မြန်မာ-အိန္ဒိယ နှစ်နိုင်ငံကြား တမူး-မိုးရေးနှင့် ရီခေါဒါရ်-ဇိုခေါသာ အပြည်ပြည်ဆိုင်ရာနယ်စပ် ဝင်/ထွက် ဂိတ်များ ယနေ့ တစ်ပြိုင်တည်းဖွင့်လှစ်

နေပြည်တော်၊ ဩဂုတ် ၈ ။

မြန်မာ-အိန္ဒိယ နှစ်နိုင်ငံဖြတ်သန်းသွားလာရေးဆိုင်ရာ သဘောတူစာချုပ်အရ အကောင်အထည် ဖော်ဆောင်ရွက်သည့် မြန်မာ-အိန္ဒိယနှစ်နိုင်ငံအကြား မြန်မာနိုင်ငံ၊ စစ်ကိုင်းတိုင်းဒေသကြီး တမူး မြို့နယ်နှင့် အိန္ဒိယနိုင်ငံ၊ မဏိပူရပြည်နယ် မိုးရေးမြို့နယ်တို့ရှိ တမူး-မိုးရေးအပြည်ပြည်ဆိုင်ရာ နယ်စပ် ဝင်/ထွက်ဂိတ်နှင့် မြန်မာနိုင်ငံ၊ ချင်းပြည်နယ်၊ ရိခေါဒါရ်မြို့နှင့် အိန္ဒိယနိုင်ငံ၊ မီဇိုရမ်ပြည်နယ် ဇိုခေါသာ မြို့တို့ရှိ ရီခေါဒါရ်-ဇိုခေါသာ အပြည်ပြည်ဆိုင်ရာနယ်စပ်ဝင်/ထွက်ဂိတ် ဖွင့်ပွဲများကို ဩဂုတ် ၈ ရက် တွင် တစ်ပြိုင်တည်းကျင်းပသည်။

မြန်မာ-အိန္ဒိယ နှစ်နိုင်ငံအကြား တမူး-မိုးရေး အပြည်ပြည်ဆိုင်ရာ နယ်စပ် ဝင်/ထွက် ဂိတ် ဖွင့်ပွဲကို ဩဂုတ် ၈ ရက်၊ နံနက်(၈)နာရီခွဲတွင် တမူးမြို့ရှိ ချစ်ကြည်ရေးတံတားအနီး အဆိုပါ ဝင်/ထွက် ဂိတ်မုဒ်ဦး၌ကျင်းပရာ အစီအစဉ်အရ အလုပ်သမား၊ လူဝင်မှုကြီးကြပ်ရေးနှင့် ပြည်သူ့အင်အား ဝန်ကြီးဌာန၊ အမြဲတမ်းအတွင်းဝန် ဦးအေးလွင်က မြန်မာ-အိန္ဒိယ နှစ်နိုင်ငံအကြား အပြည်ပြည် ဆိုင်ရာ နယ်စပ် ဝင်/ထွက်ဂိတ်များ ဖွင့်လှစ်ရခြင်းနှင့်စပ်လျဉ်း၍ ရှင်းလင်းပြောကြားပြီး မန္တလေးမြို့ ရှိ မြန်မာနိုင်ငံဆိုင်ရာ အိန္ဒိယနိုင်ငံသံရုံးမှ ကောင်စစ်ဝန်ချုပ် Mr. Nandan Shigh Bhaisora နှင့် တမူးခရိုင်အထွေထွေအုပ်ချုပ်ရေးဦးစီးဌာန၊ ခရိုင်အုပ်ချုပ်ရေးမှူး ဦးမြင့်သင်းအောင်တို့က အမှာစကား အသီးသီးပြောကြားကြသည်။

ထို့နောက် အမြဲတမ်းအတွင်းဝန် ဦးအေးလွင်၊ ကောင်စစ်ဝန်ချုပ်နှင့် ခရိုင်အုပ်ချုပ်ရေးမှူး တို့က တမူး-မိုးရေး အပြည်ပြည်ဆိုင်ရာနယ်စပ် ဝင်/ထွက်ဂိတ် မုဒ်ဦးအား ဖဲကြိုးဖြတ်ဖွင့်လှစ်ပေး ကြပြီး ဝင်/ထွက်ဂိတ်အတွင်း လူဝင်မှုကြီးကြပ်ရေးစစ်ဆေးရေးလုပ်ငန်း အခြေအနေများကိုလှည့်လည် ကြည့်ရှုအားပေးကြသည်။

အလားတူ မြန်မာ-အိန္ဒိယ နှစ်နိုင်ငံအကြား ရီခေါဒါရ်-ဇိုခေါသာ အပြည်ပြည်ဆိုင်ရာနယ်စပ် ဝင်/ထွက်ဂိတ်ဖွင့်ပွဲကို ဩဂုတ် (၈) ရက် ၊ နံနက် (၈) နာရီခွဲတွင် ရီခေါဒါရ်မြို့ရှိ အဆိုပါ ဝင်/ထွက်ဂိတ် မုဒ်ဦး၌ကျင်းပရာ အစီအစဉ်အရ ချင်းပြည်နယ်ဝန်ကြီးချုပ် ဆလိုင်းလျန်လွယ် နှင့် အိန္ဒိယနိုင်ငံ၊ မီဇိုရမ်ပြည်နယ် နယ်စပ်ကုန်သွယ်ရေးဝန်ကြီး Mr. H Bohluma တို့က အမှာစကားအသီးသီး ပြောကြားကြသည်။

ထို့နောက် ချင်းပြည်နယ်ဝန်ကြီးချုပ် ဆလိုင်းလျန်လွယ်၊ ချင်းပြည်နယ် လုံခြုံရေးနှင့် နယ်စပ် ရေးရာဝန်ကြီး ဗိုလ်မှူးကြီး ဟန်ဝင်းအောင်၊ ပြည်နယ်စာရင်းစစ်ချုပ် ဦးလာလ်တင်မန်း၊ စစ်တွေမြို့ရှိ မြန်မာနိုင်ငံဆိုင်ရာ အိန္ဒိယနိုင်ငံသံရုံးမှ ကောင်စစ်ဝန်ချုပ် Dr. Kumar Praveen နှင့် လူဝင်မှု ကြီးကြပ်ရေး နှင့်ပြည်သူ့အင်အားဆိုင်ရာ ပြည်နယ်ဦးစီးမှူး ဦးဝင်းနီဦး တို့က ရီခေါဒါရ်-ဇိုခေါသာ အပြည်ပြည်ဆိုင်ရာနယ်စပ် ဝင်/ထွက်ဂိတ် မုဒ်ဦးအား ဖဲကြိုးဖြတ်ဖွင့်လှစ်ပေးကြပြီး လူဝင်မှု ကြီးကြပ်ရေး စစ်ဆေးရေးလုပ်ငန်းအခြေအနေများကို လှည့်လည်ကြည့်ရှု့အားပေးကြသည်။

မြန်မာ-အိန္ဒိယ နှစ်နိုင်ငံကြား တမူး-မိုးရေးနှင့် ရီခေါဒါရ်-ဇိုခေါသာ အပြည်ပြည်ဆိုင်ရာ နယ်စပ် ဝင်/ထွက်ဂိတ်များဖွင့်လှစ်နိုင်ခဲ့ခြင်းကြောင့် သက်တမ်းရှိသော နိုင်ငံကူးလက်မှတ်နှင့် မြန်မာနိုင်ငံဆိုင်ရာ အိန္ဒိယနိုင်ငံသံရုံးမှထုတ်ပေးသည့် ပြည်ဝင်ဗီဇာနှင့်e-Visaပါရှိသော မြန်မာနိုင်ငံသား များသည် အိန္ဒိယနိုင်ငံသို့လည်းကောင်း၊ သက်တမ်းရှိသောနိုင်ငံကူးလက်မှတ်နှင့် သက်ဆိုင်ရာနိုင်ငံ ၏ မြန်မာနိုင်ငံသံရုံးမှထုတ်ပေးသည့် ပြည်ဝင်ဗီဇာ (သို့မဟုတ်) e-Visa ပါရှိသည့် အိန္ဒိယနိုင်ငံသား နှင့် အိန္ဒိယနိုင်ငံသားမဟုတ်သည့် အခြားနိုင်ငံခြားသား (တတိယနိုင်ငံသား)များသည် မြန်မာနိုင်ငံသို့ လည်းကောင်း ဝင်/ထွက်သွားလာနိုင်ပြီဖြစ်သည်။ မြန်မာနိုင်ငံအတွင်းဝင်ရောက်လာသူများအနေဖြင့် မည်သည့်အပြည်ပြည်ဆိုင်ရာ ဝင်/ထွက်ပေါက်များမှမဆို ပြည်ပသို့ပြန်လည် ထွက်ခွာနိုင်ကြောင်းနှင့် သံတမန်နိုင်ငံကူးလက်မှတ်နှင့် အထူးနိုင်ငံကူးလက်မှတ် ကိုင်ဆောင်ထားသည့် အိန္ဒိယနိုင်ငံသားများ အား ပြည်ဝင်ဗီဇာကင်းလွတ်ခွင့်ပြုကြောင်း သိရှိရသည်။

ထို့အပြင် အဆိုပါအပြည်ပြည်ဆိုင်ရာ နယ်စပ်ဝင်/ထွက်ပေါက်များတည်ရှိရာ နယ်စပ်ဒေသ၌ နေထိုင်သူ မြန်မာနှင့်အိန္ဒိယနိုင်ငံသားများသည် နယ်စပ်ဖြတ်သန်းခွင့်လက်မှတ် (Borderpass) ဖြင့် နယ်စပ်မျဉ်းမှ (၁၆) ကီလိုမီတာအကွာအဝေးအထိ ဝင်/ထွက်ခွင့်ပြပြီး တစ်ကြိမ်ဝင်/ ထွက်ခွင့်အတွက် (၁၃) ညအိပ် (၁၄) ရက်ခွင့်ပြုပေးလျက်ရှိကြောင်း သတင်းရရှိသည်။ (-)

Tamu (1)
တမူးမြို့၊ မြန်မာ-အိန္ဒိယ အပြည်ပြည်ဆိုင်ရာ နယ်စပ် ဝင်/ထွက်ဂိတ် ဖွင့်ပွဲအခမ်းအနား ကျင်းပနေစဉ်

Tamu (2)
ရီခေါဒါရ်မြို့၊ မြန်မာ-အိန္ဒိယ အပြည်ပြည်ဆိုင်ရာ နယ်စပ် ဝင်/ထွက်ဂိတ် ဖွင့်ပွဲအခမ်းအနား ကျင်းပနေစဉ်

Tamu (3)
ရီခေါဒါရ်မြို့၊ မြန်မာ-အိန္ဒိယ အပြည်ပြည်ဆိုင်ရာ နယ်စပ် ဝင်/ထွက်ဂိတ် ဖွင့်ပွဲအခမ်းအနား ကျင်းပနေစဉ်