပ်ရှင်သည် အလုပ်သမားအသစ်တစ်ဦးခန့်တိုင်း ခန့်အပ်ပြီး (၁၀)ရက် အတွင်း လူမှုဖူလုံရေးရုံးတွင် မှတ်ပုံတင်ရန် တာဝန်ရှိပါသည်။ (နည်း ၄၂(ဂ))
(ဂ) အလုပ်သမားတစ်ဦး ပြောင်းရွှေ့၊ နှုတ်ထွက်၊ သေဆုံးသည့်အခါ သက်ဆိုင်ရာ မြို့နယ်လူမှုဖူလုံရေးရုံးသို့ (၁၀)ရက် အတွင်း အကြောင်းကြားရမည်။ (နည်း ၄၃)
(ဃ) အလုပ်သမား ၅၀ ဦးနှင့်အောက်ရှိသော အလုပ်ဌာနများအနေဖြင့် ထည့်ဝင်ကြေးများပေးသွင်းရာတွင် သတ်မှတ် ထားသော ထည့်ဝင်ကြေးစာရင်း (ပုံစံ-၁၃) တွင် အာမခံထားသူအားလုံးအတွက် အချက်အလက်များအား ပြည့်စုံစွာ ဖြည့်စွက်ခြင်း၊ အလုပ်သမား ၅၀ ဦးအထက် အလုပ်ဌာနများအနေဖြင့် သတ်မှတ်ထားသည့် Contribution Excel File (Soft Copy) တွင် အာမခံထားသူ အားလုံး အတွက်အချက်အလက်များအား ပြည့်စုံစွာဖြည့်စွက်၍ သက်ဆိုင်ရာမြို့နယ်လူမှုဖူလုံရေးရုံးသို့ လစဉ် ပေးပို့ရမည်။ (နည်း ၆၆(က))
(င) လစဉ် မိမိအလုပ်သမားများအတွက် လူမှုဖူလုံရေးအဖွဲ့သို့ ပေးသွင်းထားသော ထည့်ဝင်ကြေးစာရင်းအား အလုပ်ဌာနရှိ အလုပ်သမားများမြင်သာ သောနေရာတွင် လစဉ် လစဉ်ကပ်ထားပေးရမည်။ (နည်း ၆၆(ခ))
(စ) အလုပ်တွင် ထိခိုက်ဒဏ်ရာရလျှင် အလုပ်ရှင်သည် (၂၄) နာရီ အတွင်း သက်ဆိုင်ရာရုံးခွဲသို့ အကြောင်းကြားရ ပါမည်။ (နည်း ၁၇၅)
(ဆ) သေဆုံးသည့် အာမခံထားသူ၏ အလုပ်ရှင် (သို့မဟုတ်) ကျန်ရစ်သူသည် ထိုအာမခံထားသူ သေဆုံးသည့်နေ့ (သို့မဟုတ်) ထိုသူသေဆုံးကြောင်း သိရှိသည့်နေ့ရက်မှ ၂၄ နာရီအတွင်း သက်ဆိုင်ရာ မြိုနယ်လူမှုဖူလုံရေးရုံးသို့ အကြောင်းကြားရမည်။ (နည်း ၁၂၇)
(ဇ) ဥပဒေ၊နည်းဥပဒေများနှင့်အညီ မှတ်ပုံတင်ထားပြီးသူ အလုပ်သမားအတွက် အကျိုးခံစားခွင့်များ ရရှိရန်ကိစ္စ ပေါ်ပေါက်လျှင် လူမှုဖူလုံရေးအဖွဲ့မှ တာဝန် ယူမည်ဖြစ်သော်လည်း မှတ်ပုံမတင်ရသေးသည့် အလုပ်သမား အတွက် အဖွဲ့ မှတာဝန်ယူဆောင်ရွက်ပေးမည်မဟုတ်ဘဲ အလုပ်ရှင်ကသာ အကျိုးခံစား ခွင့်အားလုံးအတွက် တာဝန်ယူဆောင်ရွက်ရမည်ဖြစ်ပါသည်။ သို့ပါ၍ အလုပ်သမားတစ်ဦး အသစ် ခန့်တိုင်း လူမှုဖူလုံရေးအဖွဲ့တွင် ချက်ချင်းမှတ်ပုံ တင်ရန် အရေးကြီးပါသည်။
လူမှုဖူလုံရေးအဖွဲ့ရဲ့ လက်ရှိအကောင်အထည်ဖော်နေသော အာမခံစနစ် (၂)မျိုး အရ ကောက်ခံရရှိတဲ့ ထည့်ဝင်ကြေးများကို အလုပ်သမားများ၏ အကျိုးခံစားခွင့်အတွက် ဥပဒေနှင့်အညီ ခွင့်ပြုထုတ်ပေးလျက်ရှိပြီး စီမံခန့်ခွဲမှုကုန်ကျ စရိတ်တွေကိုလည်း ဥပဒေ ပုဒ်မ ၈၂၊ ၈၃ တို့နှင့် အညီသုံးစွဲ၍ စာရင်းစစ် စစ်ဆေးခြင်းကို နှစ်စဉ်ခံယူရပါတယ်။ လူမှုဖူလုံရေးဝန်ထမ်းများ၏လစာကို နိုင်ငံတော်ဘတ်ဂျက်မှ ကျခံခွင့်ပြုပါတယ်။ အသုံးစရိတ် အကုန်လုံးအတွက် ရသုံးမှန်းခြေငွေစာရင်းဌာနသို့ ကြိုတင်ဘတ်ဂျက် လျာထား၍ ခွင့်ပြုချက်နှင့်အညီ သုံးစွဲရတာဖြစ်ပါတယ်။
ဝန်ထမ်းဖြစ်သူက လူမှုဖူလုံရေးထည့်ဝင်မှ မိသားစုက ထည့်ဝင်လို့ရတာ မဟုတ်ပါ ဘူး။ ဥပဒေပုဒ်မ ၁၂၊ ၂၀ တို့အရ လက်လုပ်လက်စား ပြည်သူတွေဟာလည်း လူမှုဖူလုံရေးနဲ့ အကျုံးဝင်မယ်ဆိုရင် ကျန်းမာကြောင်း ထောက်ခံချက်နဲ့အညီ မည်သူမဆို ဆန္ဒအလျောက် အကျုံးဝင်မှတ်ပုံတင်ခွင့်ရှိပါတယ်။ (၁/၂၀၂၃)လ မှာ (၁,၃၃၃) ဦးဟာ အလုပ်ရှင်မရှိဘဲ ကိုယ်ပိုင်အလုပ်လုပ်သူတွေ၊ ပင်စင်သွားသူတွေ အကျုံးဝင်မှတ်ပုံတင် ထားတာဖြစ်ပါတယ်။
တစ်ကြိမ်တစ်ခါမျှ လူမှုဖူလုံရေးတွင် အကျုံးဝင်မှတ်ပုံတင်ခဲ့ခြင်းမရှိသော ဆန္ဒအလျောက် မှတ်ပုံတင်တဲ့သူ တွေဟာမဖြစ်မနေ ကျန်းမာကြောင်းထောက်ခံစာယူဖို့ လိုပါတယ်။ အများစုပေါင်းထည့်ဝင်ထားတဲ့ ထည့်ဝင်ကြေးများနဲ့ ဆေးကုသမှုခံယူခွင့်နှင့် ငွေကြေးအကျိုးခံစားခွင့် ခွင့်ပြုတာဖြစ်တဲ့အတွက် မကျန်းမာတဲ့အခြေအနေမှလာရောက် အာမခံထားပြီး ထည့်ဝင်ကြေးပေးသွင်းတာမျိုးမဖြစ်ရအောင် ဆန္ဒအလျောက်မှတ်ပုံတင်သူ အတွက်ကို ကျန်းမာကြောင်းထောက်ခံစာယူတာ ဖြစ်ပါတယ်။
ဆရာဝန်၊ သူနာပြု၊ လူမှုဖူလုံရေးအဖွဲ့မှ သတ်မှတ်ထားသည့် ဆေးခန်းအကျယ်အဝန်းရှိရမယ်။ အဲဒီပတ်ဝန်းကျင်မှာ လူမှုဖူလုံရေးအဖွဲ့နဲ့ အကျုံးဝင်မှတ်ပုံတင်ထားတဲ့ အလုပ်ဌာန၊ အလုပ်သမားတွေ နေထိုင်ရာနေရာနဲ့နီးရပါမယ်။ အဲဒါဆိုရင် အလုပ်သမား ဦးရေများပြားတဲ့နေရာတွေမှာ ဦးစားပေးအနေနဲ့ စာချုပ်ဆေးခန်းတွေချုပ်ဆိုပြီး အာမခံ အလုပ်သမားတွေကို ပိတ်ရက်မရှိ (နံနက် ၈ နာရီ မှ ည ၈ နာရီအထိ) ဆေးကုသမှုပေးပါတယ်။
ပြည်သူပိုင်ကဏ္ဍရှိ လုပ်ငန်းဌာနများအနေဖြင့် စီးပွားရေးလုပ်ကိုင်သည့် အစိုးရဌာန၊ အစိုးရအဖွဲ့အစည်းနှင့် ဒေသဆိုင်ရာအုပ်ချုပ်ရေး အဖွဲ့အစည်းများသည် မဝင်မနေရ မှတ်ပုံ တင်ရန်လိုအပ်ပြီး မှတ်ပုံမတင်မနေရပြဋ္ဌာန်းချက်နှင့် သက်ဆိုင်ခြင်းမရှိသည့် ဦးစီးဌာနသို့ ပြောင်းသွားခြင်း၊ လူမှုဖူလုံရေးနှင့် အကျုံးမဝင်ရသေးသည့် မြို့နယ်များသို့ ပြောင်းရွှေ့ သွားခြင်းဖြစ်ပါက အာမခံအလုပ်သမားအနေဖြင့် ဆက်လက်အကျုံးဝင်ချင်လျှင် ဝန်ကြီး ဌာနမှတဆင့် အလုပ်ရှင်ထည့်ဝင်ကြေးအတွက် ဘတ်ဂျက်ဆက်လက်တောင်းခံပြီး ခွင့်ပြု ချက်ရရှိပါက ယခင်ပေးသွင်းနေကျ ရုံးခွဲမှတာဝန်ယူပေးသွင်းမယ်ဆိုလျင် ဆက်လက် အကျုံးဝင်နိုင်သလို အကယ်၍ အလုပ်ရှင်ထည့်ဝင်ကြေးအတွက် ခွင့်ပြုရန်ပုံငွေမရရှိပါက မိမိ၏ လုပ်ခလစာဖြင့် ကျန်းမာရေးနှင့်လူမှုရေးစောင့်ရှောက်မှုအာမခံစနစ်သို့ အလုပ်ရှင်နှင့် အလုပ်သမားထည့်ဝင်ကြေးများကိုပေးသွင်းပြီး ဥပဒေပါခံစားခွင့်များကို ဆက်လက်ခံစား ခွင့်ရှိပါတယ်။
ကိုယ်ပိုင်လုပ်ငန်းလုပ်ကိုင်နေသူ မည်သူမဆို လူမှုဖူလုံရေးအဖွဲ့မှ ကျန်းမာကြောင်း ထောက်ခံစာနှင့်အတူ ဆန္ဒအလျောက်မှတ်ပုံတင်လို့ရပါတယ်။ မှတ်ပုံတင်ပြီဆိုပါက မိမိ၏ အဆိုပြုလစာအရ ကျန်းမာရေးနှင့်လူမှုရေးစောင့်ရှောက်မှုအာမခံစနစ်မှာ အလုပ်ရှင် ထည့်ဝင်ကြေး ၂ ရာခိုင်နှုန်းနှင့် အလုပ်သမားထည့်ဝင်ကြေး ၂ ရာခိုင်နှုန်း၊ စုစုပေါင်း ၄ ရာခိုင် နှုန်းကိုပေးသွင်းပြီး ဆေးကုသမှုခံယူခွင့်အပါအဝင် အဆိုပါအာမခံစနစ်မှ ကျန်အကျိုးခံစား ခွင့် (၁၂) မျိုးကို ခံစားခွင့်ရမှာဖြစ်ပါတယ်။
လူမှုဖူလုံရေးဥပဒေပုဒ်မ (၁၂) နှင့် (၂၀) တို့အရ ဥပဒေနှင့်အညီ မှတ်ပုံမတင်မနေရ မှတ်ပုံတင်ရမည့် ဌာနများနှင့် သက်ဆိုင်ခြင်းမရှိသည့် မည်သူမဆို ကျန်းမာကြောင်းဆေး သက်သေခံလက်မှတ်နှင့်အတူ မှတ်ပုံတင်ပြီး အာမခံထားခွင့်ရှိပါတယ်။ အလုပ်လက်မဲ့ဖြစ် နေသူများ မှီခိုမိသားစုများ၊ လက်လုပ်လက်စားပြည်သူများအနေဖြင့် မိမိတို့စားဝတ်နေ ရေးအတွက်ဝင်ငွေအဖြစ် သတ်မှတ်ရမည့် အသုံးစရိတ်မှာ လူမှုဖူလုံရေး နည်းဥပဒေအပိုဒ် ၅၀(ခ)အရ ပြည်နယ်နှင့်တိုင်းဒေသကြီး အစိုးရအားဖြစ်စေ၊ ဒေသအလိုက် ကြေညာထား သော အနိမ့်ဆုံးလုပ်ခဝင်ငွေအောက် မနည်းသည့်လုပ်ခဝင်ငွေအဖြစ်ဖော်ပြ၍ ဆန္ဒအလျောက် ကျန်းမာရေးနှင့်လူမှုရေးစောင့်ရှောက်မှု အာမခံစနစ်သို့ အဆိုပြုငွေ၏ ၄ ရာခိုင်နှုန်းကို ပေး သွင်းပြီး အာမခံထားခွင့်ရှိပါတယ်။
ကိုဗစ်မတိုင်ခင်ကဆို ဥပဒေနှင့်အညီ အကျုံးဝင်မှတ်ပုံတင်ထားသည့် အလုပ်သမား ၁၅ သိန်းထိ ရှိပါတယ်။ ကိုဗစ် ဖြစ်ပြီး ဒီနောက်ပိုင်းမှာ ၃ သိန်းကျော် လျော့သွားတဲ့အတွက် ၁၂ သိန်းကျော်သာ ကျန်ရှိခြင်းဖြစ်ပါတယ်။ လူမှုဖူလုံရေးအဖွဲ့အနေဖြင့် ကန့်သတ်ချက်က လည်း (၃)မျိုးရှိပါတယ်။ ၎င်းတို့မှာ-
(က) အခုဆိုရင် မြို့နယ်(၁၁၉) မြို့နယ်သာ အကျုံးဝင်သေးလို့ နယ်မြေကန့်သတ် ချက်ရှိခြင်း၊
(ခ) အလုပ်သမား (၅)ဦးနှင့်အထက်သာ အကျုံးဝင်သည့်အတွက် အလုပ်သမား ဦးရေ ကန့်သတ်ချက်ရှိခြင်း၊
(ဂ) အကျုံးဝင်နိုင်သည့် လုပ်ငန်းအမျိုးအစား ကန့်သတ်ချက်ရှိခြင်း၊
အကျုံးဝင်အလုပ်သမားဦးရေ တိုးတက်ဖို့အတွက် အကျုံးဝင်နယ်မြေတိုးချဲ့ဖို့ကို လည်းဆောင်ရွက်လျက်ရှိပါတယ်။ အဲဒီအပြင် ဥပဒေပြုပြင်ပြောင်းလဲမှုကိုလုပ်ပြီး လုပ်ငန်း အမျိုးအစားကန့်သတ်ချက်နဲ့ အလုပ်သမားဦးရေကန့်သတ်ချက်တွေကိုလည်း ဖြေလျော့နိုင် ဖို့အတွက် ဆောင်ရွက်လျက်ရှိပါတယ်။
လူမှုဖူလုံရေးဥပဒေနှင့် အကျုံးဝင်တဲ့အစိုးရဝန်ထမ်းများအတွက် အလုပ်ရှင်ထည့်ဝင် ကြေးကို ကြိုတင်လျာထားပြီး ပြည်ထောင်စုရန်ပုံငွေမှ ဘတ်ဂျက်တောင်းခံရပါတယ်။ တိုင်းဒေသကြီး/ပြည်နယ်ရန်ပုံငွေဖြင့် ရပ်တည်နေသည့် အဖွဲ့အစည်းများအနေဖြင့် လုပ်ခ လစာပေးသော တာဝန်ရှိသူသည် အလုပ်ရှင်ဖြစ်သည့်အတွက် အလုပ်ရှင်ထည့်ဝင်ကြေးကို တိုင်းဒေသကြီး/ပြည်နယ် ဘဏ္ဍာရန်ပုံငွေမှ ပေးဆောင်ရမှာဖြစ်ပါတယ်။
လူမှုဖူလုံရေးဥပဒေ၊ နည်းဥပဒေတွေမှာ တရားဝင်ပြဋ္ဌာန်းထားပါတယ်။ အကျုံးဝင်တဲ့ နိုင်ငံပိုင်လုပ်ငန်းမှ အကျူံးမဝင်တဲ့ဦးစီးဌာနကို ပြောင်းသွားလျှင် မိမိဆန္ဒအလျောက် ဆက်လက်အာမခံထားခွင့်ရှိပါတယ်။ ထည့်ဝင်ကြေးကို ဆက်လက်ပေးသွင်းခြင်းမရှိရင် တော့ ၃၆လနှင့် အထက်ပြတ်တောက်ပါက ယာယီရပ်ဆိုင်းထားပြီး အကယ်၍ လူမှုဖူလုံရေး နှင့် အကျူံးဝင်သောလုပ်ငန်းဌာန၊ မြို့နယ်ကိုပြန်လည်ပြောင်းရွှေ့လာပါက ပြန်လည်မှတ်ပုံတင်ခြင်း ၊ သို့မဟုတ် ဆန္ဒအလျောက်ပြန်ဝင်ပြီး ယခင်လူမှုဖူလုံရေးအာမခံစိစစ်ရေး အမှတ်ဖြင့် ထည့်ဝင်ကြေးများပြန်လည်ပေးသွင်းနိုင်ပါတယ်။ ယခင်ထည့်ဝင်ကြေးပေးသွင်းထားသောကာလများဖြင့် ပြန်လည်ဆက်စပ်၍ ဥပဒေပါခံစားခွင့်များကို ခံစားခွင့်ရှိပါတယ်။
လူမှုဖူလုံရေးဥပဒေနှင့်အညီ အကျူံးဝင်မှတ်ပုံတင်ရမည့် အလုပ်ရှင်တစ်ဦးသည် ၎င်း၏ အလုပ်သမားကို ဥပဒေနှင့်အညီအကျုံးဝင်မှတ်ပုံတင်ပြီး ထည့်ဝင်ကြေးပေးသွင်း ထားလျှင် အလုပ်ကိုအကြောင်းပြု၍ အလုပ်သမားထိခိုက်ဒဏ်ရာရခြင်း၊ သေဆုံးခြင်း ဖြစ်ပါက အလုပ်သမားလျော်ကြေးဥပဒေနှင့်အညီပေးလျော်ရခြင်းမှ ကင်းလွတ်ခွင့်ရှိပါ တယ်။ လူမှုဖူလုံရေးဥပဒေအရ အကျိုးခံစားခွင့်ခွင့်ပြုမှာဖြစ်တဲ့အတွက် အလုပ်သမား အနေဖြင့် အလုပ်ရှင်ထံမှ လျော်ကြေးတောင်းခံခွင့်မရှိပါ။ အလုပ်ရှင်တွေအတွက် လူမှုဖူလုံ ရေးဥပဒေ ပုဒ်မ-၄၉ နှင့်အညီ အလုပ်သမားလျော်ကြေးမှ ကင်းလွတ်ခွင့်ရှိအောင် ကာကွယ်ပေးထားပါတယ်။
အကျိုးခံစားခွင့် တောင်းဆိုရမည့်ကန့်သတ်ချက်တွေကို ဥပဒေပုဒ်မ ၇၃ မှာ တရား ဝင်ပြဋ္ဌာန်းထားပါတယ်။ အလုပ်တွင်ထိခိုက်မှုနှင့်ပတ်သက်သည့် ယာယီမသန်စွမ်းမှု၊ အမြဲ တမ်းမသန်စွမ်းမှုနှင့် ကျန်ရစ်သူအကျိုးခံစားခွင့်တွေကို တစ်နှစ်အတွင်း တောင်းခံရန် လို အပ်သလို အငြိမ်းစားယူပြီး ဆေးကုသမှုဆက်လက်ခံယူခွင့်ကိုလည်း တစ်နှစ်အတွင်း တောင်းဆိုရမှာဖြစ်ပါတယ်။ ကျန်အကျိုးခံစားခွင့်များကို ၃လ အတွင်းတောင်းဆိုရမှာ ဖြစ်ပါတယ်။ အကြောင်းအမျိုးမျိုးကြောင့် နောက်ကျခဲ့လျှင် အကြောင်းပြချက်ခိုင်လုံပါက အမှုတွဲတစ်ခုချင်းအလိုက် စိစစ်ခွင့်ပြုထုတ်ပေးလျှက်ရှိပါတယ်။
အလုပ်ရှင်တစ်ဦးသည် လုပ်ငန်းစတင်လုပ်ကိုင်ပြီး ရက်ပေါင်း ၃၀ အတွင်း သက်ဆိုင်ရာ နယ်မြေအတွင်းမှ လူမှုဖူလုံရေးရုံးတွင် မှတ်ပုံတင်ရန် တာဝန်ရှိပါတယ်။ အလုပ်ဌာနကို မှတ်ပုံတင်တဲ့အခါ အလုပ်သမားများကိုပါ တစ်ခါတည်း သတ်မှတ်ချက်များနှင့်အညီ မှတ်ပုံ တင်ရမှာဖြစ်ပါတယ်။ အလုပ်သမားတစ်ဦးတိုးတိုင်းလည်း မဖြစ်မနေ ၁၀ ရက် အတွင်း မှတ်ပုံတင်ဖို့လိုပါတယ်။ လူမှုဖူလုံရေးအဖွဲ့မှာမှတ်ပုံတင်ပြီးလျှင် ဥပဒေပါခံစားခွင့်ရှိရန် ဖြစ်ပေါ်သည့်အခါ လူမှုဖူလုံရေးအဖွဲ့က တာဝန်ယူမှာဖြစ်ပြီး မှတ်ပုံတင်ရမည့်ဌာန၊ မှတ်ပုံ တင်ရမည့်အလုပ်သမားကို ဥပဒေနှင့် အညီမှတ်ပုံမတင်ထားလျှင် ဥပဒေပုဒ်မ ၆၉ အရ ထည့်ဝင်ကြေးများ ပြန်လည်ပေးသွင်းရပြီး အလုပ်သမားရထိုက်ခွင့်ရှိသည့် အကျိုးခံစားခွင့်ကိုလည်း အလုပ်ရှင်မှ လူမှုဖူလုံရေးအဖွဲ့ကိုယ်စား ပေးလျော်ရမှာဖြစ်ပါတယ်။ ဥပဒေသစ် ကို အကောင်အထည်ဖော်သည့် ၂၀၁၄-၂၀၁၅ ဘဏ္ဍာနှစ်မှစ၍ ယခုအချိန်ထိ အလုပ်ရှင်မှပေးလျော်ရသည့် အမှု ၂၄ မှု ရှိပြီ ဖြစ်ပါတယ်။
ဥပေဒေနှင့်အညီ ထည့်ဝင်ကြေးပေးသွင်းထားသူသည် ယခင် ၁၉၅၄ လူမှုဖူလုံရေး အက်ဥပဒေနှင့် လက်ရှိကျင့်သုံးနေသော ၂၀၁၂ ခုနှစ်၊ လူမှုဖူလုံရေး ဥပဒေနှစ်ရပ်ပေါင်း လပေါင်း ၁၈၀ ရှိပြီး၊ သို့မဟုတ် လက်ရှိဥပဒေမှာပဲ လပေါင်း ၁၈၀ ထည့်ဝင်ပြီး ဖြစ်တယ် ဆိုရင် ပင်စင်ယူတဲ့အခါ ထည့်ဝင်ကြေးဆက်မသွင်းလည်း သတ်မှတ်ချက်များနှင့်အညီ ဆေးကုသမှုခံယူခွင့်ရှိပါတယ်။ တကယ်လို့ ပင်စင်လစာနှင့် ထည့်ဝင်ကြေး ဆက်သွင်းမယ် ဆိုရင်လည်း ကျန်းမာရေးနှင့်လူမှုရေးစောင့်ရှောက်မှုစနစ်ပါ အကျိုးခံစားခွင့်များကိုရရှိမှာ ဖြစ်တဲ့အပြင် ဆုံးပါးသွားခဲ့လျှင် နာရေးစရိတ်ကို ခံစားခွင့်ရှိပါတယ်။
လူမှုဖူလုံရေးကို လစဉ်ထည့်ဝင်ကြေး ပေးသွင်းရမည့် တာဝန်သည်အလုပ်ရှင်၏ တာဝန် ဖြစ်ပါတယ်။ လူမှုဖူလုံရေးဥပဒေပုဒ်မ ၁၇နှင့် ၅၀ ၊ နည်းဥပဒေ ၅၄ နှင့် ၅၇ တို့အရ အလုပ်ရှင်သည် လူမှုဖူလုံရေးအဖွဲ့သို့ ပေးသွင်းရမည့်ထည့်ဝင်ကြေးများကို အလုပ်သမား၏ လုပ်ခလစာမှ ဖြတ်တောက်၍ လူမှုဖူလုံရေးအဖွဲ့သို့ဖြစ်စေ၊ လူမှုဖူလုံရေးအဖွဲ့မှ ဖွင့်လှစ် ထားသော ဘဏ်စာရင်းသို့ ဖြစ်စေ လစဉ်ပေးသွင်းရန်တာဝန်ရှိပါသည်။ အလုပ်သမားများ၏ လုပ်ခလစာ မှန်မှန်ကန်ကန်ဖြင့် ထည့်ဝင်ကြေးပေးသွင်းရန် အလုပ်ရှင်တွင် တာဝန် ရှိပါသည်။ အကယ်၍ အလုပ်သမားမှ အလုပ်ရှင်၊ အလုပ်သမားသဘောတူညီချက်ဖြင့် လုပ်ခလျော့ပြပါကလည်း ထည့်ဝင်ကြေးပေးသွင်းရန် တာဝန်မှာ အလုပ်ရှင်၏တာဝန် ဖြစ်သောကြောင့် ဥပဒေပုဒ်မ ၆၉ အရ လိုအပ်သည့် အကျိုးခံစားခွင့်ကို အလုပ်ရှင်မှ ဖြည့်စွက်ပေးရမှာဖြစ်ပါတယ်။
လူမှုဖူလုံရေးဥပဒေတွင် မှတ်ပုံမတင်မနေရ မှတ်ပုံတင်ရမည့် အလုပ်သမား(၅)ဦးနှင့် အထက် စီးပွားရေး လုပ်ငန်းလုပ်ကိုင်သော အစိုးရဌာန၊ အဖွဲ့အစည်းများနှင့် ပုဂ္ဂလိကလုပ်ငန်း ဌာန(၁၅)မျိုး ရှိပါတယ်။ အဲ့ဒီလုပ်ငန်းဌာနတွေဟာ လုပ်ငန်းစတင်လုပ်ကိုင်ပြီး ရက်ပေါင်း (၃၀)အတွင်းမှာ အလုပ်ဌာနကို အရင်မှတ်ပုံတင်ရမှာဖြစ်ပါတယ်။ အလုပ်ဌာနမှတ်ပုံတင် စဉ်မှာ အလုပ်လုပ်ကိုင်နေတဲ့ အလုပ်သမားအားလုံးကိုလည်းမှတ်ပုံတင်ဖို့လိုပါတယ်။ အလုပ်သမားအသစ်ခန့်ပြီးတိုင်းလည်း(၁၀)ရက်အတွင်း မဖြစ်မနေမှတ်ပုံတင်ဖို့လိုပါတယ်။
မှတ်ပုံမတင်မနေရ လုပ်ငန်းဌာနများနှင့် သက်ဆိုင်ခြင်းမရှိတဲ့ အလုပ်သမားများနှင့် အများပြည်သူများအနေနဲ့ လူမှုဖူလုံရေးဥပဒေပါ အကျိုးခံစားခွင့်တွေကို ခံစားချင်တယ်ဆိုရင် အလုပ်ရှင်၊ အလုပ်သမားထည့်ဝင်ကြေးတွေကို ကိုယ်တိုင်ပေးသွင်းပြီး မိမိဆန္ဒအလျောက် အကျုံးဝင်မှတ်ပုံတင်နိုင်ပါတယ်။
အလုပ်သမားတစ်ဦးဟာ မှတ်ပုံတင်ပြီးသည် နှင့် လက်ရှိအကောင်အထည်ဖော်နေတဲ့ အာမခံစနစ်ကျန်းမာရေးနှင့် လူမှုရေးစောင့်ရှောက်မှုအာမခံစနစ်နှင့် အလုပ်တွင်ထိခိုက်မှု အကျိုးခံစားခွင့် အာမခံစနစ်(၂)မျိုးကနေ ဆေးကုသမှုခံယူခွင့်နှင့် ငွေကြေးအကျိုးခံစားခွင့် (၁၅)မျိုးကို မှတ်ပုံတင်ကာလနှင့် ထည့်ဝင်ကြေးကာလတွေပေါ်မှာမူတည်ပြီးရရှိမှာဖြစ်ပါတယ်။
(၁) ဆေးကုသမှုခံယူခွင့် သာမန်မကျန်းမာမှုများကို (၂၆)ပတ်အထိ၊ ထပ်တလဲလဲ မကျန်းမာမှုနာတာရှည် ရောဂါများ အတွက် ရက်သတ္တပတ်(၅၂)ပတ်အထိ (သို့မဟုတ်) လူမှုဖူလုံရေးအဖွဲ့က သီးခြားသတ်မှတ်ပေးသည့်ကာလအထိ၊ အလုပ်ခွင် ထိခိုက်ခြင်း ကြောင့်ရရှိသည့် ဒဏ်ရာများကိုမူ ပျောက်ကင်း သည်အထိ
(၂) ယာယီမသန်စွမ်းမှုအကျိုးခံစားခွင့် (လွန်ခဲ့သော ၄လ အတွင်းရရှိသော ပျမ်းမျှ လုပ်ခလစာ၏ ၇၀ % အများဆုံး (၅၂) ပတ်အထိခံစားခွင့်)
(၃) အမြဲတမ်းမသန်စွမ်းမှု အကျိုးခံစားခွင့်(လုပ်အားဆုံးရှုံးမှုအပေါ်မူတည်၍ (၅) နှစ်စာ ငွေလုံးငွေရင်းမှ (၉)နှစ်စာ ငွေလုံးငွေရင်းထိ)
(၄) ကျန်ရစ်သူ အကျိုးခံစားခွင့်( ပေးသွင်းထားသော ထည့်ဝင်ကြေးကာလပေါ် မူတည်၍ လွန်ခဲ့သောလေးလအတွင်း ရရှိသောပျမ်းမျှလုပ်ခလစာ၏ အဆ (၃၀) မှ အဆ (၈၀) အထိ)
(၅) မည်သည့်အကြောင်းကြောင့်မဆို နာရေးစရိတ်အကျိုးခံစားခွင့် (လွန်ခဲ့သော လေးလအတွင်းရရှိသော ပျမ်းမျှလုပ်ခလစာ၏ (၁) ဆ မှ (၅) ဆအထိ) ရရှိနိုင်ပါတယ်။
မှတ်ပုံတင်ကာလ (၆)လ ထည့်ဝင်ကြေး(၄)လရှိပါက ခံစားခွင့်
(၆) မကျန်းမာမှုအကျိုးခံစားခွင့် (အများဆုံး ၂၆ ပတ်ခံစားခွင့်အထိကို လွန်ခဲ့သော (၄)လ အတွင်းရရှိသော ပျမ်းမျှလုပ်ခလစာ၏ ၆၀%)
မှတ်ပုံတင်ကာလ (၁၂)လ ထည့်ဝင်ကြေး(၆)လရှိပါက ခံစားခွင့် (၇)မျိုးကတော့
(၇) မီးဖွားမှုအကျိုးခံစားခွင့် (မီးမဖွားမီ (၆)ပတ်၊ မီးဖွားပြီး (၈) ပတ်၊ အမွှာက လေးမွေးသူများအတွက် နောက်ထပ် (၄)ပတ်အထိကို လွန်ခဲ့သော (၁၂)လ အတွင်းရရှိသော ပျမ်းမျှလုပ်ခလစာ၏ ၇၀%ခံစားခွင့်)
(၈) အာမခံအမျိုးသမီးမီးဖွားစရိတ်(လွန်ခဲ့သော (၁၂)လ အတွင်းရရှိသော ပျမ်းမျှ လုပ်ခလစာ၏ ကလေးတစ်ဦးမီးဖွားလျှင် ၅၀%၊ နှစ်ဦးလျှင် ၇၅%၊ သုံးဦးနှင့် အထက် ၁၀၀%) အထိ ခံစားခွင့်
(၉) ကိုယ်ဝန်ပျက်မှုအတွက် အကျိုးခံစားခွင့်(လွန်ခဲ့သော (၁၂)လအတွင်းရရှိသော ပျမ်းမျှ လုပ်ခလစာ၏ ၇၀%ကို (၆) ပတ်အထိခံစားခွင့်)
(၁၀) တစ်နှစ်အောက်ကလေးမွေးစားမှုအတွက် အကျိုးခံစားခွင့်၊ (လွန်ခဲ့သော ၁၂လ အတွင်းရရှိသော ပျမ်းမျှလုပ်ခလစာ၏ ၇၀% ကို ၈ပတ်အထိခံစားခွင့်)
(၁၁) ဖခင်ဘဝဖြစ်မှု အကျိုးခံစားခွင့် (လွန်ခဲ့သော ၁၂လအတွင်း ရရှိသော ပျမ်းမျှ လုပ်ခလစာ၏ ၇၀% ကို အများဆုံးခွင့် ၁၅ ရက်ထိ ခံစားခွင့်)
(၁၂) ဖခင်ဘဝဖြစ်မှုအတွက်မီးဖွားစရိတ်၊ (အာမခံထားသူ အမျိုးသမီးများခံစား ခွင့်၏ ပျမ်းမျှလစာ၏ (၂၅%) ထက်ဝက်ခံစားခွင့်)
(၁၃) အာမခံအမျိုးသမီးအလုပ်သမား၏ မွေးကင်းစကလေးအား တစ်နှစ်အထိ ဆေး ကုသမှုခံယူခွင့်၊
၁၉၅၄ ခုနှစ်၊အက်ဥပဒေနှင့် ၂၀၁၂ခုနှစ် ဥပဒေနှစ်ရပ်ပေါင်း ထည့်ဝင်ကြေးကာလ ၁၈၀ လရှိပါက
(၁၄) သတ်မှတ်ချက်များနှင့်အညီ ဆေးကုသမှုဆက်လက်ခံယူခွင့်
မှတ်ပုံတင်ကာလတစ်လအတွင်း ထည့်ဝင်ကြေးပေးသွင်းထားပါက
(၁၅) ဆေးဖိုးနှင့်ခရီးစရိတ်များအား ပြန်လည်ခံစားခွင့်ရှိပါသည်။
လူမှုဖူလုံရေး အာမခံအကျိုးခံစားခွင့်တွေကို လျောက်ထားသည့်အခါ လူမှုဖူလုံရေး အဖွဲ့တွင် အကျုံးဝင်မှတ်ပုံတင်ထားသည့် အလုပ်ဌာနတွင် လုပ်ကိုင်နေသော အလုပ်သမား များအား အလုပ်ရှင်/HR တို့မှ အလုပ်သမားများ၏ ကိုယ်ရေးအချက်အလက်များအား ဖြည့်စွက်၍ လူမှုဖူလုံရေးအဖွဲ့တွင် အကျုံးဝင်မှတ်ပုံတင်ပေးရမှာဖြစ်ပါတယ်။
အလုပ်ဌာနတစ်ခုအနေဖြင့် မှတ်ပုံမတင်မနေရ မှတ်ပုံတင်ရမည့်ဌာနဆိုလျှင် အလုပ်ဌာနစတင်လုပ်ကိုင်သည့် ရက်ပေါင်း ၃၀ အတွင်းမှတ်ပုံတင်ရန်၊ အလုပ်သမား အားလုံးကို မှတ်ပုံတင်ရန်၊ အလုပ်သမားအသစ်ခန့်ပြီးတိုင်း မှတ်ပုံတင်ရန်၊ အလုပ်ရှင်၊အလုပ်သမားများအနေဖြင့် အလုပ်သမား၊ အလုပ်ဌာနမှတ်ပုံတင်သည့် အချက်အလက်များကို ပြည့်စုံမှန်ကန်စွာဖြည့်စွက်၍ လက်မှတ်ရေးထိုးရန်၊ အလုပ်သမား အကျိုးခံစားခွင့်များ နစ်နာမှုမရှိစေရေးအတွက် လုပ်ခလစာအမှန်ဖော်ပြပြီး ထည့်ဝင်ကြေး များပေးသွင်းရန်၊ အလုပ်သမားများ နှုတ်ထွက်၊ ပြောင်းရွှေ့၊ သေဆုံး၊ ပင်စင်ယူစာရင်းများ ကိုလည်း သက်ဆိုင်ရာ မြို့နယ်ရုံးခွဲသို့ ၁၀ရက်အတွင်း သတင်းပို့ရန်၊ လူမှုဖူလုံရေးအဖွဲ့ ဆေးရုံ၊ ဆေးခန်းများမှ တရားဝင်ဆေးသက်သေခံလက်မှတ်ဖြင့် ဆေးခွင့်ခံစားနေသူများ အား အလုပ်ရှင်များမှ ရာထူးအဆင့်လျော့ချခြင်း၊ ထုတ်ပစ်ခြင်း၊ အလုပ်နေရာပြောင်းရွှေ့ ခြင်းများကိုမပြုလုပ်ရန်၊ အလုပ်တွင်ထိခိုက်မှုဖြစ်ပေါ်ခြင်း၊ သေဆုံးခြင်းများဖြစ်ပေါ်ပါက ချက်ချင်း/၂၄နာရီအတွင်း သတင်းပို့ရန်၊ အလုပ်သမားများအနေဖြင့် မည်သည့် အလုပ်ဌာန သို့ ပြောင်းပြောင်း ယခင်မှတ်ပုံတင်စဉ်ကရရှိခဲ့သည့် လူမှုဖူလုံရေးအာမခံစိစစ်ရေးအမှတ် ကိုသာ ဆက်လက်အသုံးပြုရန်၊ သက်ဆိုင်ရာ မြို့နယ်ရုံးခွဲများနှင့်ချိတ်ဆက်ရန်၊ အလုပ်ရှင် များအနေဖြင့် အလုပ်သမားများကို အချိန်မီမှတ်ပုံမတင်ခြင်းကြောင့် အလုပ်သမားများ ဥပဒေပါ အကျိုးခံစားခွင့်များဆုံးရှုံးပါက ဥပဒေပုဒ်မ ၆၉ နှင့်အညီ လူမှုဖူလုံရေးအဖွဲ့ ကိုယ်စား အလုပ်ရှင်များက အကျိုးခံစားခွင့်များကိုပေးလျော်ရမှာဖြစ်ပါတယ်။
လူမှုဖူလုံရေးအဖွဲ့နှင့် စာချုပ်ချုပ်ဆိုထားသည့် ပုဂ္ဂလိကဆေးရုံ၊ ဆေးခန်းမှာ ကုသ ပြီးတဲ့သူတွေကို ကိုဗစ်ကာလအတွင်း သတ်မှတ်ချက်များနှင့်အညီ ဆေးဖိုးကုန်ကျစရိတ် များကို ပြန်လည်ပေးအမ်းလျှက်ရှိပါတယ်။
အာမခံအလုပ်သမားများအနေဖြင့် ပင်စင်ယူသည့်အခါ မိမိဆန္ဒအလျောက် ဆက်လက်အကျုံးဝင်မှတ်ပုံတင်၍ လူမှုဖူလုံရေးအာမခံကြေးကို ဆက်လက်ပေးဆောင် မည်ဆိုလျှင် ဥပဒေပါ ခံစားခွင့်တွေကို ဆက်လက်ခံစားခွင့်ရှိပြီး ထည့်ဝင်ကြေးကို လပေါင်း ၁၈၀ ပေးသွင်းထားတယ်ဆိုလျင် အငြိမ်းစားစိစစ်ရေးသက်သေခံကတ်ပြား(ပုံစံ-၁၄)ကို လျောက်ထားပြီး ဆေးကုသမှုကုန်ကျ စရိတ် ၅၀% ကို ကာယကံရှင်ကကျခံပြီး၊ ကျန် ၅၀% ကို လူမှုဖူလုံရေးအဖွဲ့က ဆေးဖိုးပြန်အမ်းငွေအဖြစ် ပြန်လည်ပေးအမ်းပါတယ်။ မိမိဆန္ဒ အလျောက် ဆက်လက်အကျုံးဝင်လိုပါက ထည့်ဝင်ကြေး ၄% ပေးသွင်း၍ နည်းဥပဒေ အပိုဒ်၅၁ (ခ) အရ အာမခံထားသူအဖြစ် ဆက်လက်ရပ်တည်ခွင့်ရှိပါတယ်။
လူမှုဖူလုံရေးအာမခံကို အသင်းဝင်အသစ်အနေနဲ့လျောက်ထားမယ်ဆိုလျှင် လူမှုဖူ လုံရေးအဖွဲ့တင် အကျုံးဝင်မှတ်ပုံတင်ထားသည့် လုပ်ငန်းဌာနတွင် လုပ်ကိုင်ပါက အလုပ် ရှင်မှ ၎င်းအာမခံအလုပ်သမားအား လူမှုဖူလုံရေးအဖွဲ့တွင် အကျုံးဝင်နိုင်ရေး ဆက်လက် ဆောင်ရွက်ပေးရမှာဖြစ်ပြီး မိမိဆန္ဒအလျောက်အာမခံထားမယ့်သူတွေကတော့ အလုပ်ရှင်၊ အလုပ်သမားထည့်ဝင်ကြေးပေးသွင်း၍ အာမခံထားနိုင်ပါတယ်။ အာမခံအလုပ်သမားများ အနေဖြင့် ပင်စင်ယူသည့်အခါ လူမှုဖူလုံရေးအာမခံကြေးကို ဆက်လက်ပေးဆောင်ခွင့်ရှိပါ တယ်။ ၎င်းတို့အနေဖြင့် ဆန္ဒအလျောက် မှတ်ပုံတင်ခြင်း (သို့) အငြိမ်းစားစိစစ်ရေးသက် သေခံကတ်ပြား (ပုံစံ-၁၄) ကို လျောက်ထားနိုင်ပါတယ်။
လူမှုဖူလုံရေး ဆေးခန်းတွေမှာတော့ ရုံးဖွင့်ရက်များမှာ မနက် ၈ နာရီ၊ ညနေ ၄ : ၃၀ နာရီ သတ်မှတ်ပြီးပြသနိုင်သလို လူမှုဖူလုံရေးအဖွဲ့နှင့် စာချုပ်ချုပ်ဆိုထားသည့် ဆေးခန်းတွေမှာ ဆိုလျှင် ပိတ်ရက်မရှိဆေးကုသမှုခံယူနိုင်ပါတယ်။ လူမှုဖူလုံရေးအဖွဲ့အနေဖြင့် ဥပဒေပါ အကျိုးခံစားခွင့်တွေ ဆေးကုသမှုဆိုင်ရာကိစ္စတွေ၊ သတင်းထုတ်ပြန်ချက်တွေအပါအဝင် လူမှုဖူလုံရေးစီမံကိန်း နှင့် ပတ်သက်တဲ့သိကောင်းစရာများကို ဝန်ကြီးဌာန Website ဖြစ်တဲ့ https://mol.gov.mm နှင့် လူမှုဖူလုံရေး Website ဖြစ်တဲ့ https://ssb.gov.mm မှာ လေ့လာနိုင်ပါတယ်။
လူမှုဖူလုံရေးအဖွဲ့သည် ၂၀၁၂ ခုနှစ် လူမှုဖူလုံရေးဥပဒေပုဒ်မ ၁၀၀ ကိုကျင့်သုံးပြီး လက်ရှိဆောင်ရွက်နေသည့် အာမခံစနစ်(၂)မျိုးအရ အကျိုးခံစားခွင့်(၁၅)မျိုးကို ခွင့်ပြု လျက်ရှိသည့်အပြင် ကိုဗစ်-၁၉ ကာလအတွင်း လူမှုဖူလုံရေးအဖွဲ့မှ အလုပ်ရှင်၊ အလုပ် သမားများအား အခက်အခဲများလျော့ပါးစေရေး ဖြေလျော့ကင်းလွတ်ခွင့်ပြုတာတွေ၊ ထောက်ပံ့မှုပေးခဲ့တာတွေကတော့-
အလုပ်ရှင်အတွက်
(က) Frist wave နှင့်Second wave ကာလများတွင် သတ်မှတ်ကာလအတွင်း ပေးသွင်းရမည့် ထည့်ဝင်ကြေးကို (၃)လ နောက်ကျပေးသွင်းခွင့်၊
(ခ) ကိုဗစ်-၁၉ third wave တွင် သတ်မှတ်ကာလအတွင်း ပေးသွင်းရမည့် ထည့်ဝင်ကြေးကို (၆)လ နောက်ကျပေးသွင်းခွင့်၊
အာမခံအလုပ်သမားများအတွက်
(က) ကိုဗစ်-၁၉ ကာလအတွင်း အာမခံအလုပ်သမားများ အလုပ်လက်မဲ့ဖြစ်ပွား သည့်နေ့မှစ၍ တစ်နှစ်အထိကျန်းမာရေးစောင့်ရှောက်မှုပေးခြင်းနှင့် ဆေးဖိုး နှင့် ခရီးစရိတ်ခွင့်ပြုထုတ်ပေးခဲ့ပါသည်။
(ခ) ကိုဗစ်-၁၉ ကာလအတွင်း first wave တွင် အလုပ်ပိတ်ရက်အသီးသီး အတွက် အာမခံအလုပ်သမားများကို လူမှုဖူလုံရေးထောက်ပံ့မှုအကျိုးခံစား ခွင့် ၄၀%ခွင့်ပြုထုတ်ပေးခြင်း၊ (အလုပ်ဌာန(၉၀၁၈)ရှိ အလုပ်သမား(၈၅၇,၇၆၈)) ဦး အတွက် ငွေကျပ်သန်း ၂၁,၆၂၇.၆၃၉ ကို ခွင့်ပြုထုတ်ပေးခဲ့ပါသည်။
(ဂ) ကိုဗစ်-၁၉ ကာလအတွင်း second wave တွင် stay at home ကာလအတွက် အာမခံအလုပ်သမားများကို လူမှုဖူလုံရေးထောက်ပံ့မှု အကျိုးခံစားခွင့် ၄၀% ခွင့်ပြုထုတ်ပေးခြင်း၊ (အလုပ်ဌာန (၉၅၉၇)မှ အာမခံ အလုပ်သမား(၇၇၈,၈၉၆)ဦး အတွက် ခွင့်ပြုငွေကျပ်သန်း ၄၉,၃၉၂.၉၇၁ ကို ခွင့်ပြုထုတ်ပေးခဲ့ပါသည်။)
(ဃ) မီးလောင်မှုဖြစ်ပွားသောအလုပ်ဌာနများရှိ အာမခံအလုပ်သမားများ အလုပ် လက်မဲ့ဖြစ်ပွားခြင်းကြောင့် လူမှုဖူလုံရေးထောက်ပံ့မှုအကျိုးခံစားခွင့် ၄၀% ကို အလုပ်ဌာန (၂၅)ရှိ အာမခံအလုပ် သမား ( ၁၄,၆၀၃) ဦးအတွက် ခွင့်ပြု ငွေကျပ်သန်း ၈၃၄.၉၄၀ ကို ခွင့်ပြုထုတ်ပေးခဲ့ပါသည်။
(င) ကျန်းမာရေးနှင့် အားကစားဝန်ကြီးဌာန၏ လမ်းညွှန်ချက်နှင့်အညီ ကိုဗစ် ၁၉ positive အတည်ပြုလူနာနှင့် quarantine လူနာများအတွက် ဆေးသက် သေခံလက်မှတ် ဆ-၁ ထုတ်ပေးပြီး မကျန်းမာမှုအကျိုးခံစားခွင့်အဖြစ် အများဆုံး ၂၆ ပတ်အထိကို လွန်ခဲ့သော ၄ လအတွင်း ပေးသွင်းခဲ့သော ပျမ်းမျှလုပ်ခလစာ၏ ၆၀%ကို အာမခံအလုပ်သမား (၆,၂၅၂) ဦးအတွက် ငွေကျပ် သန်း ၃၇၁.၄၀၉ ကို ခွင့်ပြုထုတ်ပေးခဲ့ပါသည်။
(စ) ကိုဗစ်-၁၉ ကာလတွင် လုပ်ငန်းခွင်သို့ သွားရောက်ရန် တားမြစ်ခံခဲ့ရသော ကိုယ်ဝန်ဆောင်မိခင်များ မီးဖွားခွင့်မစတင်မီ မကျန်းမာမှုအကျိုးခံစားခွင့် ၆၀% အဖြစ် အာမခံအလုပ်သမား (၄,၀၂၈) ဦး အတွက် ငွေကျပ်သန်း ၅၈၅.၄၇၂ ကို ခွင့်ပြုထုတ်ပေးခဲ့ပါသည်။
(ဆ) ကိုဗစ်-၁၉ ကာလ ၄/၂၀၂၀ လမှ ၁/၂၀၂၃ လအထိ (၃၄)လတာ ကာလ အတွင်း လက်ရှိအကောင်အထည်ဖော်နေသော ကျန်းမာရေးနှင့်လူမှုရေး စောင့်ရှောက်မှုအာမခံစနစ်နှင့် အလုပ်တွင်ထိခိုက်မှုအကျိုးခံစားခွင့် အာမခံ စနစ်ပါ အကျိုးခံစားခွင့်(၁၅)မျိုး (ကိုဗစ်-၁၉ကာလအတွင်း လူမှုဖူလုံရေး ထောက်ပံ့မှု အကျိုးခံစားခွင့်မပါ)အတွက် အမှုတွဲပေါင်း ၆၇၁,၅၃၈ မှုအတွက် ငွေကျပ်သန်းပေါင်း ၄၁,၁၆၅.၀၁၉ သန်း ကို ခွင့်ပြုထုတ်ပေးနိုင်ခဲ့ပါသည်။
(ဇ) လူမှုဖူလုံရေးအဖွဲ့အနေဖြင့် ၂၀၁၂ခုနှစ် လူမှုဖူလုံရေးဥပဒေကို စတင် ကျင့်သုံးသည့် ၂၀၁၄-၂၀၁၅ ဘဏ္ဍာနှစ်မှစ၍ ၂၀၂၂-၂၀၂၃ ဘဏ္ဍာရေးနှစ် (၄/၂၀၂၂ မှ ၁/၂၀၂၃ လအထိ) အာမခံအလုပ်သမားများအတွက် အကျိုး ခံစားခွင့်အမှုတွဲပေါင်း ၃၇ သိန်းကျော်ကို ငွေကျပ်သန်းပေါင်း ၁၇၉,၅၂၂.၂၉၃ ကို ခွင့်ပြုထုတ်ပေးခဲ့ပါသည်။
(ဈ) နောက်ဆုံးအနေနဲ့ လူမှုဖူလုံရေးစီမံကိန်းနှင့်ပတ်သက်ပြီး အဓိက အသိပေး လိုတာကတော့ လူမှုဖူလုံရေးစီမံကိန်းဆိုတာ “စုပေါင်းခြင်းဖြင့်ဖူလုံအံ့” ဆို သည့် ဆောင်ပုဒ်နှင့်အညီအလုပ်ရှင်၊ အလုပ်သမား၊ နိုင်ငံတော်တို့မှ စုပေါင်း အာမခံသော လူမှုရေးအာမခံစနစ်တစ်ခုဖြစ်ပြီး အလုပ်သမားများနှင့် မှီခိုသူ မိသားစုများ လူမှုဒုက္ခကြုံတွေ့ရသည့်အချိန်မှာ ဆေးကုသမှုပေးခြင်း၊ ငွေကြေးအကျိုးခံစားခွင့်တွေ ခွင့်ပြုထုတ်ပေးခြင်းဖြင့် အလုပ်သမားနှင့် မှီခိုသူမိသားစုများကို လူမှုဒုက္ခမှ လျော့ပါးသက်သာအောင် ဆောင်ရွက်ပေး သည့်စီမံကိန်းဖြစ်ခြင်းကြောင့် လူမှုဖူလုံရေးဥပဒေနှင့် အညီအကျုံးဝင်မှတ် ပုံတင်ရမည့် အလုပ်ဌာနများအနေနဲ့ မိမိဌာနကို မဖြစ်မနေမှတ်ပုံတင်ပြီး မိမိဌာနမှာလုပ်ကိုင်နေတဲ့ အလုပ်သမားအားလုံးကိုလည်း မပျက်မကွက် အကျုံးဝင်မှတ်ပုံတင်ရန် လိုအပ်ပါသည်။
လူမှုဖူလုံရေးအဖွဲ့၏ ဝန်ဆောင်မှုလုပ်ငန်းများအား လွယ်ကူလျင်မြန်စွာ ဆောင်ရွက် နိုင်ရန်နှင့် အသိပညာပေးလုပ်ငန်းများအား ထိထိရောက်ရောက်ဆောင်ရွက်နိုင်ရန် အတွက် e-Services ဝန်ဆောင်မှုလုပ်ငန်းအနေဖြင့် SSB Website နှင့် Mobile Application ကို လူမှုဖူလုံရေးအဖွဲ့၏ သတင်းအချက်အလက်စီမံခန့်ခွဲမှုစနစ် (SSB Information System) ကို မစတင်မီ Pilot App အဖြစ် အကောင်အထည်ဖော်ရန် ၂၀၂၀ ခုနှစ်မှစတင်၍ ရေးသားခဲ့တာဖြစ်ပါတယ်။ ဒီနေ့မှာ SSB Website မှ Update သတင်းအချက်အလက်များကို https://ssb.gov.mm တွင်လည်ကောင်း၊ SSB Mobile App မှာ ဝင်ရောက်ကြည့်ရှုနိုင်ပါတယ်။
အဓိကပါဝင်တဲ့လုပ်ငန်းစဉ်များမှာ-
(က) လူမှုဖူလုံရေးအဖွဲ့က ခွင့်ပြုထုတ်ပေးလျက်ရှိတဲ့ အကျိုးခံစားခွင့်များ (အလုပ်တွင် ထိခိုက်မှုအကျိုးခံစားခွင့်များ၊ နာရေးစရိတ်များ၊ ၄၀ % လူမှုဖူလုံရေး ထောက်ပံ့ငွေခွင့်ပြုမှုစသည်) လုပ်ငန်းဆောင်ရွက်မှုအခြေအနေများ စသည့် Update သတင်းအချက်အလက်များ၊
(ခ) အများပြည်သူကို အသိပေးလိုသည့် အလုပ်သမားဝန်ကြီးဌာနမှ ကိုဗစ်-၁၉ ကာလ အတွင်း ကြေညာချက်များ၊ လူမှုဖူလုံရေးဥပဒေနှင့်အညီ အာမခံအလုပ်သမားများ အတွက် လက်ရှိဆောင်ရွက်ပေးနေမှုအခြေအနေများနှင့် ထပ်မံဖြေလျော့ကင်း လွတ်ခွင့်ပြုမှုများစသည့် ကြေညာချက်များ၊
(ဂ) လူမှုဖူလုံရေးအဖွဲ့မှ လစဉ်ရငွေနှင့်ထည့်ဝင်ကြေးများအား ရငွေနှင့်ထည့်ဝင်ကြေးစာရင်းများ၊
(ဃ) လူမှုဖူလုံရေးအဖွဲ့၏ လစဉ်ဘုတ်အလိုက် ကျန်းမာရေးအသုံးစရိတ်နှင့် ခွင့်ပြုပေးခဲ့သည့် အကျိုးခံစားခွင့်အခြေအနေများကို ကျန်းမာရေးအသုံးစရိတ်နှင့် ခွင့်ပြုခဲ့သော အကျိူးခံစားခွင့်အခြေအနေများ၊
(င) ဆေးရုံဆေးခန်းနှင့် ရုံးလိပ်စာများအား Google Map ဖြင့် ဖော်ပြထားခြင်း၊
(စ) အလုပ်သမားဆေးရုံကြီးများ၏ ပြင်ပလူနာဌာနအတွက် ဆေးကုသပေးနေသည့် အချိန်ဇယားများ ၊
(ဆ) အာမခံစနစ်များနှင့်အကျိုးခံစားခွင့်များ၊
(ဇ) လက်ရှိအကောင်အထည်ဖော်နေသည့် အာမခံစနစ်(၂)မျိုးနှင့် ၂၀၁၂ခုနှစ် လူမှုဖူလုံရေးဥပဒေအရ အကောင် အထည်ဖော်ဆောင်မည့် အခြားအာမခံစနစ်နှင့် ပတ်သက်၍ တွက်ချက်မှုများအား ထည့်ဝင်ကြေးတွက်ချက်ခြင်း တွင်လည်းကောင်း၊
(ဈ) အကျိုးခံစားခွင့်များအား ၂၀၁၂ခုနှစ် လူမှုဖူလုံရေးဥပဒေအရ ထည့်ဝင်ကြေးပေးသွင်းမှု၊ ပျမ်းမျှလစာ၏ % အလိုက် ခံစားခွင့်များအား တွက်ချက်ခြင်းတို့ကို အကျိုးခံစားခွင့်တွက်ချက်ခြင်း ၊
(ည) ခွင့်ပြုထုတ်ပေးလျက်ရှိသည့်အကျိုးခံစားခွင့်များအား ခွင့်ပြုခဲ့သည့်အကျိုးခံစားခွင့်များ၊
(ဋ) အလုပ်ဌာနနှင့် အလုပ်သမားစာရင်းနှင့်လူမှုဖူလုံရေးကတ်နှင့် SSN (Social Security Number) အရေးပါပုံများ၊ လူမှုဖူလုံရေးအကျိုးခံစားခွင့်၊ ဆေးကုသမှုစရိတ်တောင်းခံခြင်း စသည့်အချက်အလက်များ၊
(ဌ) လူမှုဖူလုံရေးအဖွဲ့နှင့်ပတ်သက်ပြီး သိသင့်သည်များကို အမေးများသောမေးခွန်းများ၊
(ဍ) ဌာနအလိုက်ဆက်သွယ်ရမည့်လိပ်စာများ၊
(ဎ) လက်ရှိ လူမှုဖူလုံရေးအကျုံးဝင်အလုပ်သမားများအတွက် လျောက်ထားသူအမည်၊ လူမှုဖူလုံရေးအာမခံစိစစ်ရေးအမှတ် (SSN) နှင့် ဖခင်အမည်များ ဖြည့်စွက်ပြီး သင့်အချက်အလက်များ နှင့်
(ဏ) လူမှုဖူလုံရေးအဖွဲ့သို့ အကြံပြုလွှာများပေးပို့လိုပါက အကြံပြုလွှာနှင့်ဆက်သွယ်ရန် တို့ကို အဓိကလုပ်ငန်းများအဖြစ် ဖော်ပြထားပါတယ်။
SSB Mobile App ကို အများပြည်သူမည်သူမဆို ဝင်ရောက်ကြည့်ရှုနိုင်ပါတယ်။ လတ်တလောအနေဖြင့် Update သတင်းအချက်အလက်များကို သိရှိနိုင်ရေး၊ အသိပညာ ပေးတဲ့ App အနေနဲ့အသုံးပြုလို့ရပါတယ်။
အဓိကအနေဖြင့်Update အချက်အလက်တွေနှင့် ကြေညာချက်တွေစသည့် လူမှုဖူလုံရေးရဲ့အကြောင်းကို ကျယ်ကျယ်ပြန့်ပြန့်သိနိုင်မယ်၊ လူမှုဖူလုံရေးအဖွဲ့ရှိ ရုံးခွဲ/ ဆေးခန်းများရဲ့လိပ်စာတွေ၊ ကိုယ်ကထည့်ဝင်ကြေးဘယ်လိုသွင်းရလဲ၊ ဥပမာကိုယ်ခွင့် ယူတဲ့ကာလအရ မီးဖွားမှုအကျိုးခံစားခွင့်ကို တွက်ချက်နိုင်တဲ့အတွက် ကိုယ်ခံစားခွင့်များကို သိရှိနိုင်ခြင်းစသည့် တို့ကိုရရှိနိုင်ပါတယ်။
Android ဖုန်းများအတွက် Play Store တွင်လည်ကောင်း၊ iOS ဖုန်းများအတွက် App Store တွင်လည်းကောင်း အောက်ပါ Logo နှင့် Download လုပ်ပြီး အသုံးပြုနိုင်ပါတယ်။
လတ်တလောအနေဖြင့် လူမှုဖူလုံရေးအဖွဲ့၏ Update သတင်းအချက်အလက်များ ကို သိရှိနိုင်ရေး၊ အသိပညာပေးတဲ့ App အနေနဲ့အသုံးပြုနိုင်ပြီး နောက်ပိုင်း SSB Information System ကို ရေးဆွဲပြီးချိန်မှာ အလုပ်ဌာနများအနေဖြင့် Online မှ မှတ်ပုံတင်ခြင်း/ထည့်ဝင်ကြေးပေးသွင်းခြင်း၊ အလုပ်သမားတွေအနေနဲ့ အကျိုးခံစားခွင့်လျှောက်တာတွေ /ထုတ်ယူတာတွေကို Online ကနေဆောင်ရွက်လို့ရအောင်၊ အလုပ်သမားတစ်ဦး အနေနဲ့ မိမိနဲ့ပတ်သက်တဲ့အချက်အလက်တွေဖြစ်တဲ့ ထည့်ဝင်ကြေးပေးသွင်း လ/ ငွေတွေ၊ အကျိုးခံစားခွင့်မှတ်တမ်းတွေ၊ ဆေးကုသမှုမှတ်တမ်းတွေစသည့် အချက်အလက်များကို ကြည့်ရှုနိုင်ရန် ဆက်လက်ဆောင်ရွက်သွားမှာဖြစ်ပါတယ်။ ကျေးဇူးတင်ပါတယ်။
ဆေးဖိုးတောင်းခံရာတွင် လိုအပ်သည့်အချက်အလက်အထောက်အထားများမှာ-
(က) အာမခံကဒ်ပြားမိတ္တူ
(ခ) အလုပ်ရှင်ထောက်ခံချက်/ ကိုယ်တိုင်ရေးလျှောက်လွှာ
(ဂ) ဆေးဝယ်ပြေစာမူရင်း
(ဃ) ဆေးကုသမှုမှတ်တမ်းမိတ္တူ
(င) တက်ရောက်ကုသခဲ့သည့် ပြည်သူ့ဆေးရုံမှ ဆရာဝန်၏ ထောက်ခံ ချက်(သို့) သက်ဆိုင်ရာလူမှုဖူလုံရေးဆေးခန်းမှ တာဝန်ခံဆရာဝန်၏ ထောက်ခံချက်
ဆရာဝန်မှသတ်မှတ်သည့် အရေးပေါ်အခြေအနေတွင်သာ ပုဂ္ဂလိကကုသမှုအတွက် ဆေးဖိုးပြန်အမ်းခြင်းဆိုင်ရာ ညွှန်ကြားချက် (၁/၂၀၁၈) အရပြန်လည်ပေးအမ်းပါသည်။
အာမခံထားသူအမျိုးသမီးတစ်ဦး ကိုယ်ဝန်ဆောင်ထားပါက မီးဖွားမှုနှင့်ဆိုင်သည့် ခွင့်အနေဖြင့် မီးမဖွားမီရက်သတ္တပတ် (၆)ပတ်နှင့် မီးဖွားပြီးနောက် ရက်သတ္တပတ် (၈)ပတ် အထိခံစားခွင့်ရရှိမည်ဖြစ်ပါသည်။
လူမှုဖူလုံရေးအဖွဲ့တွင် မှတ်ပုံတင်ထားသော အာမခံထားသူများသည် လူမှုဖူလုံရေး ဆေးရုံကြီး (၃)ခု၊ မြို့နယ်လူမှုဖူလုံရေးဆေးခန်းများ၊ လူမှုဖူလုံရေးနှင့် စာချုပ်ချုပ်ဆိုထား သော ပုဂ္ဂလိကဆေးရုံ / ဆေးခန်းများနှင့် ဌာနကြီးဆေးခန်းများတွင် အခမဲ့ဆေးကုသမှုရယူနိုင်ပါသည်။
လူမှုဖူလုံရေးအဖွဲ့တွင် မှတ်ပုံတင်ထားသော အာမခံထားသူများသည် လူမှုဖူလုံရေး ဆေးရုံကြီး (၃)ခု၊ မြို့နယ်လူမှုဖူ လုံရေးဆေးခန်းများ၊ လူမှုဖူလုံရေးနှင့် စာချုပ်ချုပ်ဆိုထားသော ပုဂ္ဂလိကဆေးရုံ / ဆေးခန်းများနှင့် ဌာနကြီးဆေးခန်းများတွင် အခမဲ့ဆေးကုသမှုရယူနိုင်ပါသည်။
အာမခံထားသူ လူမှုဖူလုံရေးဆေးခန်းသို့ လာရောက်ပြသသည့်အခါ တာဝန်ခံ ဆရာဝန်မှ ကြည့်ရှုစစ်ဆေးပြီး ရောဂါအခြေအနေအရ အလုပ်လုပ်ကိုင်နိုင်ခြင်းမရှိဟု ယူဆ ပါက အလုပ်ခွင်မှအနားယူရန် မကျန်းမာမှုနှင့်ဆိုင်သည့် ငွေကြေးအကျိုးခံစားခွင့်များရရှိ စေရန် မီးဖွားမှု(မီးမဖွားမီခွင့်+မီးဖွားပြီးခွင့်)(ဆ-၂)၊ ဖခင်ဘဝဖြစ်မှုအတွက် ဆေးသက်သေခံ လက်မှတ် (ဆ-၂ ခ)၊ သေဆုံးမှုဆေးသက်သေခံလက်မှတ် (ဆ-၄) ထုတ်ပေးပါသည်။
Provider Purchaser Split (Fee for service Payment) ဖြင့် ဆောင်ရွက်သော စာချုပ်ဆေးခန်း (၁၂)ခန်း ၊ Capitation Payment ဖြင့်ဆောင်ရွက်သော စာချုပ်ဆေးခန်း (၂၄)ခန်း၊ မီးဖွားမှုဆိုင်သည့် ဝန်ဆောင်မှုများဆောင်ရွက်သည့် စာချုပ်ဆေးရုံ/ သားဖွားခန်း (၉)ခန်းတို့ဖြစ်ပါသည်။
ပြင်ပလူနာကုသမှု (OPD Care) ဝန်ဆောင်မှုဆောင်ရွက်ပါသည်။ လူမှုဖူလုံရေး- ကဲဝဲလ်ဆေးခန်း (လှိုင်သာယာ၊ ရွှေလင်ပန်း၊ ရွှေပြည်သာ၊ မင်္ဂလာဒုံ၊ အရှေ့ဒဂုံ)တို့တွင် သားဖွားမီးယပ်ပြင်ပလူနာကုသမှုဝန်ဆောင်မှုဆောင်ရွက် ပေးလျက်ရှိပါသည်။
မရရှိနိုင်ပါ။
ဆေးကုသမှုစရိတ် တောင်းခံရာတွင် ပါဝင်ရမည့်အချက်များ-
(က) နိုင်ငံပိုင် ဆေးရုံတွင်ပြသထားသည့် ဆေးမှတ်တမ်း (အရေးပေါ်အခြေအနေ တွင် ပုဂ္ဂလိကဆေးရုံ ပြသခြင်း ခွင့်ပြုသည်။)
(ခ) ဆေးရုံတက်/ဆင်းလက်မှတ်
(ဂ) အာမခံအလုပ်သမားလူနာ၏ ကိုယ်တိုင်ရေးလျှောက်လွှာ
(ဃ) အာမခံစိစစ်ရေးကတ်ပြားမိတ္တူ
(င) အလုပ်ရှင်မှ မိမိအလုပ်သမားဖြစ်ကြောင်း ထောက်ခံချက်
(စ) ဆေးဝါးဝယ်ယူပြေစာများမူရင်း (ဆေးမှတ်တမ်းနှင့် ကိုက်ညီမှုရှိရမည်။)
တာဝန်ခံဆရာဝန်၏ ထောက်ခံချက်ဖြင့် တင်ပြနိုင်ပါသည်။ သို့သော် တာဝန်ခံ ဆရာဝန်လက်မှတ်ခက်ခဲပါက ဆေးကုသဆောင်တံဆိပ်တုံးနှင့်တကွ လူမှုဖူလုံရေးဆေးခန်း ဆရာဝန်မှ တိုက်ဆိုင်စစ်ဆေးပြီး ကိုက်ညီပါကပေးနိုင်ပါသည်။
ဆေးဖိုးပြန်အမ်းခြင်းတွင် ကျောက်ကပ်ဆေးခြင်းအားတစ်ကြိမ် ၃၀၀၀၀/-ဖြင့် ပေးအမ်းပါသည်။
ရောဂါအခြေအနေမှာ အရေးပေါ်အခြေအနေဖြစ်ပါက ပြန်အမ်းပေးနိုင်ပါသည်။ သို့သော် ဆရာဝန်စမ်းသပ်ခ၊ အသုံးအဆောင်ပစ္စည်းများ၊ ဆေးရုံအခန်းခများ၊ အာဟာရ ဖြည့်စွက်စာများ၊ ခွဲစိတ်ခန်းခများ၊ ဝန်ဆောင်ခများအား ပြန်လည်ပေးအမ်းမည်မဟုတ်ပါ။
ရှိပါတယ်။ ယခင်ဆေးဖိုးပြန်အမ်းခြင်းဆိုင်ရာ ညွှန်ကြားချက် (၁/ဆေး-၂၀၁၈) တွင် ရက်သတ္တပတ် (၁၂)ပတ်အတွင်း ပြန်လည်တင်ပြရန်ပါရှိသော်လည်း အာမခံအလုပ်သမား အကျိုးငှာ အဆိုပါ ညွှန်ကြားချက်အား ရက်သတ္တ(၅၂) ပတ်အထိ ဖြေလျော့ထားသဖြင့် ရက်သတ္တ (၅၂) ပတ် အတွင်းဝယ်ယူထားသော ဆေးမှတ်တမ်းနှင့်ကိုက်ညီသည့် ဆေးဖိုး ကုန်ကျစရိတ်များကို ပြန်လည်တောင်းခံနိုင်ပါသည်။
ဆေးဖိုးကုန်ကျငွေများ ပိုမိုလွယ်ကူလျင်မြန်ရေးအတွက် Wave Money ဖြင့် ဆောင်ရွက်ခဲ့သော်လည်း ယခုအခါ ဘဏ်လုပ်ငန်းအခက်အခဲများကြောင့် ရုံးချုပ်တွင် လျှောက်ထားလာသော ဆေးဖိုးအမှုတွဲများကို စနစ်တကျစိစစ်၍ မြို့နယ်ရုံးခွဲများတွင် ဆေးဖိုးပြန်လည်ပေးအမ်းလျက်ရှိပါသည်။
အလုပ်ရုံနှင့် အလုပ်သမားဥပဒေစစ်ဆေးရေးဦးစီးဌာန၏ ရည်မှန်းချက်တာဝန် (၂)ရပ် ကတော့-
(က) အလုပ်သမားများ ဥပဒေပါအကျိုးခံစားခွင့်များရရှိစေရန် စည်းကြပ်ဆောင်ရွက်ပေးခြင်းဖြင့် ထုတ်လုပ်မှုစွမ်းအား မြင့်မားလာစေရန်၊
( ခ ) လုပ်ငန်းခွင် ဘေးအန္တရာယ်ကင်းရှင်းရေးနှင့် ကျန်မားရေးဆိုင်ရာကိစ္စရပ်များ ဆောင်ရွက်ပေးခြင်းဖြင့် လုပ်ငန်းခွင် မတော်တဆထိခိုက်မှုနှင့် လုပ်ငန်းခွင်ဆိုင်ရာရောဂါ ရရှိခံစားမှု လျော့နည်းကျဆင်းစေရန်။
အလုပ်သမားများ ရက်သတ္တပတ်၊ အများပြည်သူ အလုပ်ပိတ်ရက်နှင့် အပတ်စဉ်အချိန်ပို နာရီများတွင် အချိန်ပိုလုပ်ကိုင်မှုနှင့်စပ်လျဉ်း၍ –
(က) ၁၉၅၁ ခုနှစ်၊ အလုပ်ရုံများအက်ဥပဒေ ပုဒ်မ ၇၃(၁)တွင် အလုပ်သမား တဦးတယောက်သည် အလုပ်ရုံတွင် ပုဒ်မ ၅၉နှင့် ၆၂ တွင် သတ်မှတ် ထားသည့် အချိန်ထက်ပို၍ လုပ်ရလျှင်ထိုသူသည် မိမိအချိန်ပို လုပ်ရသည့် နေ့အတွက် ပေးမြဲနှုန်းအတိုင်း ရှားပါးစရိတ်ကိုလည်း ရစေရမည်ဟု ပြဋ္ဌာန်းထားပါတယ်။
( ခ ) ၂၀၁၆ ခုနှစ်၊ ဆိုင်များနှင့်အလုပ်ဌာနများဥပဒေပုဒ်မ ၁၁ (က) အရ ဆိုင် သို့မဟုတ် အလုပ်ဌာန၌ အလုပ်လုပ်သော အလုပ်သမားတစ်ဦးကို တစ်ရက် လျှင် ရှစ်နာရီထက် ပို၍လည်းကောင်း၊ ရက်သတ္တပတ်လျှင် ၄၈ နာရီထက် ပို၍လည်းကောင်း အလုပ်မလုပ်စေရ။ သို့ရာတွင် တစ်ရက်လျှင် ရှစ်နာရီ ထက်ပို၍လည်းကောင်း၊ ရက်သတ္တပတ်လျှင် ၄၈ နာရီထက်ပို၍ လည်းကောင်း အလုပ်သမား၏ သဘောဆန္ဒရယူ၍ ဥပဒေနှင့်အညီ အချိန်ပိုလုပ်ကိုင်သည်ကို ပြဋ္ဌာန်းထားပါတယ်၊
( ဂ ) ၂၀၁၆ ခုနှစ်၊ ဆိုင်များနှင့်အလုပ်ဌာနများဥပဒေပုဒ်မ ၁၁ (ခ) အရ အချိန်ပို လုပ်သော နာရီစုစုပေါင်းသည် မည်သည့်ရက်သတ္တပတ်၌မဆို ၁၂ နာရီ ထက်မပိုစေရ၊ သို့ရာတွင် အထူးကိစ္စရပ်အနေဖြင့် လိုအပ်ချက် ရှိပါက ရက်သတ္တပတ်၌ ၁၆ နာရီထက်မပိုစေရ။ ထို့ပြင်ညဉ့်သန်းခေါင် ၁၂ နာရီ ထက် ကျော်လွန် လုပ်ကိုင်ခြင်းမပြုရဟု ပြဋ္ဌာန်းထားပါတယ်၊
(ဃ) ခွင့်ရက်နှင့် အလုပ်ပိတ်ရက် နည်းဥပဒေများ အပိုဒ် ၁၇ တွင် အများပြည်သူ အလုပ်ပိတ်ရက်တွင် အလုပ်လုပ်ရမည်ဆိုပါက အလုပ်သမား၏ဆန္ဒကို ရယူပြီး ယင်းနေ့မတိုင်မီ ဦးစီးဌာနသို့ ကြိုတင် ခွင့်ပြုမိန့် တောင်းခံရမည်။ ခွင့်ပြုချက်ရမှသာ အလုပ်ခိုင်းစေမည်ဟု ပြဋ္ဌာန်းထားပါတယ်၊
( င) ခွင့်ရက်နှင့် အလုပ်ပိတ်ရက် နည်းဥပဒေများ အပိုဒ် ၅၀ အပိုဒ်ခွဲ (ည) တွင် လုပ်ငန်းလိုအပ်ချက်အရ အများပြည်သူအလုပ်ပိတ်ရက်တွင် အလုပ် လုပ်ကိုင်လိုပါက အလုပ်သမား၏ သဘောဆန္ဒရယူ၍ စစ်ဆေးရေးအရာရှိထံ ပုံစံ(၈)ဖြင့် တင်ပြပြီး ခွင့်ပြုချက်ရယူ လုပ်ကိုင်ရမည်ဟု ပြဋ္ဌာန်းထားပါတယ်၊
( စ ) ၂၀၁၆ ခုနှစ်၊ အခကြေးငွေပေးချေရေး နည်းဥပဒေ ၂၀ တွင် အချိန်ပို အခကြေးငွေနှင့်စပ်လျဉ်း၍ လစားအလုပ်သမားများ၊ နေ့စားအလုပ်သမား များ၊ ပုတ်ပြတ် အလုပ်သမားများအတွက် အချိန်ပိုလုပ်ခ ခံစားခွင့်နှုန်းထား များ ပြဋ္ဌာန်းထားပါတယ်၊
(ဆ) အချိန်ပိုလုပ်ကိုင်ရန် လျှောက်ထားရမည့် လုပ်ငန်းစဉ်နှင့် လိုအပ်သည့် အချက်အလက်များ၊ အခြားသတ်မှတ်ချက်များနှင့်စပ်လျဉ်း၍ သက်ဆိုင်ရာ နေပြည်တော်ကောင်စီ၊ တိုင်းဒေသကြီး/ ပြည်နယ်/ ခရိုင်/ မြို့နယ်တာဝန်ခံ စစ်ဆေးရေးမှူးများထံ ဆက်သွယ်ဆောင်ရွက်နိုင်ပါတယ်၊
( ဇ ) ယခုအခါ တိုးတက်များပြားလာသော စက်ရုံ၊ အလုပ်ရုံများအနေဖြင့် အလုပ်သမားများ၏ အချိန်ပိုလုပ်ကိုင်ခွင့် ခွင့်ပြုမိန့် တင်ပြတောင်းခံရာတွင် ပိုမိုလျင်မြန်သေချာစွာ ဆောင်ရွက်နိုင်ရေးအတွက် ညွှန်ကြားရေးမှူးချုပ် ကိုယ်စား တိုင်းဒေသကြီး၊ ပြည်နယ်၊ အထူး စီးပွားရေးဇုန်၊ စက်မှု ဇုန်၊ ခရိုင်၊ မြို့နယ်များမှ တာဝန်ခံအရာရှိများမှ တည်ဆဲ ဥပဒေ၊ အမိန့်၊ ညွှန်ကြားချက် များနှင့်အညီ ပိုမိုလျင်မြန်သေချာစွာ စိစစ်ခွင့်ပြု ဆောင်ရွက်လျက်ရှိပါတယ်၊
( ဈ ) သက်ဆိုင်ရာ နေပြည်တော်ကောင်စီ၊ တိုင်းဒေသကြီး/ ပြည်နယ်၊ ခရိုင်/ စက်မှုဇုန်၊ အထူးစီးပွားရေးဇုန်၊ မြို့နယ်ရုံးများမှ စစ်ဆေးရေးအရာရှိများ အနေဖြင့် အသိပညာပေးဆွေးနွေးပွဲများ ဆောင်ရွက်ရာတွင် အချိန်ပို လုပ်ကိုင်ခွင့်နှင့်သက်ဆိုင်သည့် ဥပဒေ၊ နည်းဥပဒေ၊ အမိန့်နှင့်ညွှန်ကြားချက်များအား ထည့်သွင်းဆွေးနွေးနိုင်ရေးအတွက် တိုင်းဒေသကြီး/ ပြည်နယ် အလိုက် အသိပညာပေးဆွေးနွေးပွဲ လစဉ်စီမံချက် ချမှတ်ဆောင်ရွက်လျက်ရှိပါတယ်၊
(ည) ဤဦးစီးဌာန စည်းကြပ်ဥပဒေ၊ နည်းဥပဒေများ၊ အမိန့်၊ ညွှန်ကြားချက်များ၊ အလုပ်သမားရေးရာတိုင်ကြားစာများအပေါ် ဖြေရှင်းဆောင်ရွက်ပေးမှုများ၊ အလုပ်သမား ဥပဒေပါရပိုင်ခွင့်များ (အလုပ်ချိန်၊ နားချိန်၊ အချိန်ပိုနာရီ၊ ခွင့်ရက်၊ အလုပ်ပိတ်ရက်၊ အပတ်စဉ်နားရက်၊ လုပ်ခလစာ၊ အချိန်ပိုလုပ်ခ) နှင့်စပ်လျဉ်းသည့် လိုက်နာဆောင်ရွက်ရမည့် လုပ်ငန်းစဉ်များ၊ လမ်းညွှန်ချက်များကို အလုပ်သမားဝန်ကြီးဌာန Web Portal Website Social Media ၌ ကြည့်ရှုလေ့လာနိုင်ပါတယ်။
အလုပ်သမားရေးရာကိစ္စများ တိုင်ကြားလာပါက စနစ်တကျ မှတ်ပုံတင်၍ လက်ခံထားရှိခြင်း၊ ဤဦးစီးဌာနမှ စစ်ဆေးစည်းကြပ်သည့် ဥပဒေများနှင့် သက်ဆိုင်ပါက ဖြေရှင်းဆောင်ရွက် ပေးခြင်း၊ ဤဦးစီးဌာနမှ စစ်ဆေးစည်းကြပ်သည့် ဥပဒေများနှင့် မသက်ဆိုင်ပါက သက်ဆိုင်ရာဌာနသို့ လွှဲပြောင်းပေးပို့ခြင်း၊ တိုင်ကြားသူအား အခြေအနေများကို အသိပေး အကြောင်းကြားနိုင်ရေးအတွက် ဆက်သွယ်ရမည့် လိပ်စာယူထား၍ အခြေအနေကို ပြန်လည်ပြောကြားပေးခြင်းများဖြင့် ဖြေရှင်းဆောင်ရွက်ပေးလျက်ရှိပါတယ်။ ၁-၂-၂၀၂၂ ရက်နေ့မှ ၃၁-၁-၂၀၂၃ ရက်နေ့ကာလအထိ တိုင်ကြားခဲ့တဲ့ အမှုတွေထဲမှာ ညှိနှိုင်း ဖျန်ဖြေရေးအဖွဲ့ဖြင့် ဖြေရှင်းခဲ့တာက (၁၁)မှု၊ တိုင်းဒေသကြီး/ မြို့နယ်ပေါင်းစပ်အဖွဲ့ဖြင့် ဖြေရှင်းခဲ့တာက (၃၄)မှု၊ ဤဦးစီးဌာနဥပဒေနှင့်အညီ ဆောင်ရွက်ခဲ့တာက (၁၂၂)မှု၊ စုစုပေါင်း(၁၆၇)မှုမှာ (၁၆၅)မှု ဆောင်ရွက်ပြီးစီးခဲ့ပြီး (၂)မှုကတော့ ဆောင်ရွက်ဆဲ ကျန်ရှိနေပါတယ်။
ကင်းရှင်းရေးနှင့် ကျန်းမာရေးနှင့်စပ်လျဉ်း၍ မည်ကဲ့သို့ ဆောင်ရွက်ပေးနေပါသလဲ။
၁၉၅၁ ခုနှစ်၊ အလုပ်ရုံများအက်ဥပဒေ၊ ၂၀၁၆ ခုနှစ်၊ ဆိုင်နှင့် အလုပ်ဌာနများအက်ဥပဒေတို့နှင့်အညီ စက်ရုံ၊ အလုပ်ရုံ၊ ဆိုင်နှင့် အလုပ်ဌာနများရှိ အလုပ်သမားများရဲ့ လုပ်ငန်းခွင် ဘေးအန္တရာယ်ကင်းရှင်းရေးနဲ့ ကျန်းမာရေးအတွက် စစ်ဆေးစည်းကြပ်ခြင်း၊ လိုက်နာဆောင်ရွက်ရန် ညွှန်ကြားချက်များ ထုတ်ပြန်ခြင်း၊ အသိပညာပေးခြင်း၊ လုပ်ငန်းခွင် ပတ်ဝန်းကျင်အခြေအနေ တိုင်းတာအကဲဖြတ်ခြင်း၊ ဥပဒေပါပြဋ္ဌာန်းချက်များကို လိုက်နာဆောင်ရွက်မှု မရှိပါက တရားစွဲဆိုခြင်းတို့ကို ဆောင်ရွက်ပေးလျက်ရှိပါတယ်။
ဦးစီးဌာနက အလုပ်ရုံစစ်ဆေးရေးအရာရှိများအနေနဲ့ စက်ရုံ၊ အလုပ်ရုံ၊ ဆိုင်နှင့် အလုပ် ဌာနများရှိ အလုပ်သမားများရဲ့ လုပ်ငန်းခွင် ဘေးအန္တရာယ်ကင်းရှင်းရေးနဲ့ ကျန်းမာရေး အတွက် လစဉ်စီမံချက်များချမှတ်၍ စစ်ဆေးစည်းကြပ်ခြင်း၊ လုပ်ငန်းခွင် ထိခိုက်မှုများ ဖြစ်ပွားပါက အချိန်နှင့်တပြေးညီ သွားရောက်စစ်ဆေးခြင်း၊ မီးလောင်မှု၊ ပေါက်ကွဲမှု စတဲ့ ထူးခြားဖြစ်စဉ်များ ဖြစ်ပွားပါက သွားရောက်စစ်ဆေးခြင်း၊ စစ်ဆေးတွေ့ရှိမှုများအရ လိုက်နာဆောင်ရွက်ရန် ညွှန်ကြားချက်များ ထုတ်ပြန်ခြင်းတို့ကို ဆောင်ရွက်ပေးလျက်ရှိပါတယ်။
ဦးစီးဌာနက အလုပ်ရုံစစ်ဆေးရေးအရာရှိများအနေနဲ့ လစဉ်စီမံချက်များ ချမှတ်ကာ လုပ်ငန်းခွင်ဘေးအန္တရာယ်ကင်းရှင်းရေးနဲ့ ကျန်းမာရေးဆိုင်ရာ အသိပညာပေးခြင်းများကို ဆောင်ရွက်ပေးလျက်ရှိပြီး ရန်ကုန်တိုင်းဒေသကြီးမှာတော့ ရွေ့လျားသင်ထောက်ကူပြု မော်တော်ယာဉ် (Mobile Training Bus) အသုံးပြုကာ အသိပညာပေးခြင်းများကို ဆောင်ရွက်လျက်ရှိပါတယ်။
ရန်ကုန်တိုင်းဒေသကြီး၊ လှိုင်သာယာမြို့နယ်ရှိ အမျိုးသား လုပ်ငန်းခွင် ဘေးအန္တရာယ်ကင်းရှင်းရေးနဲ့ ကျန်းမာရေးဆိုင်ရာ သင်တန်းကျောင်းမှာတော့ စက်ရုံ၊ အလုပ်ရုံများမှ အလုပ်ရှင်၊ မန်နေဂျာနှင့် အလုပ်သမားအဖွဲ့အစည်းများမှ ကိုယ်စားလှယ်များအတွက် လုပ်ငန်းခွင်ဘေးအန္တရာယ်ကင်းရှင်းရေးနဲ့ ကျန်းမာရေးဆိုင်ရာ သင်တန်းများကို ဖွင့်လှစ် ပို့ချပေးလျက်ရှိပါတယ်။
လုပ်ငန်းခွင် ဆူညံသံနှင့် အလင်းရောင်တို့ကြောင့် အလုပ်သမားများရဲ့ လုပ်ငန်းခွင် ဘေးအန္တရာယ်ကင်းရှင်းရေးနှင့် ကျန်းမာရေးအပေါ် ထိခိုက်မှုမရှိစေရန်နဲ့ လုပ်ငန်းခွင် ပတ်ဝန်းကျင်အခြေအနေ တိုးတက်ကောင်းမွန်စေရန် ရည်ရွယ်ပြီး ဆူညံသံနှင့် အလင်း ရောင်ဆိုင်ရာ လုပ်ငန်းခွင် ပတ်ဝန်းကျင်အခြေအနေတွေကို အခမဲ့ တိုင်းတာဆောင်ရွက် ပေးလျက်ရှိပါတယ်။ ယခင်က ရန်ကုန်တိုင်းဒေသကြီးအတွင်းမှာသာ တိုင်းတာပေးနိုင် ခဲ့သော်လည်း ၂၀၂၂ ခုနှစ်ကစပြီး တိုင်းတာရေးကိရိယာများ တိုးချဲ့ဝယ်ယူပြီး မန္တလေး တိုင်းဒေသကြီး၊ ပဲခူးတိုင်းဒေသကြီးနဲ့ ဧရာဝတီတိုင်းဒေသကြီးများရှိ စက်ရုံ၊ အလုပ်ရုံများကိုပါ တိုင်းတာပေးနိုင်ခဲ့ပါတယ်။
တိုင်းဒေသကြီးတစ်ခုချင်းအလိုက် လစဉ်စီမံချက်တွေ ချမှတ်ပြီး လူဉီးရေထူထပ် များပြား တဲ့လုပ်ငန်းများ၊ ဆူညံသံထွက်ရှိမှုများပြားတဲ့ လုပ်ငန်းများနဲ့ အာရုံစူးစိုက်၍ ဆောင်ရွက်ရတဲ့လုပ်ငန်းများကို ဦးစားပေး တိုင်းတာပေးလျက်ရှိပါတယ်။
ဦးစီးဌာနအနေနဲ့ အာဆီယံ လုပ်ငန်းခွင်ဘေးအန္တရာယ်ကင်းရှင်းရေးနဲ့ ကျန်းမာရေး ကွန်ရက် (ASEAN Occupational Safety and Health – ASEAN-OSHNET) အဖွဲ့ဝင် နိုင်ငံအဖြစ် အာဆီယံဒေသတွင်း လုပ်ငန်းခွင် ဘေးအန္တရာယ်ကင်းရှင်းရေးနှင့် ကျန်းမာ ရေးဆိုင်ရာ ကိစ္စရပ်များကို ပူးပေါင်းပါဝင်ဆောင်ရွက်လျက်ရှိပါတယ်။ ၂၀၂၂-၂၀၂၃ ကာလ အတွင်း ကွန်ရက်အဖွဲ့၏ အလှည့်ကျဥက္ကဋ္ဌတာဝန်ကို ထမ်းဆောင်လျက်ရှိပြီး ၂၀၂၂ ခုနှစ်၊ စက်တင်ဘာလ၊ ၂၉ ရက်နေ့နှင့် ၃၀ ရက်နေ့တွေမှာ (၂၃) ကြိမ်မြောက် အာဆီယံ လုပ်ငန်းခွင် ဘေးအန္တရာယ်ကင်းရှင်းရေးနှင့် ကျန်းမာရေးကွန်ရက် ညှိနှိုင်းရေးအဖွဲ့ အစည်းအဝေး၊ (၉) ကြိမ်မြောက် အာဆီယံ လုပ်ငန်းခွင် ဘေးအန္တရာယ်ကင်းရှင်းရေးနှင့် ကျန်းမာရေးကွန်ရက် ညီလာခံ၊ (၄) ကြိမ်မြောက် အာဆီယံ လုပ်ငန်းခွင် ဘေးအန္တရာယ် ကင်းရှင်းရေးနှင့် ကျန်းမာရေးကွန်ရက် ဆုချီးမြှင့်ခြင်း အခမ်းအနားတို့ကို အိမ်ရှင်အဖြစ် ကျင်းပပြုလုပ်ခဲ့ပါတယ်။
ဦးစီးဌာနအနေနဲ့ လုပ်ငန်းခွင် ဘေးအန္တရာယ်ကင်းရှင်းရေးနဲ့ ကျန်းမာရေးဆိုင်ရာ ဆောင်ရွက်မှုကောင်းမွန်တဲ့ လုပ်ငန်းတွေကို ASEAN-OSHNET Excellence Award နဲ့ Best Practices Award တွေကို ၂ နှစ်တစ်ကြိမ် ဆုချီးမြှင့်လျက်ရှိပါတယ်။ ၂၀၁၆ ခုနှစ်မှ ၂၀၂၂ ခုနှစ်ထိ Excellence Award ဆုရ စက်ရုံ (၄) ရုံ၊ Best Practices Award ဆုရ စက်ရုံ (၄) ရုံတို့ကို ဆုများပေးအပ်ချီးမြှင့်ခဲ့ပါတယ်။
EC စာချုပ်အပိုဒ် ၁၅(ခ)(၄)အရ အလုပ်ရှင်သည် အလုပ်သမားအင်အားလျှော့ချခြင်း၊ အလုပ်ရပ်စဲခြင်းများအတွက် အလုပ်သမားအဖွဲ့အစည်းမရှိပါက အလုပ်သမားရေးရာလုပ်ငန်းညှိနှိုင်းရေးကော်မတီ(WCC) နှင့်ညှိနှိုင်းဆောင်ရွက်ရမည်ဖြစ်ပြီး အလုပ်သမားအဖွဲ့အစည်းရှိပါက အလုပ်သမားအဖွဲ့အစည်းကိုယ်စားလှယ်နှင့် ညှိနှိုင်းဆောင်ရွက်ရမည်ဖြစ်ပါတယ်။
အလုပ်သမားဝန်ကြီးဌာနအနေဖြင့် နိုင်ငံခြားဝင်ငွေရရှိရန် CMP လုပ်ငန်းများကြီးကြပ်ရေးကော်မတီကို ပြည်ထောင်စုဝန်ကြီးက ဥက္ကဌအဖြစ်ဆောင်ရွက်ပြီး အမြဲတမ်းအတွင်းဝန်မှ အတွင်းရေးမှူးအဖြစ်ဆောင်ရွက်ကာ အဖွဲ့ဝင် (၁၉)ဦးဖြင့် ဖွဲ့စည်းခဲ့ပါတယ်။ CMP လုပ်ငန်းများ ရေရှည်ဖွံ့ဖြိုးတိုးတက်ရှင်သန်စေရန် ကော်မတီကို အထောက်အကူပြုရန် ဆပ်ကော်မတီ(၃)ရပ်ဖြင့် အကြံပေးကော်မတီဖွဲ့စည်း၍ လုပ်ငန်းများဆောင်ရွက်လျက်ရှိပါတယ်။ CMP လုပ်ငန်းဆိုသည်မျာ ပြည်ပမှကုန်ကြမ်းများတင်သွင်းပြီး ကုန်ချော များထုတ်လုပ်ကာ ပြန်လည်တင်ပို့သည့် Cutting, Making, Packaging လုပ်ငန်းများဖြစ်ပါတယ်။ Garment နှင့် Non-Garment လုပ်ငန်းများသည် နိုင်ငံတော်အတွက် အထူးအရေးပါသည့် ကုန်ထုတ်လုပ်ငန်းများဖြစ်ခြင်း၊ တိုင်းပြည်၏ လုပ်သားအရင်းအမြစ်များကို အခြေခံ၍ နိုင်ငံခြားဝင်ငွေရရှိအောင် ဖန်တီးပေးသောလုပ်ငန်းဖြစ်သဖြင့် အလုပ်အကိုင်အခွင့်အလမ်းများ ဖန်တီးပေးနိုင်ပြီး တိုင်းပြည်၏ သွင်းကုန်၊ ထုတ်ကုန်အပိုင်းတွင် အဓိကအရေးပါတဲ့ အခန်းကဏ္ဍတစ်ခုဖြစ်ပါတယ်။
၂၀၁၃ ခုနှစ်၊ အလုပ်အကိုင်နှင့်ကျွမ်းကျင်မှုဖွံ့ဖြိုးတိုးတက်ရေးဥပဒေပုဒ်မ ၅ (ဃ) အရ EC စာချုပ်သက်တမ်းကာလထက်စော၍ လုပ်ငန်းပြီးဆုံးသွားလျှင်သော်လည်းကောင်း၊ မမျှော်လင့်သောအကြောင်းကြောင့် လုပ်ငန်းတစ်ခုလုံးကိုဖြစ်စေ၊ လုပ်ငန်းတစ်စိတ်တစ်ဒေသကို ဖြစ်စေ ရပ်စဲလိုက်ရလျှင်သော်လည်းကောင်း၊ အကြောင်းအမျိုးမျိုးကြောင့် အလုပ်ရပ်စဲရန် ကိစ္စပေါ်ပေါက်လာလျှင်သော်လည်းကောင်း အလုပ်ရှင်သည် အလုပ်သမားအား ဝန်ကြီးဌာနမှ ၃–၇–၂၀၁၅ ရက်စွဲပါအမိန့်ကြော်ငြာစာအမှတ် (၈၄/၂၀၁၅) ဖြင့် ထုတ်ပြန်ထားသည့် လုပ်သက်အလိုက် နစ်နာကြေးနှုန်းထားများအတိုင်း ပေးချေရမည်ဖြစ်ပါသည်။
လုပ်ငန်းခွင်အေးချမ်းသာယာစေရေး၊ မျှတသောလုပ်ငန်းခွင်ဆက်ဆံရေးစနစ် ကျင့်သုံး တတ်စေရေး၊ အလုပ်သမား ရေးရာဥပဒေ၊ နည်းဥပဒေနှင့် မူဝါဒလုပ်ထုံးလုပ်နည်းများအား အလုပ်ရှင်၊ အလုပ်သမားများက သိရှိလိုက်နာနိုင်ရေး အတွက် အလုပ်ရှင်များ၊ အလုပ်ရှင် ကိုယ်စားစီမံခန့်ခွဲသူများ၊ စက်ရုံအတွင်း အလုပ်သမားရေးရာလုပ်ငန်း ညှိနှိုင်းရေး ကော်မတီ (WCC) အဖွဲ့ဝင်များ၊ အလုပ်သမားများအား မိတ်ဖက်ဌာနများနှင့်ပေါင်းစပ်၍ စီမံချက်များ ချမှတ်ကာ အလုပ်သမားရေးရာအသိပညာပေးဆွေးနွေးပွဲများကို ကျင်းပပြုလုပ်ပေးလျက် ရှိရာ ၂၀၂၁ ခုနှစ်၊ ဖေဖော်ဝါရီလမှ ၂၀၂၃ ခုနှစ်၊ ဧပြီလအထိ စက်ရုံ၊ အလုပ်ရုံ၊ အလုပ်ဌာန ၂၇၀၇ ရုံမှ တက်ရောက်သူ အလုပ်ရှင်၊ အလုပ်သမား ၉၇၉၈၅ ဦးကို အသိပညာပေးဆွေးနွေး နိုင်ခဲ့ပါသည်။ ဆက်လက်၍ အလုပ်သမားရေးရာအသိပညာပေးဆွေးနွေးပွဲများ ပိုမိုဆောင်ရွက်နိုင်ရေး ဆောင်ရွက်သွားမှာဖြစ်ပါတယ်။
ကောင်းမွန်သည့် အလုပ်ရှင်၊ အလုပ်သမားဆက်ဆံရေးထူထောင်နိုင်ရန်အတွက် ဌာနမှ အစိုးရ၊ အလုပ်ရှင်၊ အလုပ် သမားသုံးပွင့်ဆိုင်တွေ့ဆုံဆွေးနွေးပွဲများကို ကျင်းပပြုလုပ်ပြီး စက်ရုံ၊ အလုပ်ရုံများနှင့် အလုပ်ရှင်နှင့်အလုပ်သမား များ၏ အခက်အခဲများကို တင်ပြစေ၍ လိုအပ်သည်များ ညှိနှိုင်းဖြေရှင်းဆောင်ရွက်ပေးလျက်ရှိသည့်အပြင် အလုပ်ခန့်ထားမှုဆိုင်ရာ သဘောတူညီချက်စာချုပ် (EC) အပိုဒ် ၁၇ ပါအတိုင်း အလုပ်ရှင်၏ တာဝန်ဝတ္တရားများ အလုပ်သမားများ၏ တာဝန်ဝတ္တရားများနှင့် အပိုဒ် ၁၄ ပါ အလုပ်သမားများ၏ စည်းကမ်းများအတိုင်း လိုက်နာ ဆောင်ရွက်ရန် လိုအပ်ပါတယ်။ သို့မှသာ လုပ်ငန်းခွင်အေးချမ်းသာယာရေးနှင့် အလုပ်ရှင်၊ အလုပ်သမား မျှတသော အလုပ်သမားရေးရာ ကျင့်စဉ်များ ရရှိနိုင်မည်ဖြစ်သည့်အတွက် အစိုးရ၊ အလုပ်ရှင်၊ အလုပ်သမား သုံးပွင့်ဆိုင် တွေ့ဆုံ ဆွေးနွေးမှုများ ဆက်လက်ဆောင်ရွက်သွားမည်ဖြစ်ပါကြောင်း၊ အလုပ်ရှင်၊ အလုပ်သမား ဆက်ဆံရေး ကောင်းမွန် စေရန် မြို့နယ်အဆင့်၊ တိုင်းဒေသကြီး/ပြည်နယ်အဆင့် မိတ်ဖက်ဌာနများနှင့် ပူးပေါင်း၍ အလုပ်သမားရေးရာ အသိပညာရေးဆွေးနွေးပွဲများကို ဆောင်ရွက်ပေးလျက်ရှိပါတယ်။
ကိုဗစ်-၁၉ ကူးစက်ရောဂါဖြစ်ပွားမှု အခြေအနေများကြောင့် စစ်တမ်းကောက်ယူနိုင်ခြင်း မရှိသော်လည်း လုပ်သားဆိုင်ရာ စာရင်းအင်းများ စဉ်ဆက်မပြတ်ရရှိရေးအတွက် ဆောင်ရွက်နိုင်မည့် နည်းလမ်းဖြစ်သော လုပ်သားဆိုင်ရာ စာရင်းအင်းများကို Projection တွက်ချက်ခြင်းနည်းလမ်းဖြင့် လုပ်ငန်းစီမံချက်ရေးဆွဲ၍ မိတ္ထီလာစီးပွားရေးတက္ကသိုလ်နှင့် Naypyidaw State Academy စာရင်းအင်းပညာတို့မှ ပါမောက္ခ ဆရာ၊ ဆရာမများ အကူအညီဖြင့် ၂၀၂၀-၂၀၂၃ ခုနှစ်၊ လုပ်သားအင်အား ခန့်မှန်းစာရင်းအင်းများ အစီရင်ခံစာ အား တွက်ချက်ထုတ်ပြန်ခဲ့ပြီးဖြစ်ပါသည်။
၂၀၂၀-၂၀၂၃ ခုနှစ်၊ လုပ်သားအင်အား ခန့်မှန်းစာရင်းအင်းများ အစီရင်ခံစာအရ ၂၀၂၀ ပြည့်နှစ် လုပ်သားအင်အား ၂၂.၆၂ သန်းပေါင်း၊ ၂၀၂၁ ခုနှစ် လုပ်သားအင်အား ၂၃.၀၇ သန်းပေါင်း၊ ၂၀၂၂ ခုနှစ် လုပ်သားအင်အား ၂၃.၅၂ သန်း ပေါင်းနှင့် ၂၀၂၂ ခုနှစ် လုပ်သားအင်အား ၂၃.၉၇ သန်းပေါင်းတို့ဖြစ်ပါတယ်။ အလုပ်လက်မဲ့နှုန်းအနေနဲ့ ၂၀၂၀ ပြည့်နှစ်တွင် ၀.၁၇ % ၊ ၂၀၂၁ ခုနှစ်တွင် ၁.၃၃ % ၊ ၂၀၂၂ ခုနှစ်တွင် ၂.၅၃ % နှင့် ၂၀၂၃ ခုနှစ်တွင် ၃.၆၉ % တို့ဖြစ်ပါတယ်။
၂၀၂၀-၂၀၂၃ ခုနှစ်၊ လုပ်သားအင်အား ခန့်မှန်းစာရင်းအင်းများ အစီရင်ခံစာကို စာရင်းအင်းနှင့်သက်ဆိုင်သည့် ဝန်ကြီးဌာနများ၊ စာကြည့်တိုက်များသို့ ဖြန့်ဝေပေးထားပြီး ဝန်ကြီးဌာန၏ Website ဖြစ်သည့် www.mol.gov.mm တွင်လည်း လေ့လာဖတ်ရှုပြီး download ရယူနိုင်ပါတယ်။
ကောင်းမွန်သည့် အလုပ်ရှင်၊ အလုပ်သမားဆက်ဆံရေးထူထောင်နိုင်ရန်အတွက် ဌာနမှ အစိုးရ၊ အလုပ်ရှင်၊ အလုပ် သမား သုံးပွင့်ဆိုင်တွေ့ဆုံဆွေးနွေးပွဲများကို ကျင်းပပြုလုပ်ပြီး စက်ရုံ၊ အလုပ်ရုံများမှ အလုပ်ရှင်နှင့် အလုပ်သမား များ၏ အခက်အခဲများကို တင်ပြစေ၍ လိုအပ်သည်များ ညှိနှိုင်းဖြေရှင်းဆောင်ရွက်ပေးလျက်ရှိသည့်အပြင် အလုပ် ခန့်ထားမှုဆိုင်ရာ သဘောတူညီချက်စာချုပ် (EC) အပိုဒ် ၁၇ (က) ပါအတိုင်း အလုပ်ရှင်၏ တာဝန်ဝတ္တရားများကို ဆောင်ရွက်ပေးရန် လိုအပ်သကဲ့သို့ အလုပ်သမားများဘက်မှလည်း အပိုဒ်(၁၇)(ခ)ပါ အလုပ်သမားများ၏ တာဝန် ဝတ္တရားများနှင့် အပိုဒ် ၁၄ ပါ အလုပ်သမားများ၏စည်းကမ်းများအတိုင်း လိုက်နာဆောင်ရွက်ရန် လိုအပ်ပါတယ်။ သို့မှသာ လုပ်ငန်းခွင်အေးချမ်းသာယာရေးနှင့် အလုပ်ရှင်၊ အလုပ်သမားမျှတသော အလုပ်သမားရေးရာကျင့်စဉ်များ ရရှိနိုင်မည်ဖြစ်သည့်အတွက် အစိုးရ၊ အလုပ်ရှင်၊ အလုပ်သမား သုံးပွင့်ဆိုင် တွေ့ဆုံဆွေးနွေးမှုများ ဆက်လက် ဆောင်ရွက်သွားမည်ဖြစ်ပါကြောင်း၊ အလုပ်ရှင်၊ အလုပ်သမားဆက်ဆံရေးကောင်းမွန်စေရန် မြို့နယ်အဆင့်၊ တိုင်းဒေသကြီး/ပြည်နယ်အဆင့် မိတ်ဖက်ဌာနများနှင့် ပူးပေါင်း အလုပ်သမားရေးရာ အသိပညာပေးဆွေးနွေးပွဲ များကို ဆောင်ရွက်ပေးလျက်ရှိပါတယ်။
လူ့စွမ်းအားဖွံ့ဖြိုးမှုအညွှန်းကိန်းများလက်စွဲစာအုပ် (Handbook on Human Resources Development Indicators) ကို မူဝါဒရေးဆွဲချမှတ်သူများ၊ စီမံကိန်းရေးဆွဲသူများနဲ့ စီမံ ခန့်ခွဲကြီးကြပ်သူများက နိုင်ငံတော်ရဲ့ စီးပွားရေး၊ လူမှုရေး ပြောင်းလဲဖြစ်ပေါ်နေမူများကို လေ့လာသုံးသပ်ရာမှာ မှန်ကန်ကိုက်ညီမှုရှိတဲ့ စာရင်းအင်းကိန်းဂဏန်း အချက်အလက် တွေကို အလွယ်တကူရရှိစေရန်နဲ့ အစိုးရဌာနတွေ၊ သုတေသနပြုသူတွေ၊ NGO တွေနဲ့ ဘွဲ့လွန်ကျောင်းသား/ ကျောင်းသူတွေအတွက် အထောက်အကူဖြစ်စေနိုင်ဖို့ ရည်ရွယ် ထုတ်ဝေခြင်းဖြစ်ပါသည်။ စတင်ပြုစုထုတ်ဝေစဉ်က အညွှန်းကိန်း ၅၅ ခုသာပါရှိခဲ့ပေမယ့် ယခုအခါ အညွှန်းကိန်း ၆၂ ခုထိ တိုးမြှင့်ဆောင်ရွက်နိုင်ခဲ့ပြီး ဖြစ်ပါတယ်။ ဒီလက်စွဲ စာအုပ် မှာ မိမိတို့တိုင်းပြည်ရဲ့ စီးပွားရေး၊ လူမှုရေး ကဏ္ဍအသီးသီးနဲ့ လွှမ်းခြုံသက်ဆိုင်တဲ့ အညွှန်းကိန်းများအပြင် ကျန်းမာရေး၊ ပညာရေး၊ လူမှုရေးကဏ္ဍစသဖြင့် အညွှန်းကိန်းများ စုံလင်စွာ ပြုစုဖော်ပြထားရှိပါတယ်။
ဒီလက်စွဲစာအုပ်မှာ အညွှန်းကိန်းများစုံလင်စွာ ပြုစုဖော်ပြနိုင်ရေးအတွက် လူ့စွမ်းအား ဖွံ့ဖြိုးမှုအညွှန်းကိန်းနဲ့ သက်ဆိုင်တဲ့ဝန်ကြီးဌာန၂၁ ဌာနရှိ ဦးစီးဌာန ၄၅ ဌာန၊ အဖွဲ့အစည်း ၂ ခုနဲ့ ကော်မတီ ၁ ခုတို့ကပေးပို့တဲ့ နိုင်ငံရဲ့ လူဦးရေ၊ ပညာရေး၊ ကျန်းမာရေး၊ အလုပ် အကိုင်၊ စိုက်ပျိုးရေး၊ ကျွမ်းကျင်မှုသင်တန်းများနဲ့ မြေယာအသုံးချမှု အစရှိတဲ့ အညွှန်းကိန်း ၆၂ ခုနဲ့ ၆ နှစ်စာ အချက်အလက်တွေကို ပံ့ပိုးပေးနေပါတယ်။
အညွှန်းကိန်းနှင့်သက်ဆိုင်သော ဌာနများမှ အချက်အလက်များအားတောင်းခံ၍ စာအုပ် မူကြမ်းပြုစုပြီး လူ့စွမ်းအားဖွံ့ဖြိုးမှု အညွှန်းကိန်းများလက်စွဲစာအုပ် ပုံမှန်ပြုစုထုတ်ပြန် နိုင်ရေး အထောက်အကူပြုလုပ်ငန်းအဖွဲ့ (Core Working Group – CWG) အစည်းအဝေးနဲ့ လူ့စွမ်းအားဖွံ့ဖြိုးမှု အညွှန်းကိန်းအသုံးပြုသူများ၏ အလုပ်ရုံဆွေးနွေးပွဲတို့ကို ကျင်းပပြီး ဆွေးနွေးပွဲမှ အကြံပြုချက်များ၊ ဆွေးနွေးချက်များ၊ ပြင်ဆင်အတည်ပြုချက်များအရ ပြင်ဆင်ပြုစုပြီး ဝန်ကြီးဌာနသို့ တင်ပြအတည်ပြုချက်ရယူ၍ ပုံနှိပ်ထုတ်ဝေကာ ဝန်ကြီး ဌာနများ၊ ဦးစီးဌာန၊ အဖွဲ့အစည်း၊ ကော်မတီများ၊ နိုင်ငံ့ဝန်ထမ်းတက္ကသိုလ်များ၊ စီးပွားရေး တက္ကသိုလ်များ၊ စာကြည့်တိုက်များသို့ ဖြန့်ဝေခဲ့ပါတယ်။ ဝန်ကြီးဌာနရဲ့ Website ဖြစ်တဲ့ www.mol.gov.mm မှ ထုတ်ဝေပြီးတဲ့ စာအုပ်များကို PDF file download ရယူနိုင် ပါတယ်။