အနည်းဆုံးအခကြေးငွေသတ်မှတ်ရေးဆိုင်ရာအမျိုးသားကော်မတီ၏ စတုတ္ထအကြိမ် ညှိနှိုင်းအစည်းအဝေး ကျင်းပ

နေပြည်တော် ဒီဇင်ဘာလ ၂၉ ရက်
အနည်းဆုံးအခကြေးငွေသတ်မှတ်ရေးဆိုင်ရာအမျိုးသားကော်မတီ၏ စတုတ္ထအကြိမ်ညှိနှိုင်းအစည်းအဝေးကို ဒီဇင်ဘာလ ၂၉ ရက်နေ့ နံနက် ၁၀၀၀ နာရီတွင် နေပြည်တော်ရှိ အလုပ်သမား၊ လူဝင်မှုကြီးကြပ်ရေးနှင့်ပြည်သူ့အင်အားဝန်ကြီးဌာန အစည်းအဝေးခန်းမ၌ ကျင်းပခဲ့ရာ အနည်းဆုံး အခကြေးငွေ သတ်မှတ်ရေး ဆိုင်ရာ အမျိုးသားကော်မတီဥက္ကဋ္ဌ ပြည်ထောင်စုဝန်ကြီး ဦးသိန်းဆွေ၊ ပြည်ထောင်စုနယ်မြေ၊ တိုင်းဒေသကြီး၊ ပြည်နယ်ကော်မတီများမှ သက်ဆိုင်ရာဝန်ကြီးများ၊ အမြဲတမ်း အတွင်းဝန်များ၊ ညွှန်ကြားရေးမှူးချုပ်များ၊ သက်ဆိုင်ရာဝန်ကြီးဌာနများမှ တာဝန်ရှိပုဂ္ဂိုလ်များ၊ ကျွမ်းကျင်ပညာရှင်များ၊အလုပ်ရှင်ကိုယ်စားလှယ်များ၊ အလုပ်သမားကိုယ်စားလှယ်များနှင့် အခြားဖိတ်ကြားထားသူများ တက်ရောက်ခဲ့သည်။
ညှိနှိုင်းအစည်းအဝေးတွင် အလုပ်သမား၊ လူဝင်မှုကြီးကြပ်ရေးနှင့် ပြည်သူ့အင်အားဝန်ကြီးဌာန ပြည်ထောင်စုဝန်ကြီး ဦးသိန်းဆွေက အနည်းဆုံးအခကြေးငွေ ပြင်ဆင်သတ်မှတ်နိုင်ရေးနှင့်စပ်လျဉ်းပြီး အနည်းဆုံးအခကြေးငွေ သတ်မှတ်ရေးဆိုင်ရာ အမျိုးသားကော်မတီတတိယအကြိမ်အစည်းအဝေးကို ၂-၁၀-၂၀၁၇ ရက်နေ့တွင် ကျင်းပခဲ့ကြောင်း၊ နိုဝင်ဘာလ ၄ ရက်နေ့တွင် ရန်ကုန်မြို့၌ လည်းကောင်း၊ နိုဝင်ဘာလ ၂၆ ရက်နေ့တွင် မန္တလေးမြို့၌ လည်းကောင်း အလုပ်ရှင်၊ အလုပ်သမား ကိုယ်စားလှယ်များနှင့်တွေ့ဆုံခဲ့ကြောင်း၊ ၂၃-၁၂-၂၀၁၇ ရက်နေ့တွင် ရန်ကုန်မြို့၌ ပြည်သူ့လွှတ်တော်၊ အမျိုးသားလွှတ်တော်ကိုယ်စားလှယ်များ၊ တိုင်းဒေသကြီးအစိုးရကိုယ်စားလှယ်၊ ကျွမ်းကျင်ပညာရှင်များ၊ အလုပ်ရှင်၊ အလုပ်သမားအဖွဲ့အစည်းကိုယ်စားလှယ်များ၊ ILO နှင့် အနည်းဆုံးအခကြေးငွေနှင့် အလုပ်သမားအခွင့်အရေးဆိုင်ရာ ပူးပေါင်းဆောင်ရွက်ရေးကော်မတီဝင် အပါအဝင် ၁၉၅ ဦးနှင့် အလုပ်ရုံဆွေးနွေးပွဲ ကျင်းပခဲ့ကြောင်း၊ အလုပ်ရုံဆွေးနွေးပွဲတွင် အလုပ်သမားကိုယ်စားလှယ်များမှ ၅၆၀၀ ကျပ်နှင့် ၆၆၀၀ ကျပ်ရရှိရေး တောင်းဆိုခဲ့ပြီး အလုပ်ရှင်ကိုယ်စားလှယ်များမှ အနည်းဆုံး ၄၀၀၀ ကျပ်နှုန်းကိုသာ လက်ရှိစီးပွားရေးအခြေအနေကို ကြည့်ပြီး စဉ်းစားဆုံးဖြတ်ပေးရန် တင်ပြခဲ့ကြောင်း၊ နိုဝင်ဘာလအတွင်း ပြည်ထောင်စုနယ်မြေ၊ သက်ဆိုင်ရာ တိုင်းဒေသကြီး/ ပြည်နယ်ကော်မတီတို့မှ အဆိုပြုနှုန်းထားများနှင့် လုပ်ငန်းအလိုက် သတ်မှတ်နိုင်ရန် အမျိုးသားကော်မတီသို့ တင်ပြခဲ့ကြောင်း၊ အလုပ်ရှင်၊ အလုပ်သမား နှစ်ဘက် ကိုယ်စားလှယ်များ၏ တင်ပြချက်များအနက် အလုပ်သမားအဖွဲ့အစည်းများက တင်ပြခဲ့သည့် အလုပ်သမား(၅)ဦးနှင့်အထက်အပါအဝင် အလုပ်သမားများ တောင်းဆိုသည့် အနည်းဆုံးအခကြေးငွေနှုန်းထား ၅၆၀၀ ကျပ် သတ်မှတ်ပါက မိသားစုတစ်နိုင်တစ်ပိုင်လုပ်ငန်းငယ်များ၊ အိမ်တွင်းမှု လုပ်ငန်းများ၊ အသေးစားလုပ်ငန်းများ အခက်အခဲရှိနိုင်သလို အလုပ်အကိုင်အခွင့်အလမ်းဖန်တီး ပေးနိုင်မှုမှာလည်း အခက်အခဲများစွာ ကြုံနိုင်ကြောင်း၊ အစိုးရဌာနများနှင့် အဖွဲ့အစည်းများရှိ နေ့စားအလုပ်သမားများ၏လုပ်ခကို ဘဏ္ဍာရေးဝန်ကြီးဌာနက ၁၀-၁၂-၂၀၁၅ ရက်စွဲပါ အမိန့် ကြော်ငြာစာဖြင့် တစ်နေ့ (၈)နာရီအတွက် ၃၆၀ဝိ/- နှုန်းကို ၂၀၁၅ ခုနှစ်၊ ဒီဇင်ဘာလမှ ခံစားခွင့် ပြုခဲ့ပြီးဖြစ်ကြောင်း၊ နိုင်ငံ့ဝန်ထမ်းများအနက် ရုံးအကူဝန်ထမ်း၏ အခြေခံလစာမှာ ၁၂၀၀၀၀ ကျပ် သတ်မှတ်ထား၍ နေ့တွက်လုပ်ခမှာ ပျမ်းမျှ ၄၀၀၀ ကျပ်ဖြစ်ကြောင်း၊ ဒေသတွင်းနိုင်ငံများ၏ လက်ရှိအနည်းဆုံး အခကြေးငွေနှုန်းထားများကို ထည့်သွင်း စဉ်းစားရန်လိုကြောင်း၊ အနည်းဆုံးအခ ကြေးငွေကို တစ်နာရီလျှင် ၆၀၀ ကျပ်နှုန်းဖြင့် ၈ နာရီအတွက် ၄၈၀၀ ကျပ်နှုန်းသတ်မှတ်ပါက လက်ရှိနိုင်ငံ့ဝန်ထမ်း၊ ရုံးအကူ၏ လစာနှုန်းဖြစ်သည့် တစ်နာရီလျှင် ၅၀၀ ကျပ်နှုန်းဖြင်‌့ ၈ နာရီ အတွက် ၄၀၀၀ ကျပ်နှုန်းရှိသည့် တစ်လစာ ၁၂၀၀၀၀ ကျပ်ထက် တိုးမြှင့်သတ်မှတ်ရန် စဉ်းစားရမည်ဖြစ်ကြောင်း၊ အလုပ်ရှင်များမှပေးနိုင်မည့် နှုန်းထားဖြစ်ရန်လိုသကဲ့သို့ အလုပ်သမားများက လက်ခံနိုင်မယ့် သင့်လျော်မျှတသည့် နှုန်းထားဖြစ်ရန် လိုကြောင်း၊ အနည်းဆုံးအခကြေးငွေကို မြင့်မားစွာသတ်မှတ်ခြင်းအားဖြင့် ကုန်ဈေးနှုန်းများ မြင့်မားလာနိုင်ခြင်း၊ စက်ရုံ၊ အလုပ်ရုံများတွင် ကုန်ထုတ်လုပ်မှု စရိတ်များတိုးမြင့်လာ၍ ဝန်ထမ်းများလျှော့ချလာနိုင်ပြီး စက်စွမ်းအားကိုပိုမို အသုံးပြုလာနိုင်ခြင်း၊ စက်ရုံများပိတ်သိမ်းသွားနိုင်ခြင်းတို့ကြောင့် အလုပ်လက်မဲ့များ တိုးပွားလာနိုင်သလို နိုင်ငံခြားရင်းနှီးမြှုပ်နှံမှုများကို အဟန့်အတားဖြစ်စေနိုင်ကြောင်း၊ နည်းပါးစွာသတ်မှတ်ခြင်းဖြင့် အလုပ်သမားများ၏ စားဝတ်နေရေး အခက်အခဲဖြစ်ပေါ်စေနိုင်ပြီး အလုပ်သမားနှင့် အလုပ်ရှင်အကြားအငြင်းပွားမှုပိုမိုဖြစ်ပွားနိုင်ခြင်း၊ကုန်ထုတ်စွမ်းအားကျဆင်းစေနိုင်ခြင်း၊ လုပ်ငန်းခွင် အေးချမ်း သာယာခြင်းကို ထိခိုက်စေနိုင်ခြင်းတို့ ဖြစ်စေနိုင်ကြောင်း၊ အလုပ်သမားများနှင့် အလုပ်ရှင်များအနေဖြင့် မိမိတို့၏ရပိုင်ခွင့် Rights နှင့် တာဝန်ရှိမှု Responsibilities တို့ဆက်စပ်နေမှုကို ဂရုပြုရန်လိုကြောင်း၊ ထို့ကြောင့် ဈေးကွက်စီးပွားရေးအခြေအနေနှင့် လုပ်ငန်းခွင်တည်ငြိမ်အေးချမ်းရေးကို အလေးထားစဉ်းစားပြီး မြန်မာနိုင်ငံ၏ လက်ရှိအခြေအနေနှင့် သင့်လျော်မည့်နှုန်းထားတစ်ခုအတည်ပြုနိုင်ရန် ကြွရောက်လာကြသည့် အမျိုးသားကော်မတီဝင်များနှင့် ပြည်ထောင်စုနယ်မြေ၊ တိုင်းဒေသကြီးနှင့် ပြည်နယ်ကော်မတီဥက္ကဋ္ဌများက ပြင်ဆင်သတ်မှတ်မည့် အနည်းဆုံးအခကြေးငွေနှုန်းထားကို အလေးထားသုံးသပ်အဆိုပြု ပေးစေလိုကြောင်း ပြောကြားခဲ့ပါသည်။
ဆက်လက်၍ ညှိနှိုင်းအစည်းအဝေးသို့ တက်ရောက်လာကြသူများမှ အဆိုပြုအနည်းဆုံး အခကြေးငွေသတ်မှတ်နိုင်ရေးအတွက် ပွင့်လင်းမြင်သာစွာ အပြန်အလှန်ဆွေးနွေးခဲ့ကြကြောင်းနှင့် ဆွေးနွေးပွဲအပြီးတွင် အနည်းဆုံးအခကြေးငွေသတ်မှတ်ရေးဆိုင်ရာအမျိုးသားကော်မတီမှ အဆိုပြု အနည်းဆုံးအခကြေးငွေနှုန်းထားအား တစ်ရက်လျှင် ၄၈၀ဝ ကျပ်သတ်မှတ်ခဲ့ပြီး အလုပ်သမား ၁၀ ဦးနှင့်အထက် အကျုံးဝင်သတ်မှတ်ပေးနိုင်ရေး ဆုံးဖြတ်ခဲ့ကြသည်။ အဆိုပါဆုံးဖြတ်ချက်အား ကန့်ကွက်ရန်ရှိပါက ရက်ပေါင်း ၆၀ အတွင်းအနည်းဆုံးအခကြေးငွေ သတ်မှတ်ရေးဆိုင်ရာ အမျိုးသားကော်မတီသို့ ကန့်ကွက်လွှာပေးပို့နိုင်ကြောင်း ဆွေးနွေးဆုံးဖြတ်ခဲ့ကြပြီး ၁၆၃၀ အချိန်တွင် အစည်းအဝေးကိုရုပ်သိမ်းခဲ့ကြောင်းသတင်းရရှိပါသည်။