ထိုင်းနိုင်ငံသို့ မြန်မာအလုပ်သမားများ စေလွှတ်ခြင်းလုပ်ငန်းဆိုင်ရာ သုံးသပ်ရေးနှင့် ထိုင်းနိုင်ငံရောက် မြန်မာအလုပ်သမားရေးရာကိစ္စရပ်များဆိုင်ရာ အလုပ်ရုံဆွေးနွေးပွဲ

ပြည်ပတွင်အလုပ်လုပ်ကိုင်မှုကြီးကြပ်ရေးကော်မတီ၏ကြီးကြပ်မှုဖြင့်ထိုင်းနိုင်ငံသို့ မြန်မာအလုပ်သမားများ စေလွှတ်ခြင်း လုပ်ငန်းဆိုင်ရာသုံးသပ်ရေးနှင့် ထိုင်းနိုင်ငံရောက် မြန်မာအလုပ်သမားရေးရာကိစ္စရပ်များဆိုင်ရာအလုပ်ရုံ ဆွေးနွေးပွဲ အား ၂၀၁၂ ခုနှစ်၊ ဇူလိုင်လ ၂၁ ရက်နေ့တွင် ရန်ကုန်တိုင်းဒေသကြီး၊ ရန်ကင်းမြို့နယ်၊ အလုပ်သမားဝန်ကြီးဌာန၊ အလုပ်သမားညွှန်ကြားရေးဦးစီးဌာန၊ကျွမ်းကျင်မှုလေ့ကျင့်ရေးသင်တန်းကျောင်း၌ကျင်းပရာ ပြည်ပတွင် အလုပ်လုပ်ကိုင်မှု ကြီးကြပ်ရေးကော်မတီ၊ အတွင်းရေးမှူး၊ အလုပ်သမားဝန်ကြီးဌာန၊ ဒုတိယဝန်ကြီး ဦးဆောင်၍ ဌာနဆိုင်ရာအကြီးအကဲများ၊ အလုပ်သမားညွှန်ကြားရေးဦးစီးဌာန၊ ပြည်နယ်၊ တိုင်းဒေသကြီး ဦးစီးမှူးများ၊ INGO များ၊ အလုပ်သမားရေးရာကျွမ်းကျင်သူများ၊ အထူးဖိတ်ကြားထားသူများနှင့် ပြည်ပအလုပ်အကိုင် လိုင်စင်ရအေဂျင်စီများ တက်ရောက်ကြပါသည်။

အလုပ်ရုံဆွေးနွေးပွဲတွင် ထိုင်းနိုင်ငံသို့ မြန်မာအလုပ်သမားများ စေလွှတ်ခြင်းလုပ်ငန်းစဉ် နှင့်ပတ်သက်၍ ထိုင်းနိုင်ငံသို့ အလုပ်သမားများ သွားရောက်ရာတွင် တွေ့ကြုံရသည့် အခက် အခဲများ ဖြေရှင်းနိုင်ရေးကိစ္စ၊ ထိုင်းနိုင်ငံသို့ သွားရောက်လုပ်ကိုင်ရာတွင် ကုန်ကျသည့် ကုန်ကျ စရိတ်များ လျော့နည်းနိုင်ရေးကိစ္စ၊ လက်ရှိဆောင်ရွက်နေသည့် ထိုင်းနိုင်ငံသို့ အလုပ်သမား အသစ်စေလွှတ်ခြင်း လုပ်ငန်းစဉ်နှင့်ပတ်သက်၍ အားနည်းချက်၊ အားသာချက်များ ရှင်းလင်း သိရှိနိုင်ရေးကိစ္စ၊ ထိုင်နိုင်ငံသို့ သွားရောက်လုပ်ကိုင်ခြင်းနှင့်ပတ်သက်၍ ပညာပေးအစီအစဉ်များ ဆောင်ရွက် နိုင်ရေးကိစ္စ၊ အလုပ်သမားများ အကာအကွယ်ပေးရေး အစီအစဉ်များ တိုးမြှင့်နိုင်ရေးကိစ္စ၊ အလုပ်သမားအသစ် စေလွှတ်ခြင်းလုပ်ငန်းစဉ်နှင့် ပတ်သက်၍ ထိုင်းနိုင်ငံနှင့် ပူးပေါင်း ဆောင်ရွက်မှု အခြေအနေကိစ္စရပ်များကိုဆွေးနွေး ခဲ့သလို အလုပ်သမားအသစ်များအတွက် ပြည်ပအလုပ်အကိုင်အကျိုးဆောင်အေဂျင်စီများမှ တာဝန်ယူစေလှွတ်ရေးကိစ္စ ကိုလည်း ဆွေးနွေးခဲ့ကြပါသည်။

ထို့ပြင် ၂ဝဝ၃ခုနှစ်က လက်မှတ်ရေးထိုးထားသော မြန်မာ-ထိုင်း နှစ်နိုင်ငံ အလုပ်သမား များခန့်ထားခြင်း ပူးပေါင်းဆောင်ရွက်ရေးဆိုင်ရာ နားလည်မှုစာချွန်လွှာအရ ထိုင်း- မြန်မာ အစည်းအဝေးများအလှည့်ကျ ကျင်းပ ခဲ့သည်မှာ (၁၁) ကြိမ်မြောက် ရှိခဲ့ပြီး၊ (၁၂) ကြိမ်မြောက် အစည်းအဝေးကို ထိုင်းနိုင်ငံတွင် ကျင်းပသွားမည်ဖြစ်ကြောင်း၊ ၂ဝဝ၃ ခုနှစ်က လက်မှတ်ရေးထိုး ခဲ့သော နားလည်မှုစာချွန်လွှာပါအချက်များအနက် အချို့အချက်များမှာ လက်ရှိအခြေအနေနှင့် ကိုက်ညီခြင်း မရှိသည့်အတွက် ခေတ်စနစ်နှင့် လိုက်လျောညီထွေမှုရှိအောင် ပြင်ဆင်သွားမှာ ဖြစ်ကြောင်း၊ နားလည်မှုစာချွန်လွှာတွင် ထိုင်းနိုင်ငံသို့ မြန်မာအလုပ်သမား စေလွှတ်ရေး လုပ်ငန်း စဉ်နှင့်ပတ်သက်၍ ရလာဒ်ကောင်းများကိုလည်း ထည့်သွင်းရေးဆွဲသွားမှာဖြစ်ကြောင်း၊ လက်ရှိ တွင် ထိုင်းနိုင်ငံ၌ မြန်မာအလုပ်သမား (၂) သန်းကျော်ရှိရာ အဆိုပါအလုပ်သမားများအား အထောက်အထားများရရှိရေး၊ အကာအကွယ်ပေးနိုင်ရေးတို့အတွက် ကြိုးပမ်းဆောင်ရွက်သွား မည်ဖြစ်ကြောင်း သတင်းရရှိပါသည်။

Leave a Reply