(၂၃)ကြိမ်မြောက် အာဆီယံလူဝင်မှုကြီးကြပ်ရေး ညွှန်ကြားရေးမှူးချုပ်များနှင့် နိုင်ငံခြားရေး ဝန်ကြီးဌာန၊ ကောင်စစ်ရေးရာအကြီးအကဲများအစည်းအဝေး (DGICM) နှင့်ဆက်စပ်အစည်းအဝေးများဖွင့်ပွဲ နေပြည်တော်၌ကျင်းပ။

နေပြည်တော်၊ ဩဂုတ် ၂၀ ။
မြန်မာနိုင်ငံမှ အိမ်ရှင်အဖြစ် လက်ခံကျင်းပသည့် (၂၃)ကြိမ်မြောက် အာဆီယံလူဝင်မှုကြီး ကြပ်ရေး ညွှန်ကြားရေးမှူးချုပ်များနှင့် နိုင်ငံခြားရေးဝန်ကြီးဌာန၊ ကောင်စစ်ရေးရာအကြီးအကဲ များအစည်းအဝေး (DGICM)နှင့် ဆက်စပ်အစည်းအဝေးများ ဖွင့်ပွဲအခမ်းအနားကို ဩဂုတ်လ (၂၀)ရက် ယနေ့နံနက် (၉)နာရီက နေပြည်တော်ရှိ Hilton Hotel ၌ ကျင်းပရာ အခမ်းအနားသို့ အလုပ်သမား၊ လူဝင်မှုကြီးကြပ်ရေးနှင့် ပြည်သူ့အင်အားဝန်ကြီးဌာန၊ အမြဲတမ်းအတွင်းဝန် ဦးအေးလွင်၊ လူဝင်မှုကြီးကြပ်ရေးဦးစီးဌာန ညွှန်ကြားရေးမှူးချုပ် ဦးဌေးလှိုင်၊ နိုင်ငံခြားရေး ဝန်ကြီးဌာနနှင့် ပြည်ထဲရေးဝန်ကြီးဌာနတို့မှ တာဝန်ရှိသူများ၊ အာဆီယံအတွင်းရေးမှူးချုပ်ရုံးနှင့် အာဆီယံနိုင်ငံများမှ အဆင့်မြင့်အရာရှိကြီးများ၊ ဖိတ်ကြားထားသူများတက်ရောက်ကြသည်။
သတင်းအပြည့်အစုံ…

IMG_0584

IMG_0602

AMM_5202

နေပြည်တော် ဩဂုတ် ၁၉ ရက်
အလုပ်သမား၊ လူဝင်မှုကြီးကြပ်ရေးနှင့် ပြည်သူ့အင်အားဝန်ကြီးဌာန၊ ပြည်ထောင်စုဝန်ကြီး ဦးသိန်းဆွေ သည် အပြည်ပြည်ဆိုင်ရာအလုပ်သမားရေးရာအဖွဲ့ (ILO) မှ ဆက်သွယ်ရေးအရာရှိ ဖြစ်သူ Mr. Donglin Li ဦးဆောင်သော ကိုယ်စားလှယ်အဖွဲ့အား ယနေ့နံနက် ၁၀:၀၀ နာရီအချိန် တွင် နေပြည်တော်ရှိ အဆိုပါဝန်ကြီးဌာန ၊ အစည်းအဝေးခန်းမတွင် လက်ခံတွေ့ဆုံသည်။
ထိုသို့တွေ့ဆုံရာတွင် ၂၀၁၉ခုနှစ်၊ ဇွန်လ၁၀ရက်နေ့မှ၂၁ရက်နေ့ထိ ဆွစ်ဇာလန်နိုင်ငံ၊ဂျီနီဗာ မြို့၌ ကျင်းပခဲ့သည့် ၁၀၈ကြိမ်မြောက် အပြည်ပြည်ဆိုင်ရာအလုပ်သမားရေးရာ ညီလာခံတွင် ILO အစည်းအဝေးဆုံးဖြတ်ချက်များနှင့်ပတ်သက်၍ ဝန်ကြီးဌာနအပါအဝင် အခြားသက်ဆိုင်ရာ ဝန်ကြီး ဌာနများပူးပေါင်း၍တိုးတက်အောင်ဆောင်ရွက်လျက်ရှိသည့် အခြေအနေများနှင့် ပတ်သက်၍ လည်းကောင်း၊ အစိုးရ၊ အလုပ်ရှင်၊ အလုပ်သမားသုံးပွင့်ဆိုင် ဆွေးနွေးပွဲ NTDF ကျင်းပနိုင်ရေးကိစ္စ ရပ်များနှင့် အဆိုပါဆွေးနွေးပွဲမှရလဒ်အစီရင်ခံစာများအား လာမည့် အောက်တိုဘာလ နှင့်နိုဝင်ဘာ လများတွင် ကျင်းပပြုလုပ်မည့် ILO ၏ GB အစည်းအဝေးများတွင် မြန်မာနိုင်ငံ၏ဆောင်ရွက် ချက်များကိုတင်ပြနိုင်ရေးအတွက် အထောက်အကူပြုလုပ်ငန်းစဉ်များ ဆောင်ရွက်သွားနိုင်ရေး တို့နှင့်ပတ်သက်၍လည်းကောင်း၊ ILO အနေဖြင့် မြန်မာနိုင်ငံနှင့် ပူးပေါင်းဆောင်ရွက်နေသည့် စီမံကိန်း ၁၉ခု အနက်ဝန်ကြီးဌာနနှင့်ဆောင်ရွက်နေသည့် ကလေးအလုပ်သမားဆိုင်ရာကိစ္စရပ်များ၊ ဓမ္မခိုင်းစေမှုပပျောက်ရေးဆိုင်ရာကိစ္စရပ်များ၊ အလုပ်သမားအခွင့်အရေးဆိုင်ရာကိစ္စရပ်များ၊ အလုပ် သမားဥပဒေဆိုင်ရာကိစ္စရပ်များနှင့် ပတ်သက်၍ဖြစ်ပေါ်တိုးတက်မှုအခြေအနေများနှင့် ပတ်သက်၍ လည်းကောင်း၊ မြန်မာနိုင်ငံအနေဖြင့်ILO၏ကွန်ဗန်းရှင်းအမှတ် ၁၃၈ အားလက်မှတ်ရေးထိုးနိုင်ရေး အတွက် အခြားသောဝန်ကြီးဌာနများ၏ သဘောထားမှတ်ချက်များရယူ၍ စတင်ဆောင်ရွက်လျက် ရှိရာအမြန်ဆုံးအတည်ပြုနိုင်ရေး ကိစ္စရပ်များနှင့်ပတ်သက်၍လည်းကောင်း၊ ကာကွယ်ရေးဝန်ကြီး ဌာန မှ အဓမ္မခိုင်းစေမှုဆိုင်ရာကိစ္စရပ်များတွင် ဆောင်ရွက်ပြီး၊ ဆောင်ရွက်ဆဲနှင့် ဆောင်ရွက်ရန် ကျန်ရှိသည့်အမှုကိစ္စရပ်များနှင့်ပတ်သက်၍လည်းကောင်း၊ အဓမ္မခိုင်းစေမှုပပျောက်ရေးဆိုင်ရာကိစ္စ ရပ်များနှင့်ပတ်သက်၍ ဥပဒေပညာပေးသင်တန်းများဖွင့်လှစ်ခြင်းနှင့် အသိပညာပေးလုပ်ငန်းများ ဆောင်ရွက်ခြင်းနှင့်ပတ်သက်၍လည်းကောင်း၊ အလုပ်သမားရေးရာပူးပေါင်းဆောင်ရွက်ရေးလုပ်ငန်း ကော်မတီ (High Level Working Group – HLWG) တွင်အသေးစိတ်ဆက်လက် ဆောင်ရွက်သွား မည့်အစီအမံများနှင့်ပတ်သက်၍လည်းကောင်း ILO နှင့် ပိုမိုနီးကပ်စွာ ဆက်လက်ပူးပေါင်းဆောင် ရွက်သွားမည့်အခြေအနေများနှင့်ပတ်သက်၍ နှစ်ဖက်အပြန်အလှန် ရင်းနှီးပွင့်လင်းစွာ အမြင်ခြင်း ဖလှယ်ဆွေးနွေးခဲ့ကြပါသည်။
အဆိုပါတွေ့ဆုံပွဲသို့ ပြည်ထောင်စုဝန်ကြီး နှင့်အတူ အမြဲတမ်းအတွင်းဝန်၊ ညွှန်ကြားရေးမှူး ချုပ်များနှင့် တာဝန်ရှိသူများ တက်ရောက်ခဲ့ကြကြောင်းသတင်းရရှိသည်။

ရန်ကုန်မြို့ ဩဂုတ်လ ၁၆ ရက်

မြန်မာနိုင်ငံအတွင်းရှိ စက်ရုံအလုပ်ရုံနှင့် အလုပ်ဌာနများတွင် ဘေးအန္တရာယ် ကင်းရှင်းပြီး ကျန်းမာရေးနှင့်ညီညွတ်သည့် လုပ်ငန်းခွင်များ ဖြစ်ပေါ်လာစေရေးအတွက် လုပ်ငန်းခွင်ဘေးအန္တရာယ် ကင်းရှင်းရေးနှင့်ကျန်းမာရေးဆိုင်ရာအသိအမြင်မြှင့်တင်ပေးနိုင်ရန်ရည်ရွယ်၍ ရန်ကုန်တိုင်းဒေသကြီး၊ အလုပ်ရုံနှင့်အလုပ်သမားဥပဒေစစ်ဆေးရေးဦးစီးဌာန၊ လှိုင်သာယာစက်မှုဇုန်ရုံး မြေကွက်လပ်တွင် ဂျပန်နိုင်ငံအစိုးရ၏ Grant Assistance for Grassroots Human Security Projects (GGP) အစီအစဉ်အရ တည်ဆောက်လှူဒါန်းသည့် အမျိုးသား လုပ်ငန်းခွင်ဘေးအန္တရာယ်ကင်းရှင်းရေးနှင့် ကျန်းမာရေး သင်တန်းကျောင်း လွှဲပြောင်းပေးအပ်ပွဲ အခမ်းအနားကို ၁၆-၈-၂၀၁၉ရက်နေ့ (၀၉:၃၀) နာရီတွင် အဆိုပါသင်တန်းကျောင်း၌ ကျင်းပခဲ့ရာ အလုပ်သမား၊ လူဝင်မှုကြီးကြပ်ရေးနှင့်ပြည်သူ့ အင်အားဝန်ကြီးဌာန၊ ပြည်ထောင်စုဝန်ကြီး ဦးသိန်းဆွေ၊ ရန်ကုန်တိုင်းဒေသကြီးအစိုးရအဖွဲ့ လူဝင်မှုကြီးကြပ်ရေးနှင့် လူ့စွမ်းအား အရင်းအမြစ်ဝန်ကြီးဌာန၊ ဝန်ကြီး ဒေါ်မိုးမိုးစုကြည်၊ မြန်မာနိုင်ငံဆိုင်ရာ ဂျပန်သံရုံးမှ သံအမတ်ကြီး H.E Ichiro MARUYAMA ၊ မြန်မာနိုင်ငံဆိုင်ရာ ILO ရုံးတို့မှ တာဝန်ရှိသူ များနှင့် အလုပ်ရှင်၊ အလုပ်သမား အဖွဲ့အစည်းများမှ ကိုယ်စားလှယ်များ၊ ဖိတ်ကြားထားသူများ တက်ရောက်ခဲ့သည်။

အဆိုပါသင်တန်းကျောင်း လွှဲပြောင်းပေးအပ်ပွဲ အခမ်းအနားကို ပြည်ထောင်စုဝန်ကြီးနှင့် မြန်မာနိုင်ငံဆိုင်ရာဂျပန်သံအမတ်ကြီးတို့က ဖဲကြိုးဖြတ် ဖွင့်လှစ်ခြင်း၊ သင်တန်းကျောင်း လှူဒါန်းမှု ကြေးပြားမှတ်တမ်းအား အမွှေးနံ့သာဖြင့်ပတ်ဖြန်းခြင်းတို့ ပြုလုပ်ပြီး သင်တန်းကျောင်း စုဝေးခန်းမ တွင် အခမ်းအနားကို ဆက်လက်ကျင်းပရာ ပြည်ထောင်စုဝန်ကြီး၊ မြန်မာနိုင်ငံဆိုင်ရာဂျပန်သံ အမတ်ကြီး၊ အလုပ်ရှင်အဖွဲ့အစည်းကိုယ်စားလှယ်နှင့် မြန်မာနိုင်ငံလုံး ဆိုင်ရာ အလုပ်သမားသမဂ္ဂများအဖွဲ့ချုပ်မှ ကိုယ်စားလှယ်တို့က အမှာစကားအသီးသီး ပြောကြားခဲ့ကြပြီး မြန်မာနိုင်ငံဆိုင်ရာ ဂျပန်သံအမတ်ကြီးမှ အလုပ်ရုံနှင့်အလုပ်သမားဥပဒေစစ်ဆေးရေးဦးစီးဌာန ညွှန်ကြားရေးမှူးချုပ် ထံသို့ သင်တန်းကျောင်းတည်ဆောက်လှူဒါန်းမှုဆိုင်ရာ မှတ်တမ်းအထောက်အထားများကို လွှဲပြောင်း ပေးအပ်ခြင်းနှင့် သင်တန်းကျောင်းတွင် အသုံးပြုရန် လိုအပ်သော သင်ထောက်ကူ ပစ္စည်းများကို ထောက်ပံ့ပေးခဲ့သည့် UPG Paint Co.,Ltd မှ တာဝန်ရှိသူအား အလုပ်ရုံနှင့်အလုပ်သမားဥပဒေ စစ်ဆေးရေးဦးစီးဌာန ညွှန်ကြားရေးမှူးချုပ်မှ ဂုဏ်ပြုမှတ်တမ်းလွှာ ပေးအပ်ခြင်းတို့ ဆောင်ရွက်ခဲ့ ပါသည်။

၎င်းနောက် ပြည်ထောင်စုဝန်ကြီး၊ ဧည့်သည်တော်များနှင့် တက်ရောက်လာသူများမှ သင်တန်းကျောင်းအား လှည့်လည်ကြည့်ရှုခဲ့ ကြကြောင်း သတင်းရရှိပါသည်။

အဆိုပါသင်တန်းကျောင်းကို ဂျပန်နိုင်ငံ အစိုးရ၏ အကူအညီဖြင့် အမေရိကန် ဒေါ်လာ (၉၀၃၁၂)ကုန်ကျခံတည်ဆောက်ပေးခဲ့ကြောင်းနှင့် ဤသင်တန်းကျောင်းတည်ဆောက်ခြင်းကြောင့် လုပ်ငန်းခွင်ဘေးအန္တရာယ်ကင်းရှင်းရေးနှင့်ကျန်းမာရေးဆိုင်ရာဥပဒေအား အကောင်အထည်ဖော် ဆောင်ရွက်ရာတွင်ထိရောက်မှုရှိစေရန်နှင့်ဘေးအန္တရာယ်ကင်းရှင်းပြီး ကျန်းမာရေးနှင့်ညီညွတ်သည့် လုပ်ငန်းခွင်များ ဖြစ်ပေါ်လာစေရန် ရည်ရွယ်၍ အလုပ်ရှင်၊ အလုပ်သမားနှင့် သက်ဆိုင်သူများ (Stakeholders)တို့အတွက် လုပ်ငန်းခွင်ဘေးအန္တရာယ်ကင်းရှင်းရေးနှင့်ကျန်းမာရေးဆိုင်ရာ အသိ အမြင်မြှင့်တင်ခြင်း၊ သင်တန်းများဖွင့်လှစ်ပို့ချခြင်းတို့ကို ဆောင်ရွက်သွားမည်ဖြစ်ကြောင်းသတင်း ရရှိပါသည်။

နေပြည်တော် သြဂုတ် ၁၆
အလုပ်သမား၊ လူဝင်မှုကြီးကြပ်ရေးနှင့် ပြည်သူ့အင်အားဝန်ကြီးဌာနနှင့် အပြည်ပြည် ဆိုင်ရာအလုပ်သမားရေးရာအဖွဲ့ -ILO တို့ပူးပေါင်း၍ ၁၂ ကြိမ်မြောက် ရွှေ့ပြောင်းအလုပ်သမား ဆိုင်ရာ အာဆီယံဖိုရမ်အတွက် နိုင်ငံအဆင့်သုံးပွင့်ဆိုင် အကြိုလုပ်ငန်းညှိနှိုင်းအစည်းအဝေးကို ၁၆-၈-၂၀၁၉ ရက်နေ့တွင် နေပြည်တော်၊ သင်္ဂဟဟိုတယ်၌ ကျင်းပခဲ့ရာ အကြိုလုပ်ငန်းညှိနှိုင်း အစည်းအဝေး ဖွင့်ပွဲအခမ်းအနားတွင် အလုပ်သမား၊ လူဝင်မှုကြီးကြပ်ရေးနှင့် ပြည်သူ့အင်အား ဝန်ကြီးဌာန၊ အလုပ်သမားရေးရာဆိုင်ရာ အမြဲတမ်းအတွင်းဝန် ဦးမျိုးအောင် ၊ Australian Department of Foreign Affairs and Trade (DFAT) မှ ကိုယ်စားလှယ်၊ Embassy of Canada to Myanmar မှ Counsellor Ms. Eileen Stewart နှင့် အပြည်ပြည်ဆိုင်ရာအလုပ်သမားရေးရာ အဖွဲ့(ILO-Yangon) မှ Liaison Officer Mr. Donglin Li တို့ကအဖွင့်အမှာစကားများ ပြောကြားခဲ့ပြီး ဌာနဆိုင်ရာအကြီးအကဲများ၊ ပြည်သူ့လွှတ်တော်နှင့် အမျိုးသားလွှတ်တော်တို့မှ ကိုယ်စားလှယ်များ၊ တိုင်းဒေသကြီး/ပြည်နယ်အစိုးရအဖွဲ့မှကိုယ်စားလှယ်များ၊ အပြည်ပြည်ဆိုင်ရာအလုပ်သမားရေးရာ အဖွဲ့-ILOမှ ကိုယ်စားလှယ်များ၊ UN/ INGO/ NGO မှ ကိုယ်စားလှယ်များ၊ အလုပ်ရှင်နှင့် အလုပ် သမားအဖွဲ့အစည်းများမှ ကိုယ်စားလှယ်များနှင့် အရပ်ဖက် လူမှုအဖွဲ့အစည်းများမှ ကိုယ်စားလှယ် များအပါအဝင် စုစုပေါင်း ၇၆ ဦးခန့် တက်ရောက်ခဲ့သည်။
အဆိုပါ အစည်းအဝေးကို ယခင်နှစ်များက ကျင်းပခဲ့သော ရွှေ့ပြောင်းအလုပ်သမားဆိုင်ရာ အာဆီယံဖိုရမ်များ၏ အကြံပြုချက်များကို အကောင်အထည်ဖော်ခြင်းနှင့်ပတ်သက်၍ တိုးတက်မှု အခြေအနေများ စဉ်းစားသုံးသပ်ရန်၊ ၁၂ကြိမ်မြောက် အာဆီယံဖိုရမ်၏ ခေါင်းစဉ်ခွဲ (၂) ရပ်ဖြစ် သည့် ရေရှည်ဖွံ့ဖြိုးတိုးတက်၍ မျှတပြီး တန်းတူညီမျှမှုရှိသော ကာကွယ်စောင့်ရှောက်မှုဆိုင်ရာ စိန်ခေါ်မှုများနှင့် ရွှေ့ပြောင်းအလုပ်သမားများ အလုပ်အကိုင် ရရှိရေးဆိုင်ရာ စိန်ခေါ်မှုများတို့နှင့် စပ်လျဉ်းသည့် အကြောင်းအရာများကို ဆွေးနွေးရန်နှင့် ၁၂ ကြိမ်မြောက် အာဆီယံဖိုရမ်သို့ တက်ရောက်ကြမည့် ကိုယ်စားလှယ်များအတွက် အကြံပြုချက်များ ပြင်ဆင်နိုင်ရန် ရည်ရွယ်ကျင်းပခြင်း ဖြစ်သည်။
အမြဲတမ်းအတွင်းဝန် ဦးမျိုးအောင် က ရွှေ့ပြောင်းအလုပ်သမားများ ၏ အခွင့်အရေးများ ကာကွယ်စောင့်ရှောက်ခြင်းနှင့် မြှင့်တင်ခြင်းဆိုင်ရာ အာဆီယံကြေငြာစာတမ်းပါ အခြေခံမူများ အား ထိရောက်စွာအကောင်အထည်ဖော်နိုင်ရန် နှစ်စဉ်အကြိုညှိနှိုင်းအစည်းအဝေးကျင်းပပြီး အကြံပြုချက်များ ရယူခဲ့ကြောင်း၊ ယခုနှစ်တွင် ထိုင်းနိုင်ငံ၌ စက်တင်ဘာလ ၂၅ ရက်နေ့ မှ ၂၆ ရက်နေ့ထိ ၁၂ ကြိမ်မြောက် ရွှေ့ပြောင်းအလုပ်သမားများဆိုင်ရာ အာဆီယံဖိုရမ်ကို “အနာဂတ် အလုပ်အကိုင်နှင့် ရွှေ့ပြောင်းသွားလာခြင်း” ဆိုသည့် ခေါင်းစဉ်ဖြင့် ကျင်းပသွားမည် ဖြစ်ကြောင်း၊ ယခုအစည်းအဝေးမှ ရရှိလာမည့် ရလဒ်များကို ၁၂ ကြိမ်မြောက် ဖိုရမ်တွင် ထည့်သွင်းဆွေးနွေး သွားမည်ဖြစ်ပြီး၊ အာဆီယံဒေသတွင်း ရွှေ့ပြောင်းအလုပ်သမားများ ကြုံတွေ့နေရသည့် အဓိက ကိစ္စရပ်များတွင် အစိုးရ၊ အလုပ်ရှင်၊ အလုပ်သမားနှင့် အရပ်ဖက်လူမှု အဖွဲ့အစည်းတို့အကြား ပွင့်ပွင့်လင်းလင်းချပြဆွေးနွေးနိုင်သည့် ဆွေးနွေးပွဲဖြစ်ကြောင်း မြန်မာနိုင်ငံတွင် သုံးပွင့်ဆိုင်အကြို လုပ်ငန်းညှိနှိုင်းအစည်းအဝေးများကို ပဉ္စမအကြိမ် အကြိုလုပ်ငန်းညှိနှိုင်း အစည်းအဝေးမှ စတင် ကျင်းပခဲ့သည်ဖြစ်၍ ယခု ၈ ကြိမ်မြောက် ကျင်းပခြင်း ဖြစ်ကြောင်း ပြောကြားခဲ့ပါသည်။
ယနေ့ကမ္ဘာတွင် နည်းပညာများ တိုးတက်မြင့်မားလာသည်နှင့်အမျှ အခြေခံအလုပ်သမား များအနေဖြင့် နည်းပညာအသုံးပြုသည့် လုပ်ငန်းများတွင် လုပ်ကိုင်နိုင်ရန် စိန်ခေါ်မှုများနှင့် ကြုံတွေ့နိုင်ကြောင်း၊ အလုပ်သမားများသည် ကျောင်းနှင့် တက္ကသိုလ်များမှ ရရှိသည့် သင်ခန်းစာ နှင့်သာ ရောင့်ရဲတင်းတိမ် မနေသင့်ဘဲ ဆင့်ပွားလေ့လာသင်ယူမှုနဲ့ သက်မွေးမှုအတတ်ပညာများ၊ အထူးသဖြင့် လုပ်ငန်းခွင်အတွင်း လေ့လာသင်ယူခြင်းဖြင့် အနာဂတ် အလုပ်အကိုင် အခွင့်အလမ်း တိုင်းအတွက် အရေးကြီးလာကြောင်း၊ နည်းပညာတိုးတက်မှု၊ ရာသီဥတုပြောင်းလဲမှု၊ လူဦးရေ ပြောင်းလဲလာမှုများနှင့် ကမ္ဘာလုံးဆိုင်ရာဖြစ်စဉ် Globalization တို့သည် အလုပ်အကိုင်ရပ်ဝန်း များ ပြောင်းလဲစေရန် ဦးတည်နေကြောင်း၊ ပြောင်းလဲမှုများသည် လျှင်မြန်လျက်ရှိပြီး အလုပ် အကိုင်ပုံသဏ္ဍန်များ၊ လုပ်ငန်းခွင်ဆက်ဆံရေးများ၊ ကျွမ်းကျင်မှုလိုအပ်ချက်များ၊ လူမှုဖူလုံရေး၊ နည်းပညာထုတ်လုပ်မှုများ၊ အလုပ်အကိုင်အဖွဲ့အစည်းများ၊ အလုပ်အကိုင်စီမံခန့်ခွဲမှုများနှင့် သုံးပွင့်ဆိုင်ပူးပေါင်း ဆောင်ရွက်မှုတို့အပေါ် ကြီးမားသည့်သက်ရောက်မှုကို ဖြစ်ပေါ်စေကြောင်း ပြောကြားခဲ့ပါသည်။
မြန်မာနိုင်ငံ၏ Myanmar Sustainable Development Plan- MSDP (ရေရှည်တည်တံ့ သောဖွံ့ဖြိုးမှုစီမံချက်) တွင် အလုပ်သမား ရေးရာနှင့်ပတ်သက်၍ အာဆီယံ၏ကတိကဝတ်များ၊ ကမ္ဘာလုံးဆိုင်ရာ ရေရှည်ဖွံ့ဖြိုးမှု ရည်မှန်းချက်ပန်းတိုင်များနှင့်အညီ ရေးဆွဲခဲ့ပြီး အဆိုပါ စီမံချက် ပါ လုပ်ငန်းအစီအစဉ်များကို ဝန်ကြီးဌာနများနှင့် မိတ်ဖက်အဖွဲ့အစည်းများမှ ကဏ္ဍအစုံ ပါဝင် ဆောင်ရွက်လျက်ရှိကြောင်း၊ မြန်မာနိုင်ငံတွင် ဆင်းရဲနွမ်းပါးမှု လျှော့ချနိုင်ရေးနှင့်နိုင်ငံတော်အစိုးရ၏ ပြုပြင်ပြောင်းလဲမှုလုပ်ငန်းစဉ်များကိုအထောက်အကူပြုရန်အလုပ်လုပ်နိုင်သည့်အသက်အရွယ်ရှိ အမျိုးသား၊ အမျိုးသမီးများ သင့်လျော်ကောင်းမွန်သည့် အလုပ်အကိုင်ရရှိစေရေး၊ သုံးပွင့်ဆိုင် ကိုယ်စားလှယ်များ ဆွေးနွေးညှိနှိုင်းရေးဆွဲထားသော သင့်လျော်ကောင်းမွန်သည့် အလုပ်အကိုင် ဆိုင်ရာဌာနေ အစီအစဉ် ၂၀၁၈-၂၀၂၁ (Decent Work Country Programme – DWCP 2018-2021) အရ လုံခြုံစိတ်ချရသည့် ရွှေ့ပြောင်းသွားလာမှု ဖြစ်စေရေး၊ ရွှေ့ပြောင်းအလုပ်သမားများ၏ လူနေမှုဘဝမြှင့်တင်ရေး၊ ပြည်သူလူထုအကြား လုံခြုံစိတ်ချရသည့် ရွှေ့ပြောင်းသွားလာမှုဆိုင်ရာ အသိပညာပေးမှု မြှင့်တင်ရေးတို့အတွက်ရွှေ့ပြောင်းအလုပ်သမားများအပါအဝင် အလုပ်သမားများ အတွက် လုပ်သားဈေးကွက် သတင်းအချက်အလက်စနစ်နှင့် ဝန်ဆောင်မှုများ အဆင့်မြှင့်ခြင်း၊ အလုပ်အကိုင်နှင့်လုပ်သားများရွှေ့ပြောင်းသွားလာနေထိုင်ခြင်းဆိုင်ရာ နှစ်သိမ့်ဆွေးနွေးမှုပေးသည့် ဝန်ဆောင်မှုများပိုမိုကောင်းမွန်လာရန်နှင့် လုပ်သားဈေးကွက်သတင်းအချက်အလက်ဝန်ဆောင်မှု အစီအစဉ်များအကြောင်း အသိပညာပေး ဖြန့်ဝေပေးခြင်းတို့ သက်ဆိုင်ရာဝန်ကြီးဌာနများ၊ INGO၊ NGO တို့နှင့် ပူးပေါင်း၍ ဆောင်ရွက်လျက် ရှိကြောင်း ပြောကြားခဲ့ပါသည်။
မြန်မာနိုင်ငံအနေဖြင့်အနာဂတ်အလုပ်အကိုင်နှင့်ပတ်သက်၍ လက်ရှိအလုပ်အကိုင်နယ်ပယ် များ ပိုမိုဖွံ့ဖြိုးအောင် ဆောင်ရွက်နေသကဲ့သို့ အလုပ်သမားများ၏ လူမှုစီးပွားဘဝတိုးတက်လာ စေရန်လုပ်သားစျေးကွက်သစ်များဖော်ထုတ်ပေးလျက်ရှိကြောင်း၊အလုပ်သမားရေးရာနှင့်ပတ်သက် ပြီး အလုပ်ရှင်၊ အလုပ်သမား၊ အစိုးရသုံးပွင့်ဆိုင် လူမှုရေးဆွေးနွေးမှုများ အားကောင်းလာစေရန် ဆောင်ရွက်ခြင်း၊ ILO၊ IOM အပါအဝင် အစိုးရမဟုတ်သည့် အဖွဲ့အစည်းများ၊ ဖွံ့ဖြိုးမှုမိတ်ဖက်များ၊ ပူးပေါင်းဆောင်ရွက်မှုမိတ်ဖက်များနှင့် ပူးပေါင်းဆောင်ရွက်လျက်ရှိကြောင်း ပြောကြားခဲ့ပါသည်။
ဆက်လက်၍ ILO နှင့် တက်ရောက်လာသည့် ကိုယ်စားလှယ်များမှ အစည်းအဝေးနှင့် စပ်လျဉ်း၍ ပြန်လည်သုံးသပ်ခြင်း၊ ဆွေးနွေးခြင်း၊ အကြံပြုချက်များ ရယူခြင်းများပြုလုပ်ခဲ့ပြီး နိုင်ငံအဆင့်အကြိုညှိနှိုင်းအစည်းအဝေးမှတိုက်တွန်းချက်များချမှတ်ခဲ့ကြောင်းသတင်းရရှိပါသည်။

နေပြည်တော် သြဂုတ် ၁၄ ရက်
အလုပ်သမား၊ လူဝင်မှုကြီးကြပ်ရေးနှင့် ပြည်သူ့အင်အားဝန်ကြီးဌာန၊ ပြည်ထောင်စုဝန်ကြီး ဦးသိန်းဆွေ သည် မြန်မာနိုင်ငံဆိုင်ရာ အိန္ဒိယနိုင်ငံသံအမတ်ကြီး H.E.Mr. Saurabh Kumar ဦး ဆောင်သော အဖွဲ့အား ယနေ့ညနေ ၁၆:၀၀ နာရီအချိန်တွင် နေပြည်တော်ရှိ အဆိုပါဝန်ကြီးဌာန၊ အစည်းအဝေး ခန်းမတွင်လက်ခံတွေ့ဆုံသည်။
ထိုသို့တွေ့ဆုံရာတွင် မြန်မာနှင့်အိန္ဒိယ နှစ်နိုင်ငံ ပူးပေါင်းဆောင်ရွက်ခဲ့သည့် UID System ကိစ္စရပ်များနှင့်ပတ်သက်၍ ဆက်လက်ဆောင်ရွက်မည့် အခြေအနေများ၊ မြန်မာနိုင်ငံအနေဖြင့် ပထမဦးစွာ နိုင်ငံသား တစ်ဦးချင်းစီ၏ Unit ID လုပ်ငန်းစဉ်ဆောင်ရွက်မည့်အခြေအနေ၊ ဒုတိယ အဆင့်အနေဖြင့် EID လုပ်ငန်းစဉ်အားဆောင်ရွက်မည့်အခြေအနေ၊ နောက်ဆုံးအဆင့်တွင် NID လုပ်ငန်းစဉ်များ ဆောင်ရွက်မည့် အခြေအနေများနှင့် ထိုလုပ်ငန်စဉ်များအတွက် မြန်မာနိုင်ငံနှင့် သြစတြီးယားနိုင်ငံတို့ပူးပေါင်းဆောင်ရွက်မည့်အခြေအနေများနှင့်လည်းကောင်း၊ အဆိုပါလုပ်ငန်းစဉ် များအတွက် အိန္ဒိယနိုင်ငံ၏ အတွေ့အကြုံကောင်းများ၊ နည်းပညာနှင့် ပညာရှင်အကူအညီများရယူ နိုင်ရေးတို့နှင့်ပတ်သက်၍လည်းကောင်း၊ မြန်မာနိုင်ငံနှင့် သြစတြီးယားနိုင်ငံတို့ ပူးပေါင်းဆောင်ရွက် မည့် UID System ကိစ္စရပ်နှင့်ပတ်သက်၍များ၊ မြန်မာနှင့်အိန္ဒိယနှစ်နိုင်ငံနယ်စပ်ဝင်ပေါက်ဖြစ်သည့် တမူး-မိုးရေးတွင် International Gate ဖွင့်လှစ်ဆောင်ရွက်မှုအခြေအနေများ၊ အိန္ဒိယနိုင်ငံမှ ထုတ် ပေးထားသည့် OCI ပတ်စပို့ ဗီဇာများနှင့်ပတ်သက်၍ မြန်မာနိုင်ငံသို့ လွယ်ကူစွာ ဝင်ရောက်နိုင်ရေး အတွက်လက်ရှိဖြစ်ပေါ်ကြုံတွေ့နေရသောအခက်အခဲများနှင့်အခြေအနေများကို နှစ်နိုင်ငံနိုင်ငံခြားရေး ဝန်ကြီးဌာနများမှ တဆင့်ဆက်သွယ် ဆောင်ရွက်သွားနိုင်ရေးကိစ္စရပ်များနှင့် နှစ်နိုင်ငံ လူဝင်မှုကြီး ကြပ်ရေးဆိုင်ရာကိစ္စရပ်များ၊နှစ်နိုင်ငံဆက်ဆံရေးဆိုင်ရာကိစ္စရပ်များနှင့်ပတ်သက်၍ ရင်းနှီးပွင့်လင်း စွာဆွေးနွေးခဲ့ကြကြောင်းသတင်းရရှိပါသည်။
အဆိုပါတွေ့ဆုံပွဲသို့ ပြည်ထောင်စုဝန်ကြီး နှင့်အတူ အမြဲတမ်းအတွင်းဝန်များနှင့် တာဝန်ရှိ သူများ တက်ရောက်ခဲ့ကြကြောင်းသတင်းရရှိသည်။

ရန်ကုန် ဩဂုတ်လ ၁၀ ရက်
လူမှုဖူလုံရေးအဖွဲ့သည်ပြင်ပလူနာဝန်ဆောင်မှုဆိုင်ရာကျန်းမာရေးစောင့်ရှောက်မှုကိုတိုးမြှင့် ဆောင်ရွက်နိုင်ရန်အတွက် ရန်ကုန်တိုင်းဒေသကြီးတွင် လူမှုဖူလုံရေး-ကဲဝဲလ်အထွေထွေရောဂါကု ဆေးခန်းဖွင့်လှစ်ခြင်းအခမ်းအနားကို၂၀၁၉ခုနှစ်၊ ဩဂုတ် လ၁၀ရက်၊ နံနက်ပိုင်းတွင် ရန်ကုန်တိုင်း ဒေသကြီး၊ဒဂုံမြို့သစ်(အရှေ့ပိုင်း)မြို့နယ်၌ ကျင်းပခဲ့ပါသည်။
အခမ်းအနားကို အလုပ်သမား၊ လူဝင်မှုကြီးကြပ်ရေးနှင့် ပြည်သူ့အင်အားဝန်ကြီးဌာန၊ ပြည်ထောင်စုဝန်ကြီး ဦးသိန်းဆွေ၊ ရန်ကုန်တိုင်းဒေသကြီးအစိုးရအဖွဲ့၊ လူဝင်မှုကြီးကြပ်ရေးနှင့် လူစွမ်းအားအရင်းအမြစ်ဝန်ကြီးဌာန၊ ဝန်ကြီးဒေါ်မိုးမိုးစုကြည်၊ ပြည်သူ့လွှတ်တော် ကိုယ်စားလှယ် ဉီးနေကျော်၊ အလုပ်ရှင်ကိုယ်စားလှယ် ဦးမြင့်သန်း၊ အလုပ်သမားကိုယ်စားလှယ် ဦးဇော်ဝင်းနှင့် ကဲဝဲလ်မက်ဒီကယ်ကုမ္ပဏီမှ ဒေါက်တာကျော်တင်လတ်တို့မှ ဖဲကြိုးဖြတ်ဖွင့်လှစ်ခဲ့ပါသည်။
၎င်းနောက် အခမ်းအနားကို ရန်ကုန်တိုင်းဒေသကြီး၊ စက်မှုဇုန်စီမံခန့်ခွဲမှု ကော်မတီရုံး (ဒဂုံအရှေ့)၊ ကနောင်ခန်းမ၌ ဆက်လက်ကျင်းပခဲ့ရာ အခမ်းအနားတွင် အလုပ်သမား၊လူဝင်မှုကြီး ကြပ်ရေးနှင့်ပြည်သူ့အင်အားဝန်ကြီးဌာန၊ ပြည်ထောင်စုဝန်ကြီး ဦးသိန်းဆွေမှ အမှာစကားပြော ကြားရာ၌ လူမှုဖူလုံရေးအဖွဲ့သည် အာမခံအလုပ်သမားများအားကိုးအားထားပြုရသည့်ဌာနတစ်ခု ဖြစ်စေရန်အတွက် အလုပ်ရှင်၊ အလုပ်သမားများ၏ အဓိကလိုအပ်ချက်ဖြစ်သည့် ဆေးကုသမှု ဝန်ဆောင်မှုကိုယခုထက် ပိုမိုထိရောက်အောင် ဆောင်ရွက်ပေးရန်နှင့် အကျိုးခံစားခွင့်များခွင့်ပြု ထုတ်ပေးရာတွင်ပိုမိုလွယ်ကူလျင်မြန်စေရန်အတွက် ပြုပြင်ပြောင်းလဲမှုများကိုILO ၏ နည်းပညာ အကူအညီရယူပြီးအရှိန်အဟုန်မြှင့် ဆောင်ရွက်လျက်ရှိပါကြောင်း၊
နိုင်ငံတော်၏ နိုင်ငံရေး၊ စီးပွားရေးဖြစ်ပေါ်တိုးတက်မှုများအရ တိုင်းဒေသကြီး/ပြည်နယ် များအနက် ရန်ကုန်တိုင်းဒေသကြီးသည် စီးပွားရေးလုပ်ငန်းများ တိုးတက်များပြားလာသည်နှင့် အညီအလုပ်လုပ်ကိုင်သည့် လုပ်သားဦးရေ အများဆုံးရှိသည့် တိုင်းဒေသကြီးတစ်ခုဖြစ်ပါကြောင်း၊ ရန်ကုန်တိုင်းဒေသကြီးအတွင်း အကျုံးဝင်လုပ်ငန်းဌာနပေါင်း (၁၂,၆၉၉) မှအာမခံအလုပ်သမား ပေါင်း ၉၄၅,၃၂၉ ရှိသည့်အတွက်တစ်နိုင်ငံလုံးတွင်ရှိသည့် အာမခံအလုပ်သမားများ၏ (၆၉.၄၈%) ရှိပါကြောင်း၊လူမှုဖူလုံရေးအဖွဲ့သည်ဒဂုံအရှေ့စက်မှုဇုန်အတွင်းရှိအကျုံးဝင်အာမခံအလုပ်သမားများ အတွက်ကျန်းမာရေးစောင့်ရှောက်မှုကိုထိထိရောက်ရောက်ဆောင်ရွက်ပေးနိုင်ရန်ရည်ရွယ်ပြီးကဲဝဲလ် ဆေးခန်းနှင့်စာချုပ်ချုပ်ဆို၍ လူမှုဖူလုံရေး – ကဲဝဲလ်ဆေးခန်းကို ထပ်မံတိုးချဲ့ဖွင့်လှစ် ပေးရခြင်း ဖြစ်ပါကြောင်း၊
ထို့အပြင် တစ်နိုင်ငံလုံးအတိုင်းအတာအနေနှင့် အာမခံအလုပ်သမားများ၏ ကျန်းမာရေး စောင့်ရှောက်မှုကိုတိုးချဲ့ ဆောင်ရွက်နိုင်ရန်အတွက် နိုင်ငံတကာမှာ ကျင့်သုံးနေသည့် Provider Purchaser Split (PPS) စနစ်ကို အကောင်အထည်ဖော်ရန် Pilot စီမံကိန်းကို ရေးဆွဲချမှတ် အကောင်အထည်ဖော်ဆောင်ရွက်လျက်ရှိရာ ယနေ့အထိ Pilot ဆေးခန်း (၇) ခန်းကို ဖွင့်လှစ်နိုင် ခဲ့ပြီးဖြစ်ပါကြောင်း၊ ၎င်းအပြင် လူမှုဖူလုံရေးအဖွဲ့ပိုင် ဆေးရုံ၊ဆေးခန်းများကို အဆင့်မြှင့်တင်ခြင်း၊ အသစ်ဆောက်လုပ်ခြင်းတို့ကို ဆောင်ရွက်နိုင်ရန်စီစဉ် ဆောင်ရွက်လျက်ရှိပါကြောင်း၊ အလုပ်ရှင်၊ အလုပ်သမားနှင့် နိုင်ငံတော်သည် အပြန်အလှန် ကိုင်းကျွန်းမှီ၊ ကျွန်းကိုင်းမှီ ဆောင်ရွက်ရခြင်း ဖြစ်သည့်အတွက် အလုပ်ရှင်၊ အလုပ်သမားများအနေနှင့်လည်း နိုင်ငံတော်အစိုးရနှင့် ပူးပေါင်းပြီး လိုအပ်သောအကြံဉာဏ်များပေးခြင်း၊ဝိုင်းဝန်းပူးပေါင်းဆောင်ရွက်ခြင်းတို့ဖြင့်လူမှုဖူလုံရေးစီမံကိန်း ကိုအောင်မြင်စွာအကောင်အထည်ဖော်ဆောင်ရွက်သွားရန်တိုက်တွန်းပြောကြားခဲ့သည်။၎င်းနောက် ရန်ကုန်တိုင်းဒေသကြီးအစိုးရအဖွဲ့၊ လူဝင်မှုကြီးကြပ်ရေးနှင့် လူစွမ်းအားအရင်းအမြစ်ဝန်ကြီးဌာန၊ ဝန်ကြီးဒေါ်မိုးမိုးစုကြည်က အမှာစကားပြောကြားပါသည်။ ထို့နောက် အလုပ်ရှင်ကိုယ်စားလှယ်၊ အလုပ်သမားကိုယ်စားလှယ်တို့က ကျေးဇူးတင်စကားပြောကြားခဲ့ပြီးမှတ်တမ်းဓါတ်ပုံရိုက်ကူးကာ အခမ်းအနားကိုရုတ်သိမ်းခဲ့ပါသည်။
အခမ်းအနားသို့ အလုပ်သမား၊ လူဝင်မှုကြီးကြပ်ရေးနှင့် ပြည်သူ့အင်အားဝန်ကြီးဌာန၊ ပြည်ထောင်စုဝန်ကြီး၊ ရန်ကုန်တိုင်းဒေသကြီးလူဝင်မှုကြီးကြပ်ရေးနှင့် လူစွမ်းအားအရင်းအမြစ် ဝန်ကြီးဌာနဝန်ကြီး၊လွှတ်တော်များမှ ကိုယ်စားလှယ်များ၊ အလုပ်သမား၊ လူဝင်မှုကြီးကြပ်ရေးနှင့် ပြည်သူ့အင်အားဝန်ကြီးဌာနမှတာဝန်ရှိသူများ၊ တိုင်းဒေသကြီးအဆင့်၊ ခရိုင်နှင့်မြို့နယ်အဆင့်ဌာန ဆိုင်ရာတာဝန်ရှိသူများ၊ ကဲဝဲလ်မက်ဒီကယ်ကုမ္ပဏီမှ တာဝန်ရှိသူများ၊ အလုပ်ရှင်များနှင့် အာမခံ အလုပ်သမားများတက်ရောက်ခဲ့ကြောင်းသိရှိရပါသည်။

နေပြည်တော်၊ ဩဂုတ်  ၉ ။

နိုင်ငံခြားသားအမြဲနေထိုင်ခွင့်ပြုခြင်းဆိုင်ရာ အကောင်အထည်ဖော်ရေး ဗဟိုကော်မတီ လုပ်ငန်းညှိနှိုင်းအစည်းအဝေးကို ဩဂုတ်လ (၉)ရက် ယနေ့ နံနက်(၁၀)နာရီတွင် နေပြည်တော်ရှိ အလုပ်သမား၊ လူဝင်မှုကြီးကြပ်ရေးနှင့်ပြည်သူ့အင်အားဝန်ကြီးဌာန၊ အစည်းအဝေးခန်းမ၌ ကျင်းပ ရာအခမ်းအနားသို့ နိုင်ငံခြားသားအမြဲနေထိုင်ခွင့်ပြုခြင်းဆိုင်ရာ အကောင်အထည်ဖော်ရေး ဗဟို ကော်မတီဥက္ကဋ္ဌ၊ အလုပ်သမား၊လူဝင်မှုကြီးကြပ်ရေးနှင့်ပြည်သူ့အင်အားဝန်ကြီးဌာန ပြည်ထောင်စု ဝန်ကြီး ဦးသိန်းဆွေ၊ အကောင် အထည်ဖော်ရေး ဗဟိုကော်မတီဝင်များဖြစ်ကြသည့် ဝန်ကြီးဌာန အသီးသီးမှ အမြဲတမ်းအတွင်းဝန်နှင့် ညွှန်ကြားရေးမှူးချုပ်များ၊ တာဝန်ရှိသူများ တက်ရောက်ကြ သည်။

အစီအစဉ်အရ ရှေးဦးစွာ နိုင်ငံခြားသားအမြဲနေထိုင်ခွင့်ပြုခြင်းဆိုင်ရာ အကောင်အထည် ဖော်ရေး ဗဟိုကော်မတီဥက္ကဋ္ဌ ပြည်ထောင်စုဝန်ကြီး ဦးသိန်းဆွေက မြန်မာနိုင်ငံတွင် နိုင်ငံခြားသား အမြဲနေထိုင်ခွင့်စနစ်ကို ၂၀၁၅ ခုနှစ်မှ စတင်အကောင်အထည်ဖော်ဆောင်ရွက်ခဲ့ပါကြောင်း၊ ယခု အခါကနဦးလျှောက်ထားခြင်းကို မြန်မာနိုင်ငံတွင်သာမက ပြည်ပနိုင်ငံအသီးသီးရှိ မြန်မာသံရုံးများ ၌လည်း လျှောက်ထားနိုင်ပြီဖြစ်ပါကြောင်း၊ စတင်ဆောင်ရွက်ချိန်မှ ယခုအထိ နိုင်ငံခြားသား (၅၆၈)ဦးအား အမြဲနေထိုင်ခွင့် ခွင့်ပြုပေးခဲ့ပြီးဖြစ်ပါကြောင်း၊ လျှောက်ထားသူများအား နိုင်ငံခြားသားအမြဲနေထိုင်ခွင့်ပြုခြင်းဆိုင်ရာ နည်းဥပဒေပြဋ္ဌာန်းချက်များနှင့်အညီ စိစစ်ခွင့်ပြုပေး လျက်ရှိပါကြောင်း၊ ယခုအစည်းအဝေးတွင် လုပ်ငန်းကော်မတီမှ စိစစ်တင်ပြလာသူများအား ဗဟိုကော်မတီအဖွဲ့ဝင်များက ထပ်မံစိစစ်အတည်ပြု ဆောင်ရွက်ပေးကြရန်ဖြစ်ပါကြောင်းနှင့် ဗဟို ကော်မတီမှ စိစစ်အတည်ပြုပြီးသူများအား လူတွေ့အကဲဖြတ်စစ်ဆေးနိုင်ရေးအတွက် ဆက်လက် ဆောင်ရွက်သွားမည်ဖြစ်ပါကြောင်းဖြင့် အကျယ်တဝင့်ရှင်းလင်းအမှာစကား ပြောကြားသည်။

ယင်းနောက် နိုင်ငံခြားသားအမြဲနေထိုင်ခွင့်ပြုခြင်းဆိုင်ရာ အကောင်အထည်ဖော်ရေး ဗဟို ကော်မတီအတွင်းရေးမှူးကိုယ်စား လုပ်ငန်းတာဝန်ခံအရာရှိက နိုင်ငံခြားသားအမြဲနေထိုင်ခွင့်စနစ် လုပ်ငန်းဆောင်ရွက်မှု၊ အမှတ်ပေးစနစ်နှင့် လက်ရှိလျှောက်ထားမှု၊ နေထိုင်ခွင့်လက်မှတ် နှစ်စဉ် သက်တမ်းအတည်ပြုဆောင်ရွက်မှု၊ ဗဟိုကော်မတီမှစိစစ်အတည်ပြုပြီးပါက လူတွေ့အစစ်ဆေး ခံနိုင်ရေး ဆက်လက်ဆောင်ရွက်မည့်အစီအစဉ်များကို ရှင်းလင်းတင်ပြသည်။

ဆက်လက်၍ နိုင်ငံခြားသားအမြဲနေထိုင်ခွင့် ခွင့်ပြုထားပြီးဖြစ်သည့် မြန်မာနိုင်ငံသား ဟောင်း (၃)ဦးမှ မြန်မာနိုင်ငံသားအဖြစ် ပြန်လည်ခံယူခွင့်ပြုရန် လျှောက်ထားလာမှုအပေါ် နည်းဥပဒေ၊ လုပ်ထုံးလုပ်နည်းနှင့်အညီ ဆောင်ရွက်ခွင့်ပြုနိုင်ရေးအတွက် ဗဟိုကော်မတီဝင်များက ဆွေးနွေးသုံးသပ်အတည်ပြုဆုံးဖြတ်ခဲ့ကြသည်။

ထို့နောက် တက်ရောက်လာကြသည့် ဗဟိုကော်မတီဝင်များက နိုင်ငံခြားသားအမြဲနေထိုင် ခွင့်ပြုနိုင်ရေးအတွက် လုပ်ငန်းကော်မတီမှ အတည်ပြုတင်ပြသည့်လျှောက်ထားသူတစ်ဦးချင်းအား သုံးသပ်ချက်များဖြင့်  အသီးသီးဆွေးနွေးတင်ပြကြရာ ဗဟိုကော်မတီဥက္ကဋ္ဌ၊ ပြည်ထောင်စုဝန်ကြီး ဦးသိန်းဆွေက လိုအပ်သည်များ ညှိနှိုင်းဆောင်ရွက်ပေးပြီး နိဂုံးချုပ်အမှာစကားပြောကြားကာ အစည်းအဝေးကို ရုပ်သိမ်းလိုက်သည်။

မြန်မာနိုင်ငံတွင် နိုင်ငံခြားသားအမြဲနေထိုင်ခွင့်စနစ်ကို ၂၀၁၅ ခုနှစ်၊ ဇန်နဝါရီလ(၂၉)ရက်မှ စတင်၍ ကျွမ်းကျင်ပညာရှင်၊ ရင်းနှီးမြှုပ်နှံသူ၊ မြန်မာနိုင်ငံသားဟောင်းနှင့် ယင်းတို့နှင့် သွေးချင်း ဆက်စပ်သူ နိုင်ငံခြားသားဟူ၍ အမျိုးအစား(၄)မျိုးခွဲခြားသတ်မှတ်ကာ လျှောက်လွှာများ လက်ခံ ဆောင်ရွက်ခဲ့သည်။ စတင်ဆောင်ရွက်ချိန်မှ ၂၀၁၉ ခုနှစ်၊ ဩဂုတ်လ (၈)ရက်အထိ လျှောက်ထားသူ စုစုပေါင်း(၆၁၁)ဦးရှိပြီး (၅၆၈)ဦးအား အမြဲနေထိုင်ခွင့် ခွင့်ပြုပေးခဲ့ပြီးဖြစ်ကြောင်း သိရသည်။

ယခုအစည်းအဝေးတွင် နိုင်ငံခြားသားအမြဲနေထိုင်ခွင့် ခွင့်ပြုထားသူ မြန်မာနိုင်ငံသား ဟောင်း(၃)ဦးအား မြန်မာနိုင်ငံသားအဖြစ် ပြန်လည်ခံယူခွင့် လျှောက်ထားမှုအပေါ် လုပ်ထုံး လုပ်နည်းနှင့်အညီ အတည်ပြုခွင့်ပြုပေးခဲ့ပြီး နိုင်ငံခြားသားအမြဲနေထိုင်ခွင့် ထပ်မံလျှောက်ထားသူ များအနက် လုပ်ငန်းကော်မတီမှ ပဏာမစိစစ်ပြီးသည့် ရင်းနှီးမြှပ်နှံသူနိုင်ငံခြားသား(၁)ဦး၊ မြန်မာ နိုင်ငံသားဟောင်း(၁၁)ဦး၊ သွေးချင်းဆက်စပ်သူ နိုင်ငံခြားသား(၅)ဦး၊ စုစုပေါင်း(၁၇)ဦးအား ဗဟိုကော်မတီမှ စိစစ်အတည်ပြုဆောင်ရွက်ခဲ့ကြောင်း သတင်းရရှိသည်။

နေပြည်တော် ၊သြဂုတ် ၈ ရက်

အလုပ်သမား၊ လူဝင်မှုကြီးကြပ်ရေးနှင့် ပြည်သူ့အင်အားဝန်ကြီးဌာန၊ ပြည်ထောင်စုဝန်ကြီး ဦးသိန်းဆွေ သည် ကိုရီးယားနိုင်ငံသံအမတ်ကြီးဖြစ်သူ H.E.Mr.Lee Sang-hwa  ဦးဆောင်သော အဖွဲ့အား ယနေ့ညနေ ၁၆:၀၀ နာရီအချိန်တွင် နေပြည်တော်ရှိ အဆိုပါဝန်ကြီးဌာန၊ အစည်းအဝေး ခန်းမတွင်လက်ခံတွေ့ဆုံသည်။

ထိုသို့တွေ့ဆုံရာတွင် မြန်မာနိုင်ငံသို့လာရောက်သည့် ကိုရီးယားနိုင်ငံသားများအား ဗီဇာ ကင်းလွတ်ခွင့်သက်တမ်း တိုးမြှင့်ရေးဆိုင်ရာကိစ္စရပ်နှင့် ပတ်သက်၍လည်းကောင်း၊  EPS စနစ်ဖြင့် ကိုရီးယားနိုင်ငံသို့ အလုပ်သမားစေလွှတ်ရေးအတွက် စာမေးပွဲဖြေဆိုမည့်ကိစ္စရပ်များနှင့် ပတ်သက် ၍လည်းကောင်း၊ မြန်မာနိုင်ငံရှိ ကိုရီးယားအထည်ချုပ်လုပ်ငန်းများတွင် တွေ့ကြုံနေရသည့် အလုပ် သမားရေးရာကိစ္စရပ်များအား ဝန်ကြီးဌာနမှ တာဝန်ရှိသူများနှင့် မြန်မာနိုင်ငံဆိုင်ရာ ကိုရီးယားနိုင်ငံ သံရုံးမှ တာဝန်ရှိသူများ၊ ဒေသအာဏာပိုင်များ ပူးပေါင်း၍ ဆောင်ရွက်သွားမည့် အခြေအနေများ နှင့် ပတ်သက်၍လည်းကောင်း ရင်းနှီးပွင့်လင်းစွာ ဆွေးနွေးခဲ့ကြကြောင်းသတင်းရရှိပါသည်။

အဆိုပါတွေ့ဆုံပွဲသို့ ပြည်ထောင်စုဝန်ကြီး နှင့်အတူ အမြဲတမ်းအတွင်းဝန်များ၊ ညွှန်ကြားရေး မှူးချုပ်နှင့် တာဝန်ရှိသူများ တက်ရောက်ခဲ့ကြကြောင်းသတင်းရရှိသည်။

နေပြည်တော်၊ ဩဂုတ် ၈ ။
အလုပ်သမား၊ လူဝင်မှုကြီးကြပ်ရေးနှင့် ပြည်သူ့အင်အားဝန်ကြီးဌာန၊ ပြည်ထောင်စုဝန်ကြီး ဦးသိန်းဆွေသည် မြန်မာနိုင်ငံဆိုင်ရာ ချက်သမ္မတနိုင်ငံသံအမတ်ကြီး Mr. Jaroslav Dolecek အား ဩဂုတ်လ(၈)ရက်နေ့ ယနေ့နံနက်(၁၀)နာရီတွင် အဆိုပါဝန်ကြီးဌာန၊ ပြည်ထောင်စုဝန်ကြီး ၏ ဧည့်ခန်းမ၌ လက်ခံတွေ့ဆုံသည်။
ထိုသို့တွေ့ဆုံရာတွင် ပြည်ထောင်စုဝန်ကြီးနှင့်အတူ အမြဲတမ်းအတွင်းဝန် ဦးအေးလွင်နှင့် တာဝန်ရှိသူများတက်ရောက်ခဲ့ကြပြီး မြန်မာ-ချက်သမ္မတနိုင်ငံတို့အကြား ယခင်ကတည်းက နှစ်နိုင်ငံချစ်ကြည်ရင်းနှီးစွာ အပြုသဘောဆောင်သည့် ဆက်ဆံဆောင်ရွက်ခဲ့မှုအခြေအနေများ၊ ချက်သမ္မတနိုင်ငံအနေဖြင့် မြန်မာနိုင်ငံ၏ ဒီမိုကရေစီပြုပြင်ပြောင်းလဲရေးဆောင်ရွက်ချက်များ အပေါ် အသိအမှတ်ပြုမှုနှင့် တွေ့ကြုံရသည့်စိန်ခေါ်မှုများအား သိရှိနားလည်မှုအခြေအနေများ၊ မြန်မာနှင့် ဥရောပနိုင်ငံများအကြား ချစ်ကြည်ရင်းနှီးမှုရှိစေရေးအတွက် ချက်သမ္မတနိုင်ငံမှ ပေါင်းကူးတံတားသဖွယ် ကြိုးပမ်းဆောင်ရွက်ပေးမှုနှင့် အတွေ့အကြုံများ မျှဝေဖလှယ်ပေးမှု အခြေအနေများ၊ မြန်မာနိုင်ငံမှ ပြည်ပသို့ တရားမဝင်ရွှေ့ပြောင်းသွားလာမှုနှင့် ပြည်တွင်းသို့ တရားမဝင်ဝင်ရောက်မှုများ ကြုံတွေ့ရသည့်အခြေအနေ၊ မြန်မာလုပ်သားများအနေဖြင့် ထိုင်းနှင့် မလေးရှားအပါအဝင် အခြားနိုင်ငံများသို့ တရားမဝင်သွားရောက်အလုပ်လုပ်ကိုင်မှုနှင့် မြန်မာ- ထိုင်း နှစ်နိုင်ငံပူးပေါင်း၍ ထိုင်းနိုင်ငံအရောက် မြန်မာအလုပ်သမားများ တရားဝင်အလုပ်အကိုင် အခွင့်အလမ်းများရရှိစေရေးအတွက် ကြိုးပမ်းဆောင်ရွက်မှုအခြေအနေ၊ မြန်မာနိုင်ငံအနေဖြင့် လည်း ပြည်တွင်း၌ အလုပ်အကိုင်အခွင့်အလမ်းများ ဖန်တီးပေးမှုနှင့် တရားမဝင် ရွှေ့ပြောင်း သွားလာလုပ်ကိုင်မှုမရှိစေရေးအတွက် IOM နှင့် ပူးပေါင်း၍ တိုင်းဒေသကြီး/ ပြည်နယ်အသီးသီး၌ ရွှေ့ပြောင်းလုပ်သားများ ကူညီထောက်ပံ့ရေးဗဟိုဌာန (Migrant Resource Centre- MRC) (၁၄)ခု ဖွင့်လှစ်ဆောင်ရွက်ထားရှိမှု နိုင်ငံတွင်း နိုင်ငံတကာအသိအမှတ်ပြု ကျွမ်းကျင်လုပ်သား များဖြစ်ပေါ်စေရေးအတွက် ကျွမ်းကျင်လုပ်သားသင်တန်းများ ဖွင့်လှစ်ဆောင်ရွက်နေမှုနှင့် တရား ဝင်လုပ်သားများအဖြစ် အသိအမှတ်ပြုလက်မှတ်များ ထုတ်ပေးနေမှု၊ လူဝင်မှုကြီးကြပ်ရေးဆိုင်ရာ လုပ်ငန်းများ ဖြေလျော့ဆောင်ရွက်ပေးမှုကြောင့် နိုင်ငံတကာအသိုင်းအဝိုင်းမှ အသိအမှတ်ပြုမှုနှင့် ယင်းဆောင်ရွက်ချက်များကြောင့် မြန်မာနိုင်ငံသို့ ဥပရောပနိုင်ငံများအပါအဝင် နိုင်ငံအသီးသီးမှ ခရီးသွားများ ဝင်ရောက်သွားလာမှု တိုးတက်များပြားလာမှု၊ မြန်မာ-ချက် နှစ်နိုင်ငံ လူဝင်မှု ကြီးကြပ်ရေးလုပ်ငန်းများ ပူးပေါင်းဆောင်ရွက်ရေး၊ ချက်နိုင်ငံအပါအဝင် နိုင်ငံပေါင်း (၁၀၀)အား e- Visa ဖြင့် ကမ္ဘာလှည့်ဗီဇာနှင့် နိုင်ငံပေါင်း (၅၅) နိုင်ငံအား e- Visa ဖြင့် လုပ်ငန်းဗီဇာခွင့်ပြု ဆောင်ရွက်ပေးမှုအခြေအနေ၊ ဆိုက်ရောက်ဗီဇာ (Visa on Arrival- VOA) ဖြင့် နိုင်ငံပေါင်း (၅၅) နိုင်ငံခွင့်ပြုဆောင်ရွက်ရာမှ လာမည့်အောက်တိုဘာ (၁)ရက်မှစ၍ အီတလီ၊ စပိန်၊ ဩစတြေးလျ၊ ဆွစ်ဇာလန်၊ ဂျာမနီ နှင့် ရုရှားစသည့် နိုင်ငံ (၆)နိုင်ငံအား VOA ဖြင့် ထပ်မံခွင့်ပြုသွားမည့် အစီအစဉ်၊ ချက်သမ္မတနိုင်ငံကိုလည်း ဆိုက်ရောက်ဗီဇာ (VOA) ခွင့်ပြုပေးနိုင်ရေးအတွက် အကောင်အထည်ဖော်ဆောင်ရွက်နိုင်ရေးအခြေအနေ၊ နှစ်နိုင်ငံ အလုပ်သမားရေးရာနှင့် လူဝင်မှု ကြီးကြပ်ရေးဆိုင်ရာလုပ်ငန်းများတွင် အတွေ့အကြုံကောင်းများ မျှဝေပေးနိုင်ရေးနှင့် အနွေးထွေး ဆုံး ချစ်ကြည်ရင်းနှီးမှုဖြင့် ဆက်လက်ပူးပေါင်းဆောင်ရွက်နိုင်ရေးအခြေအနေ၊ နိုင်ငံဖွံ့ဖြိုးတိုး တက်ရေးအတွက် ပြုပြင်ပြောင်းလဲရေးဆိုင်ရာလုပ်ငန်းများ၌ အတွေ့အကြုံမျှဝေပေးနိုင်ရေးနှင့် မြန်မာနိုင်ငံ၏ ပကတိအခြေအနေမှန်အား နိုင်ငံတကာအသိုင်းအဝိုင်းမှ သိရှိနားလည်နိုင်စေရေး အတွက် ရှင်းလင်းချပြပေးနိုင်ရေး အခြေအနေများနှင့်စပ်လျဉ်း၍ ရင်းနှီးပွင့်လင်းစွာ အမြင်ချင်း ဖလှယ်ဆွေးနွေးခဲ့ကြကြောင်း သတင်းရရှိသည်။ (-)

နေပြည်တော်၊ ဩဂုတ် ၅ ။
အလုပ်သမား၊ လူဝင်မှုကြီးကြပ်ရေးနှင့် ပြည်သူ့အင်အားဝန်ကြီးဌာန၊ ပြည်ထောင်စုဝန်ကြီး ဦးသိန်းဆွေသည် တာဝန်ရှိသူများနှင့်အတူ ဩဂုတ်လ ၄ ရက် မွန်းလွဲ ၂ နာရီခွဲတွင် မန္တလေးတိုင်း ဒေသကြီး၊ တံတားဦးမြို့နယ်ရှိ မန္တလေးအပြည်ပြည်ဆိုင်ရာလေဆိပ်သို့ရောက်ရှိပြီး လေဆိပ် ဧည့်ခန်းမ၌ လူဝင်မှုကြီးကြပ်ရေးဆိုင်ရာ လေဆိပ်ဝန်ထမ်းများနှင့် လေဆိပ်လုပ်ငန်းဆိုင်ရာ တာဝန် ရှိသူများအား တွေ့ဆုံသည်။
ထိုသို့တွေ့ဆုံရာတွင် ပြည်ထောင်စုဝန်ကြီးအား မန္တလေးအပြည်ပြည်ဆိုင်ရာ လေဆိပ်၏ လူဝင်မှုကြီးကြပ်ရေးဆိုင်ရာတာဝန်ခံ လက်ထောက်ညွှန်ကြားရေးမှူး ဦးထိန်လင်းသိန်းက လေဆိပ် ၌ လူဝင်မှုကြီးကြပ်ရေးဆိုင်ရာ ဝန်ထမ်းအင်အားနှင့် စက်ပစ္စည်းများ တပ်ဆင်အသုံးပြုမှု၊ပြည်တွင်း / ပြည်ပလေကြောင်းလိုင်းများ အခြေအနေနှင့် ပြည်တွင်း/ပြည်ပခရီးသွားများ ဝင်ရောက်/ထွက်ခွာမှု အခြေအနေ၊ လူဝင်မှုကြီးကြပ်ရေးဆိုင်ရာလုပ်ငန်းများ ဆောင်ရွက်နေမှုနှင့် လုပ်ငန်းဆိုင်ရာ လိုအပ် ချက်များကို ရှင်းလင်းတင်ပြပြီးတာဝန်ရှိသူများက ဖြည့်စွက်ရှင်းလင်းတင်ပြ၍ လေဆိပ်လုပ်ငန်း ဆိုင်ရာ ဆက်စပ်ဌာနမှ တာဝန်ခံများက လုပ်ငန်းများပူးပေါင်းဆောင်ရွက်နေမှု အခြေအနေများကို အသီးသီးရှင်းလင်းတင်ပြကြသည်။
ထို့နောက် ပြည်ထောင်စုဝန်ကြီးက ရှင်းလင်းတင်ပြချက်များအပေါ် လိုအပ်သည်များ ဖြည့်ဆည်းဆောင်ရွက်ပေးပြီး မန္တလေးလေဆိပ်သည် လေကြောင်းလိုင်းများ တိုးချဲ့ ပြေးဆွဲနေမှု ကြောင့် ပြည်တွင်း/ ပြည်ပ ခရီးသွားများ ဝင်/ ထွက်မှုများပြားလာကြောင်း၊ ထို့ကြောင့် လူဝင်မှု ကြီးကြပ်ရေးစစ်ဆေးရေးလုပ်ငန်းများကို အဆင်ပြေချောမွေ့မြန်ဆန်စေရေးအတွက် ဖြည့်ဆည်း ဆောင်ရွက်ပေးရမည့်လိုအပ်ချက်များကို အချိန်မီတင်ပြဆောင်ရွက်ကြရန်လိုကြောင်း၊ မိမိတို့မှလည်း လိုအပ်ချက်များကို အတတ်နိုင်ဆုံးဖြည့်ဆည်းဆောင်ရွက်ပေးသွားမည်ဖြစ်ကြောင်း၊ ခရီးသည် ဝင်/ ထွက်သွားလာမှုများပြားလာသည်နှင့်အမျှ လူဝင်မှုစစ်ဆေးရေးလုပ်ငန်းများကိုလည်း စနစ်တကျ ဂရုပြုအလေးထားဆောင်ရွက်ကြရန်နှင့် ဆက်စပ်ဌာနများနှင့် အမြဲချိတ်ဆက်ပူးပေါင်းဆောင်ရွက် ကြရန်လိုကြောင်း၊ ခရီးသည်များအနေဖြင့် လေဆိပ်သို့စတင်ရောက်ရှိသည်နှင့် မိမိတို့ဝန်ထမ်းများ နှင့်စတင်ထိတွေ့ဆက်ဆံရသည့်အတွက် ခရီးသည်များအပေါ် ဆက်ဆံရေးပြေပြစ်ကောင်းမွန်စွာ ဝန်ဆောင်မှုပေးကာ မိမိတို့လုပ်ငန်းကိုစနစ်တကျမှန်ကန် မြန်ဆန်စွာဆောင်ရွက်ပေးကြရမည်ဖြစ် ပါကြောင်း၊ မိမိတို့ဝန်ထမ်းများ၏ အရည်အချင်းပြည့်ဝမှု၊ ဆက်ဆံမှုပြေပြစ်မှုနှင့် ဘာသာစကား ကျွမ်းကျင်မှုတို့သည် နိုင်ငံ၏ပုံရိပ်ကိုထင်ဟပ်စေသည်ကို သတိပြုရန်လိုကြောင်း၊ ဝန်ထမ်းများအနေ ဖြင့်မိမိထမ်းဆောင်ရမည့် တာဝန်ကိုသိရှိနားလည်ပြီး စိတ်ရင်းစေတနာမှန်ဖြင့် ဆောင်ရွက်ကြရန်နှင့် အဂတိတရားကင်းရှင်း စွာအလေးထားဆောင်ရွက်ကြရန်လိုကြောင်းဖြင့် အကျယ်တဝင့်ရှင်းလင်း မှာကြားသည်။
ယင်းနောက် ပြည်ထောင်စုဝန်ကြီးသည် ဆိုက်ရောက်ဗီဇာ (Visa on Arrival- VOA) ကောင်တာသို့ရောက်ရှိရာ လုပ်ငန်းတာဝန်ခံက ပြည်ပနိုင်ငံအသီးသီးမှ ဆိုက်ရောက်ဗီဇာဖြင့် ဝင်ရောက်လာသည့် နိုင်ငံခြားသားခရီးသည်များအား လူဝင်မှုကြီးကြပ်ရေးဆိုင်ရာ စစ်ဆေး ဆောင်ရွက်မှုလုပ်ငန်းစဉ်အဆင့်ဆင့်ကို ရှင်းလင်းတင်ပြရာ ပြည်ထောင်စုဝန်ကြီးက လုပ်ငန်းလိုအပ် ချက်များ မှာကြားသည်။
ဆက်လက်၍ ပြည်ထောင်စုဝန်ကြီးသည် ပြည်ပထွက်ခွာကောင်တာ၌ ခရီးသည်များအား လူဝင်မှုကြီးကြပ်ရေးဆိုင်ရာလုပ်ငန်းများ စစ်ဆေးဆောင်ရွက်နေမှုအခြေအနေများကို လှည့်လည် ကြည့်ရှုစစ်ဆေးရာ တာဝန်ရှိသူများက လိုက်လံရှင်းလင်းတင်ပြကြပြီး ပြည်ထောင်စုဝန်ကြီးက လိုအပ်သည်များ မှာကြားညှိနှိုင်းဆောင်ရွက်ပေးသည်။
ယင်းနောက် ပြည်ထောင်စုဝန်ကြီးသည် ပြည်ပဆိုက်ရောက်ကောင်တာ၌ လူဝင်မှု ကြီးကြပ်ရေးဆိုင်ရာ စက်ကိရိယာပစ္စည်းများ တပ်ဆင်ထားရှိမှုနှင့် လုပ်ငန်းဆိုင်ရာအခက်အခဲများကို ကြည့်ရှုမေးမြန်းကာ တာဝန်ရှိသူများ၏တင်ပြချက်များအပေါ် လိုအပ်သည်များ ညှိနှိုင်းဖြည့်ဆည်း ဆောင်ရွက်ပေးခဲ့ကြောင်း သတင်းရရှိသည်။

IMG_1011

IMG_1017

IMG_1019

IMG_1024